11.23C Vancouver 11.23C VancouverApr 9, 2026 2:41 PM - Connect Newsroom - Jasmine Singh with files from The Canadian Press
ਪ੍ਰੀਮੀਅਰ ਡੇਵਿਡ ਈਬੀ ਨੇ ਇਨਡੀਜਨਸ ਲੀਡਰਸ ਨੂੰ ਚਿੱਠੀ ਲਿਖ ਕੇ DRIPA ਕਾਨੂੰਨ ਦੇ ਕੁਝ ਹਿੱਸਿਆਂ ਨੂੰ ਸਸਪੈਂਡ ਕਰਨ ਦੇ ਪ੍ਰਸਤਾਵਿਤ ਫੈਸਲੇ 'ਤੇ ਸਪੱਸ਼ਟੀਕਰਨ ਦਿੱਤਾ ਹੈ। ਚਿੱਠੀ ਵਿਚ ਈਬੀ ਨੇ ਕਿਹਾ ਕਿ ਇਹ ਫੈਸਲਾ ਫਸਟ ਨੇਸ਼ਨ ਦੇ ਹੱਕਾਂ ਨੂੰ ਖਤਮ ਕਰਨ ਲਈ ਨਹੀਂ ਬਲਕਿ ਜ਼ਮੀਨੀ ਵਰਤੋਂ ਅਤੇ ਸਰੋਤ ਮੈਨੇਜਮੈਂਟ ਵਿਚ ਪੈਦਾ ਹੋ ਰਹੀ ਕਾਨੂੰਨੀ ਅਨਿਸ਼ਚਿਤਤਾ ਨੂੰ ਦੂਰ ਕਰਨ ਲਈ ਲਿਆ ਗਿਆ ਹੈ।
ਪ੍ਰੀਮੀਅਰ ਈਬੀ ਇਹ ਪਹਿਲਾਂ ਹੀ ਤਰਕ ਦੇ ਚੁੱਕੇ ਹਨ ਕਿ ਕਿ ਕੁਝ ਨਿਯਮਾਂ ਕਾਰਨ ਮਾਈਨਿੰਗ ਵਰਗੇ ਖੇਤਰਾਂ ਵਿਚ ਨਿਵੇਸ਼ ਰੁਕ ਰਿਹਾ ਹੈ, ਜਿਸ ਨਾਲ ਸੂਬੇ ਦੀ ਆਰਥਿਕਤਾ 'ਤੇ ਅਸਰ ਪੈ ਸਕਦਾ ਹੈ। ਉਨ੍ਹਾਂ ਇਨਡੀਜਨਸ ਲੀਡਰਸ ਨੂੰ ਭਰੋਸਾ ਦਿਵਾਇਆ ਕਿ ਇਹ ਇੱਕ ਅਸਥਾਈ ਵਿਰਾਮ ਹੈ ਅਤੇ ਸਰਕਾਰ ਫਸਟ ਨੇਸ਼ਨ ਦੇ ਨਾਲ ਮਿਲ ਕੇ ਕੰਮ ਕਰਨ ਲਈ ਵਚਨਬੱਧ ਹੈ।
ਰਿਪੋਰਟ ਮੁਤਾਬਕ, ਸਰਕਾਰ ਜਿਨ੍ਹਾਂ ਸੈਕਸ਼ਨ ਨੂੰ ਸਸਪੈਂਡ ਕਰਨ ਦਾ ਵਿਚਾਰ ਕਰ ਰਹੀ ਹੈ ਉਨ੍ਹਾਂ ਵਿਚੋਂ ਇੱਕ ਧਾਰਾ 3 ਹੈ, ਜੋ ਇਸ ਗੱਲ ਲਈ ਪਾਬੰਦ ਕਰਦੀ ਹੈ ਕਿ ਸਰਕਾਰ ਕੋਈ ਵੀ ਨਵਾਂ ਕਾਨੂੰਨ ਇਕੱਲੇ ਨਹੀਂ ਬਣਾ ਸਕਦੀ, ਇਸ ਲਈ ਇਨਡੀਜਨਸ ਲੋਕਾਂ ਨਾਲ ਮਿਲ ਕੇ ਚੱਲਣਾ ਪੈਂਦਾ ਹੈ।
ਈਬੀ ਦਾ ਕਹਿਣਾ ਹੈ ਕਿ ਕੁਝ ਧਾਰਾਵਾਂ ਸਸਪੈਂਡ ਕਰਨ ਦਾ ਕਦਮ ਸਥਾਈ ਬਦਲਾਅ ਨਹੀਂ ਹੈ ਬਲਕਿ ਮਾਈਨਿੰਗ ਰੂਲਸ ਬਾਰੇ ਸੁਪਰੀਮ ਕੋਰਟ ਔਫ ਕੈਨੇਡਾ ਵੱਲੋਂ ਸਪੱਸ਼ਟ ਫੈਸਲਾ ਆਉਣ ਤੱਕ ਇੱਕ ਅਸਥਾਈ ਵਿਵਸਥਾ ਹੋਵੇਗੀ।
