News

ਵੈਨਕੂਵਰ ਇੰਟਰਨੈਸ਼ਨਲ ਏਅਰਪੋਰਟ ਤੋਂ ਇਸ ਸਾਲ 149 ਕਿਲੋ ਮੈਥਾਮਫੇਟਾਮਾਈਨ ਜ਼ਬਤ ਕੀਤਾ ਗਿਆ ਹੈ। ਕੈਨੇਡੀਅਨ ਬਾਰਡਰ ਏਜੰਟ ਮੁਤਾਬਕ ਇਹ ਨਸ਼ਾ ਯਾਤਰੀਆਂ ਦੇ ਸਾਮਾਨ ਦੀ ਤਲਾਸ਼ੀਆਂ ਦੌਰਾਨ ਫੜਿਆ ਗਿਆ,ਜਿਸ ਦੀ ਤਸਕਰੀ ਆਸਟ੍ਰੇਲੀਆ,ਨਿਊਜ਼ੀਲੈਂਡ ਅਤੇ ਹਾਂਗ ਕਾਂਗ ਵਿਚ ਕੀਤੀ ਜਾਣੀ ਸੀ। ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ ਨੇ ਕਿਹਾ ਕਿ ਉਸ ਦੇ ਅਨੁਮਾਨ ਮੁਤਾਬਕ,ਇਸ ਨਸ਼ੇ ਦੀ ਕੁੱਲ ਬਾਜ਼ਾਰ ਕੀਮਤ ਅੱਧਾ ਮਿਲੀਅਨ ਡਾਲਰ ਸੀ।

ਕੈਲਗਰੀ ਦੇ ਇਕ ਮਸਾਜ ਥੈਰੇਪਿਸਟ ਨੂੰ ਜਿਨਸੀ ਸ਼ੋਸ਼ਣ ਕਰਨ ਦੇ 3 ਹੋਰ ਦੋਸ਼ਾਂ ਲਈ ਚਾਰਜ ਕੀਤਾ ਗਿਆ ਹੈ। ਪੁਲਿਸ ਮੁਤਾਬਕ 46 ਸਾਲਾ ਡੋਨਲਡ ਪੈਟ੍ਰਿਕ ਹੈਰਿਸ ਪਹਿਲਾਂ ਵੀ ਅਜਿਹੇ ਮਾਮਲੇ ਵਿਚ ਜਨਵਰੀ ਮਹੀਨੇ ਚਾਰਜ ਕੀਤਾ ਗਿਆ ਸੀ। ਕੈਨਿਯਨ ਮੀਡੋਜ਼ ਡਰਾਈਵ ਸਾਊਥ ਈਸਟ ਵਿਚ ਉਹ ਪਾਰਕਵਿਊ ਮਸਾਜ ਅਤੇ ਵੈਲਨੈੱਸ ਵਿਚ ਕੰਮ ਕਰਦਾ ਸੀ ਅਤੇ ਇੱਥੇ ਉਸ ਨੇ ਕਈ ਔਰਤਾਂ ਨਾਲ ਮਸਾਜ ਦੇ ਬਹਾਨੇ ਅਸ਼ਲੀਲ ਹਰਕਤਾਂ ਕੀਤੀਆਂ। ਉਸ ਨੂੰ 11 ਮਾਰਚ ਨੂੰ ਚਾਰਜ ਕੀਤਾ ਗਿਆ ਸੀ।

ਪੰਜਾਬ ਦੇ ਲੁਧਿਆਣਾ ਪੱਛਮੀ ਵਿਧਾਨ ਸਭਾ ਹਲਕੇ ਦੀ ਜ਼ਿਮਨੀ ਚੋਣ ਮਈ ਵਿਚ ਹੋ ਸਕਦੀ ਹੈ। ਇਸ ਦੇ ਮੱਦੇਨਜ਼ਰ ਆਪ ਵਲੋਂ ਚੋਣ ਮੁਹਿੰਮ ਭਖਾ ਦਿੱਤੀ ਗਈ ਹੈ। ਜਾਣਕਾਰੀ ਮੁਤਾਬਕ, ਮੁੱਖ ਮੰਤਰੀ ਭਗਵੰਤ ਮਾਨ ਅਤੇ ਪਾਰਟੀ ਦੇ ਸੁਪਰੀਮੋ ਅਰਵਿੰਦ ਕੇਜਰੀਵਾਲ ਲੁਧਿਆਣਾ ਵਿਚ ਤਿੰਨ ਦਿਨ ਚੋਣ ਸਰਗਮੀਆਂ ਕਰਨ ਵਾਲੇ ਹਨ। ਉਨ੍ਹਾਂ ਦਾ ਇਹ ਦੌਰਾ ਭਲਕੇ ਤੋਂ ਸ਼ੁਰੂ ਹੋ ਰਿਹਾ ਹੈ।

ਕੈਨੇਡਾ ਵਿਚ ਜਾਰੀ ਹਾਊਸਿੰਗ ਸੰਕਟ ਵਿਚਕਾਰ ਲਿਬਰਲ ਲੀਡਰ ਮਾਰਕ ਕਾਰਨੀ ਨੇ ਸੱਤਾ ਵਿਚ ਵਾਪਸੀ 'ਤੇ ਹਰ ਸਾਲ ਕਰੀਬ 500,000 ਨਵੇਂ ਘਰ ਬਣਾਉਣ ਅਤੇ ਬਿਲਡ ਕੈਨੇਡਾ ਹੋਮ ਨਾਂ ਦੀ ਇੱਕ ਨਵੀਂ ਹਾਊਸਿੰਗ ਸੰਸਥਾ ਬਣਾਉਣ ਦੀ ਘੋਸ਼ਣਾ ਕੀਤੀ ਹੈ ਜੋ ਕੈਨੇਡਾ ਵਿਚ ਕਿਫਾਇਤੀ ਘਰਾਂ ਦੇ ਨਿਰਮਾਣ ਦੀ ਦੇਖ-ਰੇਖ ਕਰਨ ਵਾਲੇ ਡਿਵੈਲਪਰ ਦੇ ਰੂਪ ਵਿਚ ਕੰਮ ਕਰੇਗੀ।

ਸਰੀ ਵਿਚ ਪ੍ਰਾਪਰਟੀ ਅਤੇ ਰੋਡ ਟੈਕਸ ਵਿਚ ਵਾਧਾ ਹੋਣ ਜਾ ਰਿਹਾ ਹੈ। ਸਿਟੀ ਵਲੋਂ ਪ੍ਰਾਪਰਟੀ ਟੈਕਸ ਵਿਚ 2.8 ਫੀਸਦੀ ਵਾਧਾ ਕਰਨ ਅਤੇ ਰੋਡ ਲੇਵੀ ਇੱਕ ਫੀਸਦੀ ਵਧਾਉਣ ਦਾ ਵਿਚਾਰ ਹੈ। ਮੇਅਰ ਬ੍ਰੈਂਡਾ ਲੌਕ ਨੇ ਕਿਹਾ ਕਿ ਇਹ ਸ਼ਾਇਦ ਸਰੀ ਵਿਚ ਪ੍ਰਾਪਰਟੀ ਟੈਕਸ ਵਿਚ ਹੁਣ ਤੱਕ ਦਾ ਸਭ ਤੋਂ ਘੱਟ ਵਾਧਾ ਹੋਵੇਗਾ।

ਬ੍ਰਿਟਿਸ਼ ਕੋਲੰਬੀਆ ਸਰਕਾਰ ਖਪਤਕਾਰ ਕਾਰਬਨ ਟੈਕਸ ਨੂੰ ਖ਼ਤਮ ਕਰਨ ਜਾ ਰਹੀ ਹੈ। ਸੂਬੇ ਦੀ ਵਿੱਤ ਮੰਤਰੀ ਬ੍ਰੈਂਡਾ ਬੇਲੀ ਨੇ ਵਿਧਾਨ ਸਭਾ ਵਿਚ 17 ਸਾਲ ਪੁਰਾਣੇ ਕਾਰਬਨ ਟੈਕਸ ਨੂੰ ਲੋਕਾਂ ਲਈ ਖ਼ਤਮ ਕਰਨ ਸਬੰਧੀ ਬਿੱਲ ਪੇਸ਼ ਕਰ ਦਿੱਤਾ ਹੈ। ਉਥੇ ਹੀ, ਅਪ੍ਰੈਲ ਵਿਚ ਲੋਕਾਂ ਨੂੰ ਮਿਲਣ ਵਾਲੀ ਕਾਰਬਨ ਟੈਕਸ ਨਾਲ ਜੁੜੀ ਰਕਮ ਅੰਤਿਮ ਪੇਮੈਂਟ ਹੋਵੇਗੀ।

ਬ੍ਰਿਟਿਸ਼ ਕੋਲੰਬੀਆ ਵਾਸੀਆਂ ਨੂੰ 1 ਅਪ੍ਰੈਲ ਤੋਂ ਸੂਬੇ ਦੇ ਪੰਪਾਂ 'ਤੇ ਗੈਸ ਕੀਮਤਾਂ ਵਿਚ ਕਮੀ ਦੇਖਣ ਨੂੰ ਮਿਲ ਸਕਦੀ ਹੈ ਕਿਉਂਕਿ ਪ੍ਰੀਮੀਅਰ ਡੇਵਿਡ ਈਬੀ ਦੀ ਸਰਕਾਰ ਅੱਜ ਇੱਕ ਕਾਨੂੰਨ ਰਾਹੀਂ ਵਿਧਾਨ ਸਭਾ ਵਿਚ ਖਪਤਕਾਰ ਕਾਰਬਨ ਟੈਕਸ ਨੂੰ ਖ਼ਤਮ ਕਰਨ ਦੀ ਕੋਸ਼ਿਸ਼ ਕਰਨ ਜਾ ਰਹੀ ਹੈ।

ਮਿਆਂਮਾਰ ਵਿਚ ਸ਼ੁੱਕਰਵਾਰ ਨੂੰ ਆਏ ਸ਼ਕਤੀਸ਼ਾਲੀ ਭੂਚਾਲ ਤੋਂ ਬਾਅਦ ਦੇਸ਼ ਵਿਚ 2,000 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਗਈ ਹੈ। ਇਸ ਦੇ ਮੱਦੇਨਜ਼ਰ ਮਿਆਂਮਾਰ ਦੀ ਫੌਜੀ ਲੀਡਰਸ਼ਿਪ ਨੇ ਹਫ਼ਤੇ ਦੇ ਰਾਸ਼ਟਰੀ ਸੋਗ ਦਾ ਐਲਾਨ ਕੀਤਾ ਹੈ।

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਪੂੰਜੀ ਲਾਭ ਟੈਕਸ ਵਿਚ ਇੱਕ ਹੋਰ ਰਾਹਤ ਦੇਣ ਦੀ ਘੋਸ਼ਣਾ ਕੀਤੀ ਹੈ, ਇਸ ਨੂੰ ਉਨ੍ਹਾਂ ਕੈਨੇਡਾ ਫਸਟ ਰੀਇਨਵੈਸਟਮੈਂਟ ਟੈਕਸ ਕੱਟ ਨਾਮ ਦਿੱਤਾ ਹੈ। ਪੌਲੀਐਵ ਦਾ ਕਹਿਣਾ ਹੈ ਕਿ ਜੇ ਕੋਈ ਵੀ ਵਿਅਕਤੀ ਜਾਂ ਕਾਰੋਬਾਰ ਆਪਣੇ ਸੰਪਤੀ ਨੂੰ ਵੇਚ ਕੇ ਇਸ ਪ੍ਰੋਫਿਟ ਨੂੰ ਕੈਨੇਡਾ ਵਿਚ ਰੀਇਨਵੈਸਟ ਕਰੇਗਾ, ਉਸ ਨੂੰ ਕੋਈ ਪੂੰਜੀ ਲਾਭ ਟੈਕਸ ਨਹੀਂ ਦੇਣਾ ਪਵੇਗਾ।