ਵੈਨਕੂਵਰ ਦੇ ਸਟੈਨਲੀ ਪਾਰਕ ਦੇ ਬਾਥਰੂਮ ਵਿੱਚ ਅਜਨਬੀ ਵਲੋਂ ਔਰਤ 'ਤੇ ਹਮਲਾ

ਵੈਨਕੂਵਰ ਦੇ ਸਟੈਨਲੀ ਪਾਰਕ ਵਿਚ ਇੱਕ ਔਰਤ 'ਤੇ ਬਾਥਰੂਮ ਵਿਚ ਅਜਨਬੀ ਵਲੋਂ ਹਮਲਾ ਕੀਤੇ ਜਾਣ ਦੀ ਖ਼ਬਰ ਸਾਹਮਣੇ ਆਈ ਹੈ। 35 ਸਾਲਾ ਸ਼ੱਕੀ ਇਸ ਮਾਮਲੇ ਵਿਚ ਕਈ ਦੋਸ਼ਾਂ ਦਾ ਸਾਹਮਣਾ ਕਰ ਰਿਹਾ ਹੈ। ਪੁਲਿਸ ਨੇ ਉਸ ਦੀ ਪਛਾਣ ਹਾਰਟਲੇ ਰੋਨਾਲਡ ਡਕਹੋਰਨ ਵਜੋਂ ਦੱਸੀ ਹੈ, ਜਿਸ 'ਤੇ ਗਲਾ ਘੁੱਟਣ, ਗੈਰ-ਕਾਨੂੰਨੀ ਤਰੀਕੇ ਨਾਲ ਬੰਧਕ ਬਣਾਉਣ, ਹਥਿਆਰਾਂ ਦੇ ਜ਼ੋਰ 'ਤੇ ਜਿਨਸੀ ਹਮਲਾ ਕਰਨ, ਲੁੱਟ-ਖੋਹ ਅਤੇ ਜਾਨੋਂ ਮਾਰਨ ਜਾਂ ਸਰੀਰਕ ਨੁਕਸਾਨ ਪਹੁੰਚਣ ਦੀ ਧਮਕੀ ਦੇ ਦੋਸ਼ ਲਗਾਏ ਗਏ ਹਨ।

ਵੈਨਕੂਵਰ ਪੁਲਿਸ ਨੇ ਮੰਗਲਵਾਰ ਨੂੰ ਇੱਕ ਬਿਆਨ ਵਿਚ ਕਿਹਾ ਕਿ ਉਨ੍ਹਾਂ ਨੂੰ ਲੌਂਗ ਵੀਕੈਂਡ ਦੇ ਆਖਰੀ ਦਿਨ ਸੋਮਵਾਰ ਨੂੰ ਸੈਕਿੰਡ ਬੀਚ ਪੂਲ ਨੇੜੇ ਔਰਤਾਂ ਦੇ ਚੇਜਿੰਗ ਰੂਮ ਵਿਚ ਇੱਕ ਸ਼ੱਕੀ ਆਦਮੀ ਦੇ ਦਾਖ਼ਲ ਹੋਣ ਦੀ ਰਿਪੋਰਟ ਮਿਲੀ। ਇਹ ਘਟਨਾ ਕੋਈ ਸਵੇਰੇ 11 ਵਜੇ ਦੇ ਆਸਪਾਸ ਵਾਪਰੀ।

ਪੁਲਿਸ ਨੇ ਕਿਹਾ ਕਿ ਜਦੋਂ ਅਧਿਕਾਰੀ ਮੌਕੇ 'ਤੇ ਪਹੁੰਚੇ ਤਾਂ ਉਨ੍ਹਾਂ ਨੂੰ ਇੱਕ 40 ਸਾਲਾ ਔਰਤ ਮਿਲੀ ਜਿਸ ਨੂੰ ਲੁੱਟਿਆ ਗਿਆ ਸੀ ਅਤੇ ਕੁੱਟਮਾਰ ਕੀਤੀ ਗਈ ਸੀ। ਪੁਲਿਸ ਨੇ ਦੱਸਿਆ ਕਿ ਪੀੜਤ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ। ਪੁਲਿਸ ਮੁਤਾਬਕ, ਸ਼ੱਕੀ ਜ਼ਮਾਨਤ ਦੀ ਸੁਣਵਾਈ ਤੱਕ ਹਿਰਾਸਤ ਵਿਚ ਹੈ।