ਦੋ ਸਾਲ ਪਹਿਲਾਂ ਲਾਪਤਾ ਹੋਏ ਜਸਟਿਨ ਫਿਸ਼ਰ ਦਾ ਪਤਾ ਲਗਾਉਣ ਲਈ ਵਾਈਟ ਰੌਕ ਆਰਸੀਐਮਪੀ ਵਲੋਂ ਭਾਲ ਜਾਰੀ

ਵ੍ਹਾਈਟ ਰੌਕ ਆਰ.ਸੀ.ਐਮ.ਪੀ. ਨੇ ਦੋ ਸਾਲ ਪਹਿਲਾਂ ਲਾਪਤਾ ਹੋਏ ਜਸਟਿਨ ਕਾਈਲ ਫਿਸ਼ਰ ਬਾਰੇ ਪਤਾ ਲਗਾਉਣ ਲਈ ਅੱਜ ਮੁੜ ਅਪੀਲ ਜਾਰੀ ਕੀਤੀ ਹੈ। ਕਾਈਲ ਫਿਸ਼ਰ ਇੱਕ ਅਮਰੀਕੀ ਵਿਅਕਤੀ ਸੀ, ਜੋ 2 ਅਕਤੂਬਰ 2023 ਨੂੰ ਵੈਨਕੂਵਰ ਇੰਟਰਨੈਸ਼ਨਲ ਏਅਰਪੋਰਟ 'ਤੇ ਉਤਰਿਆ ਸੀ ਅਤੇ ਉਦੋਂ ਤੋਂ ਉਸ ਨੇ ਆਪਣੇ ਪਰਿਵਾਰ ਨਾਲ ਸੰਪਰਕ ਨਹੀਂ ਕੀਤਾ।

ਉਸ ਨੂੰ ਆਖਰੀ ਵਾਰ 7 ਅਕਤੂਬਰ 2023 ਨੂੰ ਵ੍ਹਾਈਟ ਰੌਕ ਵਿਚ ਮਰੀਨ ਡਰਾਈਵ ਦੇ 15000 ਬਲਾਕ ਵਿਚ ਦੇਖਿਆ ਗਿਆ ਸੀ ਅਤੇ ਅਗਲੇ ਦਿਨ ਇੱਕ ਕਾਇਕਰ ਨੂੰ ਕਾਈਲ ਫਿਸ਼ਰ ਦੇ ਸਮਾਨ ਵਾਲਾ ਬੈਕਪੈਕ ਕਮਿਊਨਿਟੀ ਤੋਂ ਲਗਭਗ 100 ਮੀਟਰ ਦੂਰ ਪਾਣੀ ਵਿਚ ਮਿਲਿਆ ਸੀ। ਬੁੱਧਵਾਰ ਨੂੰ ਵ੍ਹਾਈਟ ਰੌਕ ਆਰ.ਸੀ.ਐਮ.ਪੀ. ਨੇ ਇੱਕ ਵੀਡੀਓ ਸੰਦੇਸ਼ ਜਾਰੀ ਕੀਤਾ ਜਿਸ ਵਿਚ ਇਸ ਮਾਮਲੇ ਬਾਰੇ ਜਾਣਕਾਰੀ ਵਾਲੇ ਕਿਸੇ ਵੀ ਵਿਅਕਤੀ ਨੂੰ 778-545-4800 'ਤੇ ਸੰਪਰਕ ਦੀ ਅਪੀਲ ਕੀਤੀ ਗਈ।

ਸਾਰਜੈਂਟ ਵੈਨੇਸਾ ਮੁੰਨ ਨੇ ਕਿਹਾ ਕਿ ਜਾਂਚ ਦੇ ਆਧਾਰ 'ਤੇ ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਕਾਈਲ ਫਿਸ਼ਰ ਦੇ ਲਾਪਤਾ ਹੋਣ ਨਾਲ ਕੋਈ ਕ੍ਰਿਮੀਨਲ ਸਬੰਧ ਨਹੀਂ ਹੈ। ਮੁੰਨ ਨੇ ਕਿਹਾ ਕਿ ਉਸ ਦੇ ਪਰਿਵਾਰ ਮੁਤਾਬਕ, ਜਸਟਿਨ ਕਾਈਲ ਫਿਸ਼ਰ ਇੱਕ ਡੂੰਘਾ ਵਿਚਾਰਕ ਹੈ ਜੋ ਵਿਸ਼ਵ ਘਟਨਾਵਾਂ, ਇਤਿਹਾਸ ਅਤੇ ਫਲੋਸਫੀ 'ਤੇ ਗੱਲਬਾਤ ਕਰਨਾ ਪਸੰਦ ਕਰਦਾ ਹੈ।