ਡਾਊਨਟਾਊਨ ਈਸਟਸਾਈਡ ਵਿੱਚ ਗ੍ਰਿਫਤਾਰੀ ਦੌਰਾਨ ਵੈਨਕੂਵਰ ਪੁਲਿਸ ਵੱਲੋਂ ਭਰੀ ਹੋਈ ਰਾਈਫਲ ਅਤੇ ਨਸ਼ਾ ਜ਼ਬਤ

ਵੈਨਕੂਵਰ ਪੁਲਿਸ ਦੀ ਬੀਟ ਇਨਫੋਰਸਮੈਂਟ ਟੀਮ ਨੇ ਮੰਗਲਵਾਰ ਦੁਪਹਿਰ ਨੂੰ ਡਾਊਨਟਾਊਨ ਈਸਟਸਾਈਡ ਵਿਚ ਇੱਕ ਕਾਰਵਾਈ ਕਰਦਿਆਂ ਸਰੀ ਨਾਲ ਸਬੰਧਿਤ ਇੱਕ ਕਥਿਤ ਨਸ਼ਾ ਤਸਕਰ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਹ ਕਾਰਵਾਈ 9 ਦਸੰਬਰ ਨੂੰ ਦੁਪਹਿਰ ਲਗਭਗ 2:35 ਵਜੇ ਈਸਟ ਹੇਸਟਿੰਗਜ਼ ਅਤੇ ਕੋਲੰਬੀਆ ਸਟ੍ਰੀਟ ਦੇ ਨੇੜੇ ਹੋਈ, ਜਿੱਥੇ ਅਧਿਕਾਰੀ ਗਸ਼ਤ ਕਰ ਰਹੇ ਸਨ। 32 ਸਾਲਾ ਸਰੀ ਨਿਵਾਸੀ ਨੂੰ ਬੀਟ ਇਨਫੋਰਸਮੈਂਟ ਟੀਮ ਨੇ ਇੱਕ ਰਿਹਾਇਸ਼ੀ ਇਮਾਰਤ ਦੇ ਬਾਹਰ ਨਸ਼ੇ ਵੇਚਣ ਦੇ ਮਾਮਲੇ ਵਿਚ ਕਾਬੂ ਕੀਤਾ।

ਫਿਲਹਾਲ ਉਸ ਦੀ ਪਛਾਣ ਜਨਤਕ ਨਹੀਂ ਕੀਤੀ ਗਈ ਪਰ ਵੈਨਕੂਵਰ ਪੁਲਿਸ ਨੇ ਦੱਸਿਆ ਕਿ ਤਲਾਸ਼ੀ ਦੌਰਾਨ ਉਸ ਕੋਲੋਂ ਕਾਰਤੂਸ ਸਮੇਤ ਇੱਕ ਮੋਡੀਫਾਈਡ ਸੈਮੀ-ਆਟੋਮੈਟਿਕ ਰਾਈਫਲ ਇੱਕ ਮਸ਼ੇਟੀ, ਇੱਕ ਫੋਲਡਿੰਗ ਚਾਕੂ, ਬੇਅ ਸਪਰੇਅ ਅਤੇ ਵੱਖ-ਵੱਖ ਮਾਤਰਾ ਵਿਚ ਫੈਂਟਾਨਿਲਦੀ ਜ਼ਬਤੀ ਹੋਈ।

ਗੌਰਤਲਬ ਹੈ ਕਿ ਡਾਊਨਟਾਊਨ ਈਸਟਸਾਈਡ ਵਿਚ ਬੀਟ ਇਨਫੋਰਸਮੈਂਟ ਟੀਮ ਵਿਸ਼ੇਸ਼ ਤੌਰ 'ਤੇ ਲਗਾਈ ਗਈ ਹੈ। ਵੈਨਕੂਵਰ ਪੁਲਿਸ ਨੇ ਕਿਹਾ ਕਿ ਮਾਮਲੇ ਸਬੰਧੀ ਅੱਗੇ ਦੀ ਹੋਰ ਜਾਂਚ ਜਾਰੀ ਹੈ।