ਐਲਬਰਟਾ ਦੇ ਯੂਸੀਪੀ ਵਿਧਾਇਕ ਸ਼ੇਨ ਗੇਟਸਨ ਨੇ ਦਿੱਤਾ ਅਸਤੀਫ਼ਾ

ਐਲਬਰਟਾ ਯੂਸੀਪੀ ਵਿਧਾਇਕ ਸ਼ੇਨ ਗੇਟਸਨ ਨੇ ਆਪਣੇ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਉਹ ਨਿੱਜੀ ਅਤੇ ਪਰਿਵਾਰਕ ਕਾਰਨਾਂ ਕਰਕੇ ਇਹ ਅਹੁਦਾ ਛੱਡ ਰਹੇ ਹਨ, ਹਾਲਾਂਕਿ ਉਨ੍ਹਾਂ ਨੇ ਇਸ ਬਾਰੇ ਕੋਈ ਵਿਸਤਾਰ ਨਾਲ ਜਾਣਕਾਰੀ ਨਹੀਂ ਦਿੱਤੀ।

ਗੇਟਸਨ 2019 ਤੋਂ ਐਡਮੰਟਨ ਦੇ ਨੌਰਥ ਵੈਸਟ ਵਿੱਚ ਸਥਿਤ ਮੁੱਖ ਤੌਰ 'ਤੇ ਪੇਂਡੂ ਹਲਕੇ "Lac. Ste. Anne-Parkland" ਦੀ ਨੁਮਾਇੰਦਗੀ ਕਰ ਰਹੇ ਸਨ। ਆਪਣੇ ਕਾਰਜਕਾਲ ਦੌਰਾਨ ਉਹ ਆਪਣੇ ਸਪੱਸ਼ਟ ਭਾਸ਼ਣਾਂ ਲਈ ਜਾਣੇ ਜਾਂਦੇ ਹਨ, ਜਿਨ੍ਹਾਂ ਕਾਰਨ ਸਿਆਸੀ ਵਿਰੋਧੀਆਂ ਵੱਲੋਂ ਉਨ੍ਹਾਂ ਦਾ ਅਕਸਰ ਵਿਰੋਧ ਕੀਤਾ ਜਾਂਦਾ ਸੀ।

ਗੌਰਤਲਬ ਹੈ ਕਿ 2025 ਵਿੱਚ ਉਨ੍ਹਾਂ ਨੇ ਟਰਾਂਸਜੈਂਡਰ ਸਰਜਰੀ ਨੂੰ ਲੈ ਕੇ ਗਲਤ ਬਿਆਨਬਾਜ਼ੀ ਕੀਤੀ ਸੀ, ਜਿਸ ਕਾਰਨ ਉਨ੍ਹਾਂ ਦਾ ਕਾਫੀ ਵਿਰੋਧ ਹੋਇਆ ਸੀ। 2022 ਵਿੱਚ ਉਨ੍ਹਾਂ ਨੇ ਕੋਵਿਡ-19 ਦੀਆਂ ਪਾਬੰਦੀਆਂ ਅਤੇ ਵੈਕਸੀਨ ਦੇ ਆਦੇਸ਼ਾਂ ਵਿਰੁੱਧ ਆਵਾਜ਼ ਚੁੱਕਦਿਆਂ ਟਰੱਕ ਟਰੈਕਟਰ convoy protesters ਦਾ ਸਮਰਥਨ ਕੀਤਾ ਸੀ। ਗੇਟਸਨ ਦੇ ਅਹੁਦਾ ਛੱਡਣ ਨਾਲ ਵਿਧਾਨ ਸਭਾ ਵਿੱਚ ਯੂਸੀਪੀ ਕੋਲ ਹੁਣ 46 ਸੀਟਾਂ ਰਹਿ ਗਈਆਂ ਹਨ, ਜਦਕਿ ਵਿਰੋਧੀ ਧਿਰ ਐਨ.ਡੀ.ਪੀ. ਕੋਲ 39 ਅਤੇ ਪ੍ਰੋਗਰੈਸਿਵ ਟੋਰੀਜ਼ ਕੋਲ 1 ਸੀਟ ਹੈ।