ਵੈਨਕੂਵਰ ਦੇ ਡਾਊਨਟਾਊਨ ਈਸਟਸਾਈਡ 'ਚ ਕਥਿਤ ਛੁਰੇਬਾਜ਼ੀ ਮਾਮਲੇ ਵਿੱਚ ਮਹਿਲਾ ਉੱਤੇ ਲੱਗੇ ਦੋਸ਼

ਵੈਨਕੂਵਰ ਦੇ ਡਾਊਨਟਾਊਨ ਈਸਟਸਾਈਡ ਵਿਚ ਇੱਕ ਅਣਜਾਣ 'ਤੇ ਚਾਕੂ ਨਾਲ ਹਮਲਾ ਕਰਨ ਦੇ ਮਾਮਲੇ ਵਿਚ ਪੁਲਿਸ ਨੇ ਇੱਕ 29 ਸਾਲਾ ਮਹਿਲਾ ਨੂੰ ਗ੍ਰਿਫ਼ਤਾਰ ਕਰਕੇ ਵੱਖ-ਵੱਖ ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਹੈ। ਪੁਲਿਸ ਮੁਤਾਬਕ, ਇਹ ਮਹਿਲਾ ਪਹਿਲਾਂ ਹੀ ਹੋਰ ਮਾਮਲਿਆਂ ਵਿਚ ਵਾਂਟੇਡ ਚੱਲ ਰਹੀ ਸੀ। ਔਫੀਸਰ ਨੇ ਕਿਹਾ ਕਿ 18 ਜਨਵਰੀ ਨੂੰ ਤੜਕੇ ਲਗਭਗ 2:50 ਵਜੇ ਹੈਸਟਿੰਗਜ਼ ਅਤੇ ਐਬਟ ਸਟ੍ਰੀਟਸ ਨੇੜੇ ਗਸ਼ਤ ਕਰ ਰਹੇ ਇੱਕ ਪੁਲਿਸ ਅਧਿਕਾਰੀ ਨੂੰ ਕੁਝ ਲੋਕਾਂ ਨੇ ਰੋਕ ਕੇ ਜਾਣਕਾਰੀ ਦਿੱਤੀ ਸੀ ਕਿ ਉਨ੍ਹਾਂ ਦੇ ਦੋਸਤ 'ਤੇ ਇੱਕ ਅਣਪਛਾਤੀ ਮਹਿਲਾ ਨੇ ਹਮਲਾ ਕੀਤਾ ਹੈ। ਦੋਸ਼ ਹੈ ਕਿ ਉਸ ਨੇ ਚਾਕੂ ਨਾਲ 31 ਸਾਲਾ ਪੀੜਤ ਨੌਜਵਾਨ ਦੇ ਮੋਢੇ 'ਤੇ ਗੰਭੀਰ ਜ਼ਖ਼ਮ ਕਰ ਦਿੱਤੇ ਸਨ।

ਪੁਲਿਸ ਅਧਿਕਾਰੀ ਨੇ ਪਿੱਛਾ ਕਰਨ ਤੋਂ ਬਾਅਦ ਟੇਜ਼ਰ ਦੀ ਵਰਤੋਂ ਕਰਕੇ ਮੁਲਜ਼ਮ ਮਹਿਲਾ ਨੂੰ ਕਾਬੂ ਕੀਤਾ। ਹਿਰਾਸਤ ਵਿਚ ਲਈ ਗਈ ਮਹਿਲਾ ਦੀ ਪਛਾਣ ਹੀਥਰ ਪਿਟਸਾਨੁਕ ਵਜੋਂ ਹੋਈ। ਜਾਂਚ ਦੌਰਾਨ ਪਤਾ ਲੱਗਾ ਕਿ ਉਹ ਪੈਰੋਲ ਦੀਆਂ ਸ਼ਰਤਾਂ ਤੋੜਨ ਕਾਰਨ ਕੈਨੇਡਾ-ਵਾਈਡ ਵਾਰੰਟ 'ਤੇ ਲੋੜੀਂਦੀ ਸੀ ਅਤੇ ਪ੍ਰੋਬੇਸ਼ਨ ਹੁਕਮਾਂ ਦੀ ਉਲੰਘਣਾ ਲਈ ਉਹ ਬੀ.ਸੀ. ਵਿਚ ਵਾਂਟੇਡ ਐਲਾਨੀ ਗਈ ਸੀ।

ਪੁਲਿਸ ਨੇ ਕਿਹਾ ਕਿ ਪੀੜਤ ਵਿਅਕਤੀ ਨੂੰ ਹਸਪਤਾਲ ਵਿਚ ਇਲਾਜ ਤੋਂ ਬਾਅਦ ਛੁੱਟੀ ਮਿਲ ਗਈ ਹੈ ਅਤੇ ਉਹ ਹੁਣ ਘਰ ਵਿਚ ਠੀਕ ਹੋ ਰਿਹਾ ਹੈ। ਹੀਥਰ 'ਤੇ ਹਥਿਆਰ ਨਾਲ ਹਮਲਾ ਕਰਨ ਅਤੇ ਸਰੀਰਕ ਨੁਕਸਾਨ ਪਹੁੰਚਾਉਣ ਦੀਆਂ ਧਾਰਾਵਾਂ ਲਗਾਈਆਂ ਗਈਆਂ ਹਨ ਅਤੇ ਉਹ ਫਿਲਹਾਲ ਪੁਲਿਸ ਹਿਰਾਸਤ ਵਿਚ ਹੈ।