ਐਲਬਰਟਾ ਵੱਖਵਾਦੀ ਸਮੂਹ ਕਨਫੈਡਰੇਸ਼ਨ ਛੱਡਣ 'ਤੇ ਜਨਮਤ ਸੰਗ੍ਰਹਿ ਲਈ ਦਾਇਰ ਕਰੇਗਾ ਪਟੀਸ਼ਨ

ਐਲਬਰਟਾ ਨੂੰ ਕੈਨੇਡਾ ਤੋਂ ਵੱਖ ਕਰਨ ਦੀ ਮੰਗ ਵਾਲੇ ਵੱਖਵਾਦੀਆਂ ਦਾ ਸਮੂਹ ਅੱਜ ਆਪਣੀ ਅਧਿਕਾਰਤ ਪਟੀਸ਼ਨ ਇਲੈਕਸ਼ਨ ਐਲਬਰਟਾ ਦੇ ਦਫ਼ਤਰ ਨੂੰ ਸੌਂਪਣ ਜਾ ਰਿਹਾ ਹੈ। ਇਸ ਪਟੀਸ਼ਨ ਰਾਹੀਂ ਪੂਰੇ ਸੂਬੇ ਵਿੱਚ ਆਜ਼ਾਦੀ ਦੇ ਮੁੱਦੇ 'ਤੇ ਰੈਫਰੈਂਡਮ ਕਰਵਾਉਣ ਦੀ ਮੰਗ ਕੀਤੀ ਗਈ ਹੈ। ਸਟੇਅ ਫ੍ਰੀ ਐਲਬਰਟਾ ਸਮੂਹ ਦੇ ਮੁਖੀ ਮਿਚ ਸਿਲਵੈਸਟਰ ਨੇ ਦੱਸਿਆ ਕਿ ਉਨ੍ਹਾਂ ਦੀ ਟੀਮ ਨੇ ਜਨਵਰੀ ਤੋਂ ਇਹ ਮੁਹਿੰਮ ਸ਼ੁਰੂ ਕੀਤੀ ਸੀ।

ਰੈਫਰੈਂਡਮ ਕਰਵਾਉਣ ਲਈ ਲਗਭਗ 178,000 ਦਸਤਖਤਾਂ ਦੀ ਲੋੜ ਸੀ, ਪਰ ਸਮੂਹ ਦਾ ਦਾਅਵਾ ਹੈ ਕਿ ਉਨ੍ਹਾਂ ਨੇ ਇਸ ਤੋਂ ਕਿਤੇ ਵੱਧ ਨਾਮ ਇਕੱਠੇ ਕਰ ਲਏ ਹਨ।ਜੇਕਰ ਇਲੈਕਸ਼ਨ ਐਲਬਰਟਾ ਇਨ੍ਹਾਂ ਦਸਤਖਤਾਂ ਦੀ ਪੁਸ਼ਟੀ ਕਰ ਦਿੰਦਾ ਹੈ, ਤਾਂ ਪ੍ਰੀਮੀਅਰ ਡੈਨੀਅਲ ਸਮਿਥ ਦੇ ਪੁਰਾਣੇ ਬਿਆਨ ਮੁਤਾਬਕ, ਅਕਤੂਬਰ ਦੇ ਸ਼ੁਰੂ ਵਿੱਚ ਪੂਰੇ ਸੂਬੇ ਵਿੱਚ ਵੋਟਿੰਗ ਹੋ ਸਕਦੀ ਹੈ।ਹਾਲਾਂਕਿ ਐਲਬਰਟਾ ਦੇ ਫਸਟ ਨੇਸ਼ਨ ਦੇ ਇੱਕ ਸਮੂਹ ਨੇ ਅਦਾਲਤ ਵਿੱਚ ਚੁਣੌਤੀ ਦਿੱਤੀ ਹੈ ਕਿ ਇਹ ਪਟੀਸ਼ਨ ਸੰਧੀ ਦੇ ਅਧਿਕਾਰਾਂ ਦੀ ਉਲੰਘਣਾ ਕਰਦੀ ਹੈ। ਐਡਮੰਟਨ ਦੇ ਜੱਜ ਵੱਲੋਂ ਇਸ ਹਫ਼ਤੇ ਇਸ 'ਤੇ ਫੈਸਲਾ ਸੁਣਾਏ ਜਾਣ ਦੀ ਉਮੀਦ ਹੈ।

ਇਸ ਦੇ ਇਲਾਵਾ ਸੈਂਚੁਰੀਅਨ ਪ੍ਰੋਜੈਕਟ ਨਾਮਕ ਇੱਕ ਹੋਰ ਵੱਖਵਾਦੀ ਸਮੂਹ 'ਤੇ ਲਗਭਗ 30 ਲੱਖ ਵੋਟਰਾਂ ਦੇ ਨਾਮ ਅਤੇ ਪਤੇ ਜਨਤਕ ਕਰਨ ਦੇ ਇਲਜ਼ਾਮ ਲੱਗੇ ਹਨ। ਇਲੈਕਸ਼ਨ ਐਲਬਰਟਾ ਇਸ ਮਾਮਲੇ ਦੀ ਜਾਂਚ ਕਰ ਰਿਹਾ ਹੈ ਅਤੇ ਇੱਕ ਅਦਾਲਤੀ ਹੁਕਮ ਰਾਹੀਂ ਉਨ੍ਹਾਂ ਦੀ ਐਪ ਨੂੰ ਵੀ ਬੰਦ ਕਰਵਾ ਦਿੱਤਾ ਗਿਆ ਹੈ।