ਡੈਲਟਾ ’ਚ ਪਿਕਅੱਪ ਟਰੱਕ ਤੇ ਟ੍ਰਾਂਜ਼ਿਟ ਬੱਸ ਦੀ ਆਹਮੋ-ਸਾਹਮਣੇ ਟੱਕਰ

ਡੈਲਟਾ ਵਿਚ ਇੱਕ ਪਿਕਅੱਪ ਟਰੱਕ ਅਤੇ ਬੱਸ ਵਿਚਾਲੇ ਆਹਮੋ-ਸਾਹਮਣੇ ਟੱਕਰ ਹੋਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਪੁਲਿਸ ਮੁਤਾਬਕ, ਇਹ ਹਾਦਸਾ ਐਤਵਾਰ ਰਾਤ 92ਏ ਐਵੇਨਿਊ ਨੇੜੇ 120th ਸਟ੍ਰੀਟ 'ਤੇ ਵਾਪਰਿਆ। ਰਿਪੋਰਟਸ ਮੁਤਾਬਕ, ਨੌਰਥ ਵੱਲ ਜਾ ਰਿਹਾ ਫੋਰਡ ਪਿਕਅੱਪ ਟਰੱਕ ਪਹਿਲਾਂ ਉਸਾਰੀ ਸੰਬੰਧੀ ਚੇਤਾਵਨੀ ਚਿੰਨ੍ਹ ਨਾਲ ਟਕਰਾਇਆ, ਜਿਸ ਤੋਂ ਬਾਅਦ ਬੇਕਾਬੂ ਹੋ ਕੇ ਇਹ ਸਾਊਥ ਬਾਊਂਡ ਲੇਨ ਵਿਚ ਜਾ ਵੜਿਆ, ਜਿੱਥੇ ਕਈ ਹੋਰ ਗੱਡੀਆਂ ਨਾਲ ਟਕਰਾਉਣ ਤੋਂ ਬਚਦੇ ਹੋਏ ਇਸ ਨੇ ਸਾਹਮਣੇ ਤੋਂ ਆ ਰਹੀ ਟ੍ਰਾਂਜ਼ਿਟ ਬੱਸ ਨੂੰ ਟੱਕਰ ਮਾਰ ਦਿੱਤੀ।

ਬੀ.ਸੀ. ਐਮਰਜੈਂਸੀ ਹੈਲਥ ਸਰਵਿਸ ਅਨੁਸਾਰ, ਇਹ ਘਟਨਾ ਰਾਤ ਦੇ ਲਗਭਗ 9 ਵਜੇ ਵਾਪਰੀ, ਜਿੱਥੇ ਪੈਰਾਮੈਡਿਕਸ ਨੇ ਇੱਕ ਵਿਅਕਤੀ ਨੂੰ ਸਥਿਰ ਹਾਲਤ ਵਿਚ ਹਸਪਤਾਲ ਲਿਜਾਣ ਤੋਂ ਪਹਿਲਾਂ ਮੈਡੀਕਲ ਸਹਾਇਤਾ ਪ੍ਰਦਾਨ ਕੀਤੀ। ਡੈਲਟਾ ਪੁਲਿਸ ਡਿਪਾਰਟਮੈਂਟ ਮੁਤਾਬਕ, ਇਸ ਘਟਨਾ ਦੀ ਜਾਂਚ ਮੈਟਰੋ ਵੈਨਕੂਵਰ ਟ੍ਰਾਂਜ਼ਿਟ ਪੁਲਿਸ ਵਲੋਂ ਆਪਣੇ ਹੱਥਾਂ ਵਿਚ ਲਈ ਗਈ ਹੈ।