27.76C Vancouver 27.76C VancouverApr 9, 2026 5:41 PM - Connect Newsroom - Jasmine Singh
ਬੀ. ਸੀ. ਦੀ ਕੰਬਾਈਡ ਫੋਰਸ ਸਪੈਸ਼ਲ ਇਨਫੋਰਸਮੈਂਟ ਯੂਨਿਟ ਨੇ ਸਰੀ ਵਿਚ ਇੱਕ 3D ਪ੍ਰਿੰਟਿਡ ਹਥਿਆਰ ਬਣਾਉਣ ਵਾਲੀ ਗੁਪਤ ਲੈਬ ਦਾ ਪਰਦਾਫਾਸ਼ ਕੀਤਾ ਹੈ। ਪੁਲਿਸ ਮੁਤਾਬਕ, ਇਹ ਇੱਕ ਘਰ ਵਿਚ ਚਲਾਈ ਜਾ ਰਹੀ ਸੀ, ਜਿੱਥੇ ਛਾਪੇਮਾਰੀ ਦੌਰਾਨ ਆਧੁਨਿਕ ਤਕਨੀਕ ਨਾਲ ਤਿਆਰ ਕੀਤੇ ਜਾ ਰਹੇ ਹਥਿਆਰ ਅਤੇ ਮਸ਼ੀਨਰੀ ਬਰਾਮਦ ਕੀਤੀ ਗਈ। ਇਹ ਜਾਂਚ ਮਾਰਚ 2026 ਵਿਚ ਸ਼ੁਰੂ ਹੋਈ।
ਮੁਲਜ਼ਮ 'ਤੇ 3D ਪ੍ਰਿੰਟਿਡ ਹਥਿਆਰ ਬਣਾਉਣ ਅਤੇ ਉਨ੍ਹਾਂ ਦੇ ਨਕਸ਼ੇ ਔਨਲਾਈਨ ਅਪਲੋਡ ਕਰਨ ਦਾ ਸ਼ੱਕ ਸੀ। 2 ਅਪ੍ਰੈਲ ਨੂੰ ਸਰਚ ਵਾਰੰਟ ਤਹਿਤ ਪੁਲਿਸ ਨੇ ਹਥਿਆਰ ਬਣਾਉਣ ਵਾਲੀ ਲੈਬ ਫੜੀ। ਮੌਕੇ ਤੋਂ ਇੱਕ ਲੋਡਿਡ 3D ਪ੍ਰਿੰਟਿਡ ਸੈਮੀ-ਆਟੋਮੈਟਿਕ ਰਾਈਫਲ, ਛੇ 3D ਪ੍ਰਿੰਟਿਡ ਹੈਂਡਗੰਨ, ਚਾਰ ਸਾਈਲੈਂਸਰ, ਤਿੰਨ 3D ਪ੍ਰਿੰਟਰ, ਕਈ 3D ਪ੍ਰਿੰਟਿਡ ਮੈਗਜ਼ੀਨ ਲੈਪਟੌਪ, ਸੈਲਫੋਨ ਅਤੇ ਹਥਿਆਰਾਂ ਦੀ ਟੈਸਟਿੰਗ ਲਈ ਬਣਾਇਆ ਇੱਕ ਸਟੇਸ਼ਨ ਜ਼ਬਤ ਕੀਤਾ।
CFSEU-BC ਦੀ ਮੀਡੀਆ ਰਿਲੇਸ਼ਨ ਔਫੀਸਰ ਸਾਰਜੈਂਟ ਸਰਬਜੀਤ ਕੌਰ ਸੰਘਾ ਨੇ ਕਿਹਾ ਕਿ 3D ਪ੍ਰਿੰਟਿਡ ਹਥਿਆਰ ਸਮਾਜ ਲਈ ਵੱਡਾ ਖਤਰਾ ਹਨ ਕਿਉਂਕਿ ਇਹਨਾਂ ਦਾ ਕੋਈ ਰਿਕਾਰਡ ਨਹੀਂ ਹੁੰਦਾ ਅਤੇ ਇਹਨਾਂ ਨੂੰ ਟਰੇਸ ਕਰਨਾ ਮੁਸ਼ਕਲ ਹੈ। ਪੁਲਿਸ ਅਨੁਸਾਰ, ਜਾਂਚ ਅਜੇ ਵੀ ਜਾਰੀ ਹੈ ਅਤੇ ਜਲਦ ਹੀ ਮੁਲਜ਼ਮ ਖਿਲਾਫ ਅਦਾਲਤ ਵਿਚ ਸਖ਼ਤ ਚਾਰਜਿਜ਼ ਲਗਾਉਣ ਦੀ ਸਿਫਾਰਸ਼ ਕੀਤੀ ਜਾਵੇਗੀ।
