10.94C Vancouver 10.94C VancouverOct 13, 2026 1:59 PM - Connect Newsroom - Jasmine Singh with files from The Canadian Press
ਕੈਨੇਡਾ ਦੇ ਅੰਤਰਰਾਸ਼ਟਰੀ ਵਪਾਰ ਮੰਤਰੀ ਮਨਿੰਦਰ ਸਿੱਧੂ 17 ਅਕਤੂਬਰ ਤੱਕ ਭਾਰਤ ਵਿਚ ਉੱਚ-ਪੱਧਰੀ ਟ੍ਰੇਡ ਮਿਸ਼ਨ 'ਤੇ ਹਨ। ਪਿਛਲੇ 30 ਸਾਲਾਂ ਵਿਚ ਔਟਵਾ ਵੱਲੋਂ ਭਾਰਤ ਭੇਜਿਆ ਗਿਆ ਇਹ ਹੁਣ ਤੱਕ ਦਾ ਸਭ ਤੋਂ ਵੱਡਾ ਵਪਾਰਕ ਵਫ਼ਦ ਹੈ, ਜਿਸ ਵਿਚ ਕਾਰੋਬਾਰ ਅਤੇ ਐਕਸਪੋਰਟ ਨਾਲ ਜੁੜੇ ਲਗਭਗ 300 ਪ੍ਰਤੀਨਿਧੀ ਸ਼ਾਮਲ ਹਨ।
ਇਸ ਦੌਰੇ ਦਾ ਉਦੇਸ਼ ਦੋਵਾਂ ਦੇਸ਼ਾਂ ਵਿਚਾਲੇ ਵਪਾਰ ਨੂੰ ਵਧਾਉਣਾ, ਨਿਵੇਸ਼ ਨੂੰ ਆਕਰਸ਼ਿਤ ਕਰਨਾ ਅਤੇ ਫ੍ਰੀ ਟ੍ਰੇਡ ਸਮਝੌਤੇ ਲਈ ਚੱਲ ਰਹੀ ਗੱਲਬਾਤ ਨੂੰ ਤੇਜ਼ੀ ਨਾਲ ਅੱਗੇ ਵਧਾਉਣਾ ਹੈ। ਕੈਨੇਡਾ ਨੇ ਸਾਲ 2030 ਤੱਕ ਭਾਰਤ ਨਾਲ ਸਲਾਨਾ ਵਪਾਰ ਨੂੰ $70 ਬਿਲੀਅਨ ਤੱਕ ਪਹੁੰਚਾਉਣ ਦਾ ਟੀਚਾ ਰੱਖਿਆ ਹੈ, ਜੋ ਇਸ ਸਮੇਂ $30 ਬਿਲੀਅਨ ਦਾ ਹੈ। ਸਿੱਧੂ ਮੁਤਾਬਕ, ਏਰੋਸਪੇਸ, ਸਾਫ਼-ਸੁਥਰੀਆਂ ਤਕਨੀਕਾਂ ਅਤੇ ਊਰਜਾ ਤਬਦੀਲੀ ਤੋਂ ਲੈ ਕੇ ਖੇਤੀ-ਭੋਜਨ ਤੱਕ ਕੈਨੇਡਾ ਕੋਲ ਭਾਰਤ ਤੋਂ ਬਿਜ਼ਨੈੱਸ ਹਾਸਲ ਕਰਨ ਦੇ ਅਥਾਹ ਮੌਕੇ ਹਨ।
ਉਨ੍ਹਾਂ ਮੁਤਾਬਕ, ਆਉਣ ਵਾਲੇ ਸਾਲਾਂ ਵਿਚ ਨਵੀਂ ਦਿੱਲੀ ਨੂੰ 2,000 ਤੋਂ ਵੱਧ ਹਵਾਈ ਜਹਾਜ਼ ਦੀ ਲੋੜ ਹੋਵੇਗੀ ਅਤੇ ਕੈਨੇਡਾ ਦਾ ਏਰੋਸਪੇਸ ਉਦਯੋਗ ਇਸ ਵਿਚ ਯੋਗਦਾਨ ਪਾ ਸਕਦਾ ਹੈ। ਇਸ ਦੇ ਨਾਲ ਹੀ ਉਹਨਾਂ ਜ਼ਿਕਰ ਕੀਤਾ ਕਿ ਭਾਰਤੀ ਕੰਪਨੀਆਂ ਕੈਨੇਡਾ ਨੂੰ ਚੁਣ ਰਹੀਆਂ ਹਨ ਅਤੇ ਸਾਡੇ ਦੇਸ਼ ਵਿਚ ਲਗਭਗ 36,000 ਨੌਕਰੀਆਂ ਪੈਦਾ ਕਰ ਚੁੱਕੀਆਂ ਹਨ।
