9.25C Vancouver 9.25C VancouverApr 7, 2026 9:42 PM - Pervez Sandhu - Connect Newsroom
ਸ਼ਨੀਵਾਰ ਨੂੰ ਵੈਨਕੂਵਰ ਦੇ ਆਈਕੌਨਿਕ ਬੀ.ਸੀ. ਪਲੇਸ ਸਟੇਡੀਅਮ ਵਿਖੇ ਵੈਨਕੂਵਰ ਵ੍ਹਾਈਟਕੈਪਸ ਨੇ ਵਿਸਾਖੀ ਮੁਕਾਬਲਾ ਖੇਡਿਆ।
ਦਰਅਸਲ ਟੀਮ ਨੇ ਆਪਣਾ 4 ਅਪ੍ਰੈਲ ਦਾ ਮੁਕਾਬਲਾ ਵਿਸਾਖੀ ਨੂੰ ਸਮਰਪਿਤ ਕੀਤਾ ਸੀ ਅਤੇ ਇਸੇ ਕਾਰਨ ਪੋਰਟਲੈਂਡ ਟਿੰਬਰਸ ਖਿਲਾਫ ਇਸ ਮੁਕਾਬਲੇ ਨੂੰ ਵਿਸਾਖੀ ਮੁਕਾਬਲੇ ਦਾ ਨਾਮ ਦਿੱਤਾ ਗਿਆ।
ਇਸ ਦੌਰਾਨ ਪ੍ਰੀ-ਗੇਮ ਅਤੇ ਹਾਫ-ਟਾਈਮ ਸਮੇਂ ਭੰਗੜਾ ਅਤੇ ਪੰਜਾਬੀ ਸੰਗੀਤ ਨਾਲ ਜੁੜੀਆਂ ਪ੍ਰਫਾਰਮੈਂਸਿਸ ਵੀ ਵੇਖਣ ਨੂੰ ਮਿਲੀਆਂ।
ਇਸ ਮੁਕਾਬਲੇ ਨੂੰ ਵੇਖਣ ਲਈ 24,400 ਤੋਂ ਵਧੇਰੇ ਦਰਸ਼ਕ ਪਹੁੰਚੇ ਹੋਏ ਸਨ।
ਮੁਕਾਬਲੇ ਤੋਂ ਪਹਿਲਾਂ ਸ਼ਾਮ ਕਰੀਬ ਸਵਾ ਸੱਤ ਵਜੇ ਨਾਮ ਭੰਗੜਾ, ਅਮੋਲ ਰਤਨ ਅਤੇ ਯੂ.ਬੀ.ਸੀ. ਭੰਗੜਾ ਵੱਲੋਂ ਭੰਗੜਾ ਪ੍ਰਫਾਰਮੈਂਸ ਕੀਤੀ ਗਈ।
ਇਸ ਤੋਂ ਬਾਅਦ ਹਾਫ-ਟਾਈਮ ਸਮੇਂ ਸ਼ਾਮ ਕਰੀਬ ਸਾਡੇ ਅੱਠ ਵਜੇ ਇੰਦਰਪਾਲ ਮੋਗਾ ਅਤੇ ਚੰਨੀ ਨੱਤਾਂ ਨੇ ਪੰਜਾਬੀ ਗਾਇਕੀ ਨਾਲ ਸਮਾਂ ਬੰਨ ਦਿੱਤਾ।
ਦੋਵੇਂ ਹੀ ਪ੍ਰਫਾਰਮੈਂਸਿਸ ਨੂੰ ਮੈਦਾਨ 'ਚ ਬੈਠੇ ਹਰ ਵਰਗ ਦੇ ਦਰਸ਼ਕਾਂ ਵੱਲੋਂ ਭਰਵਾਂ ਹੁੰਗਾਰਾ ਮਿਲਿਆ।
ਵਿਸਾਖੀ ਨੂੰ ਸਮਰਪਿਤ ਪੰਜਾਬੀ ਪ੍ਰਫਾਰਮੈਂਸਿਸ ਦਾ ਪ੍ਰਬੰਧ ਕਨੈਕਟ ਮੀਡੀਆ ਨੈਟਵਰਕ ਵੱਲੋਂ ਕੀਤਾ ਗਿਆ ਸੀ।
ਖਾਸ ਗੱਲ ਇਹ ਸੀ ਕਿ ਵਿਸਾਖੀ ਮੁਕਾਬਲੇ 'ਚ ਵੈਨਕੂਵਰ ਵ੍ਹਾਈਟਕੈਪਸ ਦੀ ਟੀਮ ਨੇ ਵੀ ਦਰਸ਼ਕਾਂ ਨੂੰ ਨਿਰਾਸ਼ ਨਹੀਂ ਕੀਤਾ।
ਟੀਮ ਨੇ ਪੋਰਟਲੈਂਡ ਟਿੰਬਰਸ ਖਿਲਾਫ ਕਂਢੇਦਾਰ ਮੁਕਾਬਲੇ 'ਚ 3-2 ਨਾਲ ਬਾਜ਼ੀ ਮਾਰੀ।
ਟੀਮ ਨੇ ਘਰੇਲੂ ਦਰਸ਼ਕਾਂ ਸਾਹਮਣੇ ਓਕੈਂਪੋ ਦੇ 6ਵੇਂ ਮਿੰਟ 'ਚ ਕੀਤੇ ਗੋਲ ਆਸਰੇ 1-0 ਦੀ ਲੀਡ ਹਾਸਿਲ ਕੀਤੀ ਸੀ।
ਹਾਲਾਂਕਿ ਟਿੰਬਰਸ ਨੇ 36ਵੇਂ ਮਿੰਟ 'ਚ ਬਰਾਬਰੀ ਕੀਤੀ ਅਤੇ ਫਿਰ ਪਹਿਲੇ ਹਾਫ ਦੇ ਰੈਗੂਲਰ ਟਾਈਮ ਦੇ ਪੂਰਾ ਹੋਣ ਤੋਂ ਬਾਅਦ ਸਟੌਪੇਜ ਟਾਈਮ 'ਚ ਗੋਲ ਕਰ 2-1 ਦੀ ਲੀਡ ਹਾਸਿਲ ਕਰੇ ਲਈ।
ਵੈਨਕੂਵਰ ਵ੍ਹਾਈਟਕੈਪਸ ਦੀ ਟੀਮ ਲਗਾਤਾਰ ਮੌਕੇ ਬਣਾਉਣ ਦੇ ਬਾਵਜੂਦ ਦੂਜੇ ਹਾਫ ਦੇ ਰੈਗੂਲਰ ਸਮੇਂ 'ਚ ਗੋਲ ਨਹੀਂ ਦਾਗ ਸਕੀ, ਪਰ ਸਟੌਪੇਜ ਸਮੇਂ 'ਚ ਟੀਮ ਨੂੰ ਪੈਨਲਟੀ ਮਿਲੀ ਜਿਸ ਨੂੰ ਕਪਤਾਨ ਥੌਮਸ ਮੂਲਰ ਨੇ ਗੋਲ 'ਚ ਤਬਦੀਲ ਕਰ ਦਿੱਤਾ।
ਵ੍ਹਾਈਟਕੈਪਸ ਦੀ ਟੀਮ ਨੇ ਲਗਾਤਾਰ ਅਟੈਕ ਕਰਨ ਦਾ ਸਿਲਸਿਲਾ ਜਾਰੀ ਰੱਖਿਆ ਅਤੇ ਮੁਕਾਬਲੇ ਦੇ ਅੰਤਲੇ ਪਲਾਂ 'ਚ ਸਬੈਸਟੀਅਨ ਬਰਹਾਲਟਰ ਨੇ ਗੋਲ ਕਰ ਵ੍ਹਾਈਟਕੈਪਸ ਨੂੰ 3-2 ਨਾਲ ਜਿੱਤ ਹਾਸਿਲ ਕਰਵਾ ਦਿੱਤੀ।
ਇਸ ਦੇ ਨਾਲ ਵੈਨਕੂਵਰ ਵ੍ਹਾਈਟਕੈਪਸ ਦੀ ਟੀਮ ਹੁਣ ਲੀਗ 'ਚ 6 ਵਿੱਚੋਂ 5 ਮੁਕਾਬਲੇ ਜਿੱਤ ਚੁੱਕੀ ਹੈ। ਟੀਮ ਨੇ ਇਸੇ ਸੀਜਨ 'ਚ ਟਿੰਬਰਸ ਖਿਲਾਫ 7 ਮਾਰਚ ਨੂੰ ਹੋਏ ਮੁਕਾਬਲੇ 'ਚ 4-1 ਨਾਲ ਬਾਜੀ ਮਾਰੀ ਸੀ।
ਯਾਦ ਰਹੇ ਵੈਨਕੂਵਰ ਵ੍ਹਾਇਟਕੈਪਸ ਦੇ ਸਾਰੇ ਘਰੇਲੂ ਮੁਕਾਬਲਿਆਂ ਦਾ ਪੰਜਾਬੀ ਲਾਈਵ ਬ੍ਰੌਡਕਾਸਟ ਕਨੈਕਟ 91.5FM 'ਤੇ ਸੁਣਿਆ ਜਾ ਸਕਦਾ ਹੈ।
