ਨਨਾਈਮੋ 'ਚ ਪੁਲਿਸ ਦੀ ਐਨਫੋਰਸਮੈਂਟ ਕੈਂਪੇਨ ਦੌਰਾਨ ਵਾਹਨ ਅਤੇ ਡਰਟ ਬਾਈਕ ਕੀਤੇ ਇੰਪਾਉਂਡ

ਬੀ. ਸੀ. ਆਰ.ਸੀ.ਐਮ.ਪੀ. ਦੇ ਹੈਲੀਕਾਪਟਰ ਅਤੇ ਜ਼ਮੀਨੀ ਅਫਸਰ ਦੀ ਮਦਦ ਨਾਲ ਨਾਨਾਇਮੋ ਪੁਲਿਸ ਨੇ ਵੱਖ-ਵੱਖ ਡਰਾਈਵਿੰਗ ਅਪਰਾਧ ਲਈ 4 ਡਰਟ ਬਾਈਕ ਅਤੇ 3ਵਾਹਨਾਂ ਨੂੰ ਇੰਪਾਉਂਡ ਕਰਨ ਦੀ ਕਾਰਵਾਈ ਕੀਤੀ ਹੈ। ਇਹ ਓਪਰੇਸ਼ਨ 14 ਸਤੰਬਰ ਨੂੰ ਸਵੇਰੇ 10 ਵਜੇ ਤੋਂ ਰਾਤ 9 ਵਜੇ ਤੱਕ ਚਲਾਇਆ ਗਿਆ, ਜਿਸ ਤਹਿਤ ਸ਼ਹਿਰ ਭਰ ਦੇ ਪ੍ਰਮੁੱਖ ਖੇਤਰਾਂ 'ਤੇ ਫੋਕਸ ਰਿਹਾ, ਇਸ ਵਿਚ ਜੈਕ ਪੁਆਇੰਟ, ਐਕਸਟੈਂਸ਼ਨ, ਯੂਨੀਵਰਸਿਟੀ ਹਾਈਟਸ ਅਤੇ ਨਾਨਾਇਮੋ ਪਾਰਕਵੇਅ ਸ਼ਾਮਲ ਸਨ।

ਨਨਾਈਮੋ ਆਰ.ਸੀ.ਐਮ.ਪੀ. ਨੇ ਕਿਹਾ ਕਿ ਤਿੰਨ ਵਾਹਨ ਬਹੁਤ ਜ਼ਿਆਦਾ ਸਪੀਡ ਦੇ ਮਾਮਲੇ ਵਿਚ ਜ਼ਬਤ ਕੀਤੇ ਗਏ, ਜਦੋਂ ਕਿ ਇਸ ਤੋਂ ਇਲਾਵਾ ਕਿਸੇ ਕੋਲ ਲਾਇਸੈਂਸ ਨਹੀਂ ਸੀ, ਕੋਈ ਬਿਨਾਂ ਇੰਸ਼ੋਰੈਂਸ ਦੇ ਸੀ ਅਤੇ ਕਿਸੇ ਵਲੋਂ ਸੀਟ ਬੈਲਟ ਨਹੀਂ ਲਗਾਈ ਗਈ ਸੀ। Cst ਗੈਰੀ ਓ'ਬ੍ਰਾਇਨ ਨੇ ਕਿਹਾ ਕਿ ਇੱਕ ਘਟਨਾ ਵਿਚ ਪੁਲਿਸ ਤੋਂ ਭੱਜੇ ਇੱਕ 16 ਸਾਲਾ ਨੌਜਵਾਨ ਨੂੰ ਹੈਲੀਕਾਪਟਰ ਏਅਰ 8 ਦੀ ਮਦਦ ਨਾਲ ਲੱਭਿਆ ਗਿਆ ਅਤੇ ਉਸ ਦੀ ਬਾਈਕ ਜ਼ਬਤ ਕੀਤੀ ਗਈ ਅਤੇ ਉਸ ਨੂੰ ਭਾਰੀ ਜੁਰਮਾਨਾ ਵੀ ਲੱਗਾ। ਨੌਜਵਾਨ ਕੋਲ ਇੰਸ਼ੋਰੈਂਸ ਨਹੀਂ ਸੀ।

ਓ'ਬ੍ਰਾਇਨ ਨੇ ਕਿਹਾ ਕਿ ਇਸ ਓਪਰੇਸ਼ਨ ਦੇ ਨਤੀਜਿਆਂ ਤੋਂ ਸਾਰੇ ਅਧਿਕਾਰੀ ਖੁਸ਼ ਹਨ। ਉਨ੍ਹਾਂ ਕਿਹਾ ਕਿ ਕਈ ਵਾਹਨਾਂ ਨੂੰ ਉਨ੍ਹਾਂ ਵਿਚ ਗੰਭੀਰ ਖਰਾਬੀਆਂ ਦੇ ਚੱਲਦੇ ਸੜਕ ਤੋਂ ਹਟਾਉਣ ਦੀ ਕਾਰਵਾਈ ਵੀ ਕੀਤੀ ਗਈ।