ਵੈਨਕੂਵਰ ਪੁਲਿਸ ਨੇ ਸੈਕਿੰਡ ਡਿਗਰੀ ਮਰਡਰ ਦੇ ਦੋਸ਼ 'ਚ ਵਿਅਕਤੀ ਨੂੰ ਲਿਆ ਹਿਰਾਸਤ 'ਚ

ਵੈਨਕੂਵਰ ਵਿਚ ਦੋ ਹਫ਼ਤੇ ਪਹਿਲਾਂ ਡਾਊਨਟਾਊਨ ਈਸਟਸਾਈਡ ਵਿਚ ਹੋਈ ਕਤਲ ਦੀ ਵਾਰਦਾਤ ਦੇ ਸਬੰਧ ਵਿਚ ਪੁਲਿਸ ਨੇ 33 ਸਾਲਾ ਮੁਲਜ਼ਮ 'ਤੇ ਸੈਕਿੰਡ ਡਿਗਰੀ ਮਰਡਰ ਦਾ ਦੋਸ਼ ਲਗਾਇਆ ਗਿਆ ਹੈ।

ਪੁਲਿਸ ਮੁਤਾਬਕ, 45 ਸਾਲਾ ਮਾਰਕ ਐਂਡਰਿਊ ਰੋਸਾ 'ਤੇ 28 ਨਵੰਬਰ ਨੂੰ ਵੱਡੇ ਤੜਕੇ 3 ਵਜੇ ਦੇ ਕਰੀਬ ਇੱਕ ਅਜਨਬੀ ਵਲੋਂ ਹਮਲਾ ਕੀਤਾ ਗਿਆ ਸੀ। ਇਹ ਘਟਨਾ ਗੋਰ ਅਤੇ ਪਾਵੇਲ ਸਟ੍ਰੀਟ ਨੇੜੇ ਵਾਪਰੀ ਸੀ।

ਵੈਨਕੂਵਰ ਪੁਲਿਸ ਦੀ ਹੋਮੀਸਾਈਡ ਯੂਨਿਟ ਨੇ ਦੋ ਹਫ਼ਤਿਆਂ ਦੀ ਜਾਂਚ ਤੋਂ ਬਾਅਦ ਸ਼ੱਕੀ ਦੀ ਪਛਾਣ ਕੀਤੀ। ਉਸ ਨੂੰ ਐਤਵਾਰ ਸ਼ਾਮ ਮੇਨ ਸਟ੍ਰੀਟ ਅਤੇ ਟਰਮੀਨਲ ਐਵੇਨਿਊ ਕੋਲੋਂ ਗ੍ਰਿਫਤਾਰ ਕੀਤਾ।

ਦੋਸ਼ੀ ਦੀ ਪਛਾਣ 33 ਸਾਲਾ ਕੋਰੀ ਰੌਬਰਟ ਮਸਕੇਟ ਵਜੋਂ ਸਾਹਮਣੇ ਆਈ ਹੈ ਜੋ ਫਿਲਹਾਲ ਹਿਰਾਸਤ ਵਿਚ ਹੈ। ਪੁਲਿਸ ਮੁਤਾਬਕ, ਪੀੜਤ ਉਸੇ ਇਲਾਕੇ ਦਾ ਵਸਨੀਕ ਸੀ, ਜਿੱਥੇ ਉਸ ਉਤੇ ਹਮਲਾ ਹੋਇਆ ਸੀ। ਹਮਲੇ ਦੀ ਕਿਸਮ ਬਾਰੇ ਖਾਸ ਵੇਰਵੇ ਜਨਤਕ ਤੌਰ 'ਤੇ ਜਾਰੀ ਨਹੀਂ ਕੀਤੇ ਗਏ ਹਨ।