ਵੈਨਕੂਵਰ ਪੁਲਿਸ ਵੱਲੋਂ ਵੁੱਡਵਰਡਜ਼ ਸਾਈਟ ‘ਤੇ ਨਵਾਂ ਟ੍ਰੇਨਿੰਗ ਅਕੈਡਮੀ ਸਥਾਪਤ ਕਰਨ ਦਾ ਐਲਾਨ

ਵੈਨਕੂਵਰ ਵਿਚ ਨਵੀਂ ਪੁਲਿਸ ਟ੍ਰੇਨਿੰਗ ਅਕੈਡਮੀ ਖੁੱਲ੍ਹ ਰਹੀ ਹੈ। ਸੈਂਟਰ ਆਫ਼ ਐਕਸੀਲੈਂਸ ਨਾਂ ਦੀ ਇਹ ਅਕੈਡਮੀ ਸ਼ਹਿਰ ਦੇ 351 ਐਬਟ ਸਟ੍ਰੀਟ ਸਥਿਤ ਵੁੱਡਵਰਡ ਬਿਲਡਿੰਗ ਵਿਚ ਹੋਵੇਗੀ। ਹੁਣ ਤੱਕ ਜੇ.ਆਈ.ਬੀ.ਸੀ.ਯਾਨੀ ਜਸਟਿਸ ਇੰਸਟੀਚਿਊਟ ਆਫ਼ ਬੀ.ਸੀ. ਹੀ ਮਿਊਂਸੀਪਲ ਪੁਲਿਸ ਲਈ ਪ੍ਰਾਈਮਰੀ ਟ੍ਰੇਨਿੰਗ ਪ੍ਰੋਵਾਈਡਰ ਸੀ ਪਰ ਵੈਨਕੂਵਰ ਪੁਲਿਸ ਦੀ ਲੰਮੇ ਸਮੇਂ ਤੋਂ ਸ਼ਿਕਾਇਤ ਸੀ ਕਿ ਇਹ ਟ੍ਰੇਨਿੰਗ ਸੈਂਟਰ ਉਨ੍ਹਾਂ ਦੀਆਂ ਪੁਲਿਸਿੰਗ ਲੋੜਾਂ ਨੂੰ ਸਮੇਂ ਸਿਰ ਪੂਰਾ ਕਰਨ ਵਿਚ ਅਸਮਰਥ ਰਿਹਾ ਹੈ।

ਚੀਫ਼ ਕਾਂਸਟੇਬਲ ਸਟੀਵ ਰਾਏ ਮੁਤਾਬਕ, ਬੇਸ਼ੱਕ ਜੇ.ਆਈ.ਬੀ.ਸੀ. ਨੇ ਨਵੀਂ ਭਰਤੀ ਦੀ ਟ੍ਰੇਨਿੰਗ ਲਈ ਸਾਈਜ਼ ਵਿਚ ਵਾਧਾ ਕੀਤਾ ਹੈ ਪਰ ਇਹ ਵਿਸਥਾਰ ਅਜੇ ਵੀ ਸਾਡੀ ਟ੍ਰੇਨਿੰਗ ਡਿਮਾਂਡ ਤੋਂ ਬਹੁਤ ਘੱਟ ਹੈ, ਜਿਸ ਦੀ ਵਜ੍ਹਾ ਨਾਲ ਵੈਨਕੂਵਰ ਪੁਲਿਸ ਡਿਪਾਰਟਮੈਂਟ ਨੂੰ ਹਰ ਨਵੇਂ ਭਰਤੀ ਨੂੰ ਅਕੈਡਮੀ ਤੋਂ ਪਹਿਲਾਂ ਅਤੇ ਬਾਅਦ ਵਿਚ ਲਗਭਗ 8 ਹਫ਼ਤਿਆਂ ਦੀ ਟ੍ਰੇਨਿੰਗ ਖੁਦ ਦੇਣੀ ਪੈਂਦੀ ਹੈ।

ਰਾਏ ਨੇ ਕਿਹਾ ਕਿ ਵੈਨਕੂਵਰ ਪੁਲਿਸ ਦੀ ਨਵੀਂ ਟ੍ਰੇਨਿੰਗ ਅਕੈਡਮੀ ਅੱਜ ਦੇ ਸਮੇਂ ਦੀ ਪੁਲਿਸਿੰਗ ਲਈ ਚਾਹੀਦੇ ਖਾਸ ਸਕਿੱਲ ਲਈ ਮੌਜੂਦਾ ਅਧਿਕਾਰੀਆਂ ਨੂੰ ਐਡਵਾਂਸ ਟ੍ਰੇਨਿੰਗ ਦੇਵੇਗੀ ਅਤੇ ਗੈਪ ਨੂੰ ਘੱਟ ਕਰਨ ਲਈ ਨਵੇਂ ਭਰਤੀ ਹੋਏ ਗ੍ਰੈਜੂਏਟ ਨੂੰ ਵੀ ਵੈਨਕੂਵਰ ਵਿਚ ਪੁਲਿਸਿੰਗ ਲਈ ਤਿਆਰ ਕਰਨ ਵਿਚ ਮਦਦ ਕਰੇਗੀ। ਗੌਰਤਲਬ ਹੈ ਕਿ ਇਹ ਅਕੈਡਮੀ ਵੁੱਡਵਰਡ ਬਿਲਡਿੰਗ ਵਿਚ ਉਸ ਜਗ੍ਹਾ 'ਤੇ ਬਣੇਗੀ, ਜਿੱਥੇ ਪਹਿਲਾਂ ਲੰਡਨ ਡਰੱਗਜ਼ ਦਾ ਸਟੋਰ ਹੁੰਦਾ ਸੀ।