20.21C Vancouver 20.21C VancouverMar 10, 2021 1:53 PM -
ਭਾਰਤ ਦੇ ਗ੍ਰਹਿ ਮਹਿਕਮੇ ਵੱਲੋਂ ਅੱਜ ਬੁੱਧਵਾਰ ਨੂੰ ਦਿੱਲੀ ਦੇ ਬਾਰਡਰਾਂ 'ਤੇ ਕੀਤੀ ਸਖ਼ਤ ਬੈਰੀਕੇਡਿੰਗ ਬਾਰੇ ਸਫ਼ਾਈ ਪੇਸ਼ ਕਰਦਿਆਂ ਆਖਿਆ ਗਿਆ ਕਿ ਅਜਿਹਾ ਸਿਰਫ਼ 26 ਜਨਵਰੀ ਵਾਲੇ ਵਾਕਿਆ ਦੇ ਦੁਹਰਾਏ ਜਾਣ ਤੋਂ ਬਚਣ ਲਈ ਕੀਤਾ ਗਿਆ ਸੀ।
ਅੱਜ ਰਾਜ ਸਭਾ 'ਚ ਕੇਂਦਰੀ ਗ੍ਰਹਿ ਮਹਿਕਮੇ ਵੱਲੋਂ ਦਿੱਲੀ ਦੇ ਬਾਰਡਰਾਂ 'ਤੇ ਕੀਤੀ ਗਈ ਕੰਡਿਆਲੀ ਵਾੜ ਦਾ ਜਵਾਬ ਦਿੱਤਾ ਗਿਆ, ਜਿੱਥੇ ਕਿਸਾਨਾਂ ਦੇ ਧਰਨੇ ਦੀ ਥਾਂ 'ਤੇ ਸੜਕਾਂ ਪੁੱਟੀਆਂ ਗਈਆਂ ਸਨ।
ਗ੍ਰਹਿ ਮਹਿਕਮੇ ਨੇ ਆਖਿਆ ਕਿ 26 ਜਨਵਰੀ ਦੀ ਹਿੰਸਾ ਤੋਂ ਬਾਅਦ ਅਜਿਹੇ ਕਦਮ ਚੁੱਕੇ ਗਏ ਸਨ।
ਗ੍ਰਹਿ ਮਹਿਕਮੇ ਨੇ ਆਖਿਆ,"ਦਿੱਲੀ ਪੁਲਿਸ ਨੇ ਜਾਣਕਾਰੀ ਦਿੱਤੀ ਕਿ ਦਿੱਲੀ ਦੇ ਬਾਰਡਰਾਂ 'ਤੇ ਦਿੱਤੇ ਜਾ ਰਹੇ ਕਿਸਾਨੀ ਧਰਨੇ ਦੌਰਾਨ ਕੋਈ ਸੜਕ ਨਹੀਂ ਪੁੱਟੀ ਗਈ। ਹਾਲਾਂਕਿ 26.1.21 ਨੂੰ ਸਾਂਝੇ ਕਿਸਾਨ ਮੋਰਚੇ ਵੱਲੋਂ ਟ੍ਰੈਕਟਰ ਰੈਲੀ ਲਈ ਪਹਿਲਾਂ ਤੋਂ ਤੈਅ ਕੀਤੇ ਗਏ ਰੂਟ 'ਤੇ ਨਾ ਜਾ ਕੇ ਹੁਕਮ ਦੀ ਉਲੰਘਣਾ ਕਰਦਿਆਂ ਬੈਰੀਕੇਡ ਤੋੜੇ ਗਏ ਸਨ।"
ਸ਼ਹਿਰ ਦੇ ਦੂਜੇ ਬੈਰੀਕੇਡਾਂ 'ਤੇ ਰੋਕੇ ਜਾਣ ਦੇ ਬਾਵਜੂਦ ਉਹ ਕੇਂਦਰੀ ਦਿੱਲੀ ਵੱਲ ਗਏ ਅਤੇ ਉਨ੍ਹਾਂ ਬੈਰੀਕੇਡਾਂ ਨੂੰ ਵੀ ਤੋੜਿਆ।
ਗ੍ਰਹਿ ਮਹਿਕਮੇ ਨੇ ਆਖਿਆ,"ਇਸ ਸਭ ਨੂੰ ਵੇਖਦਿਆਂ, ਅਤੇ ਜਿਸ ਤਰੀਕੇ ਪ੍ਰਦਰਸ਼ਨਕਾਰੀ ਕਿਸਾਨਾਂ ਵੱਲੋਂ ਬੈਰੀਕੇਡ ਤੋੜਨ ਲਈ ਹਥਿਆਰ ਵਰਤੇ ਗਏ ਅਤੇ ਪੁਲਿਸ ਵਾਲਿਆਂ ਨੂੰ ਵੀ ਜ਼ਖਮੀ ਕੀਤਾ ਗਿਆ, ਦਿੱਲੀ ਦੇ ਬਾਰਡਰਾਂ 'ਤੇ 26 ਜਨਵਰੀ,21 ਨੂੰ ਕੀਤੇ ਗਏ ਵਤੀਰੇ ਨੂੰ ਦੁਹਰਾਏ ਜਾਣ ਤੋਂ ਬਚਾਉਣ ਲਈ ਹੀ ਸਖ਼ਤੀ ਕੀਤੀ ਗਈ ਸੀ।"
ਮਹਿਕਮੇ ਨੇ ਇਹ ਵੀ ਆਖਿਆ ਕਿ ਆਮ ਜਨਤਾ ਨੂੰ ਪ੍ਰਦਰਸ਼ਨਕਾਰੀਆਂ ਦੀਆਂ ਕਾਰਵਾਈਆਂ ਕਰਕੇ ਹੁੰਦੀਆਂ ਪ੍ਰੇਸ਼ਾਨੀਆਂ ਤੋਂ ਬਚਣ ਲਈ, ਲੋਕਾਂ ਨੂੰ ਦੂਜੇ ਰਾਹ ਦੱਸਣ ਲਈ, ਬਾਰਡਰਾਂ 'ਤੇ ਆਵਾਜਾਈ ਦੇ ਸਹੀ ਵਹਾਅ ਲਈ ਅਤੇ ਕਾਨੂੰਨ ਤੇ ਪ੍ਰਬੰਧ ਕਾਇਮ ਰੱਖਣ ਲਈ ਵੱਡੀ ਗਿਣਤੀ 'ਚ ਪੁਲਿਸ ਤਾਇਨਾਤ ਕੀਤੀ ਗਈ ਸੀ।
