ਤੁਰਕੀ ਦੌਰੇ ’ਤੇ ਜਾਣਗੇ ਮਾਰਕ ਕਾਰਨੀ, ਵਪਾਰ ਤੇ ਡਿਫੈਂਸ ਸਾਂਝੇਦਾਰੀ ਮਜ਼ਬੂਤ ਕਰਨ ’ਤੇ ਰਹੇਗਾ ਫੋਕਸ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ 21 ਤੋਂ 23 ਅਕਤੂਬਰ ਤੱਕ ਤੁਰਕੀ ਦੇ ਦੌਰੇ 'ਤੇ ਜਾਣ ਦਾ ਐਲਾਨ ਕੀਤਾ ਹੈ, ਜਿਸ ਦਾ ਉਦੇਸ਼ ਦੋਵਾਂ ਦੇਸ਼ਾਂ ਵਿਚਾਲੇ ਵਪਾਰ, ਨਿਵੇਸ਼, ਐਨਰਜੀ ਅਤੇ ਡਿਫੈਂਸ ਵਿਚ ਸਾਂਝੇਦਾਰੀ ਨੂੰ ਹੋਰ ਮਜ਼ਬੂਤ ਕਰਨਾ ਹੈ।ਪ੍ਰਧਾਨ ਮੰਤਰੀ ਦਫ਼ਤਰ ਵੱਲੋਂ ਜਾਰੀ ਬਿਆਨ ਅਨੁਸਾਰ, ਕਿਸੇ ਕੈਨੇਡੀਅਨ ਪ੍ਰਧਾਨ ਮੰਤਰੀ ਵੱਲੋਂ ਤੁਰਕੀ ਦਾ ਇਹ ਪਹਿਲਾ ਦੁਵੱਲਾ ਦੌਰਾ ਹੋਵੇਗਾ।

ਆਪਣੇ ਇਸ ਦੌਰੇ ਦੌਰਾਨ ਕਾਰਨੀ ਅੰਕਾਰਾ ਵਿਖੇ ਤੁਰਕੀ ਦੇ ਰਾਸ਼ਟਰਪਤੀ Recep Tayyip Erdoğan ਨਾਲ ਮੁਲਾਕਾਤ ਕਰਨਗੇ, ਜਿਸ ਦੌਰਾਨ ਫ੍ਰੀ ਟਰੇਡ ਐਗਰੀਮੈਂਟ 'ਤੇ ਚਰਚਾ ਹੋਵੇਗੀ। ਇਸ ਤੋਂ ਇਲਾਵਾ ਉਹ ਇਸਤਾਂਬੁਲ ਵਿਚ ਕਾਰੋਬਾਰੀਆਂ ਅਤੇ ਨਿਵੇਸ਼ਕਾਂ ਨਾਲ ਵੀ ਇੱਕ ਬੈਠਕ ਕਰਨਗੇ।

ਗੌਰਤਲਬ ਹੈ ਕਿ ਅਗਸਤ ਮਹੀਨੇ ਵਿਚ ਅਮਰੀਕਾ ਨਾਲ ਵਪਾਰਕ ਗੱਲਬਾਤ ਟੁੱਟਣ ਤੋਂ ਬਾਅਦ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਕੈਨੇਡਾ ਦੀ ਅਮਰੀਕੀ ਬਾਜ਼ਾਰ 'ਤੇ ਨਿਰਭਰਤਾ ਘਟਾਉਣ ਅਤੇ ਆਪਣੇ ਵਪਾਰਕ ਸਬੰਧਾਂ ਨੂੰ ਹੋਰਨਾਂ ਦੇਸ਼ਾਂ ਨਾਲ ਜੋੜਨ ਨੀਤੀ ਤਹਿਤ ਇਹ ਅਹਿਮ ਦੌਰਾ ਕਰ ਰਹੇ ਹਨ। ਕੈਨੇਡਾ ਅਤੇ ਤੁਰਕੀ ਨੈਟੋ ਦੇ ਭਾਈਵਾਲ ਮੁਲਕ ਹਨ ਅਤੇ ਦੋਹਾਂ ਦੇ ਡਿਪਲੋਮੈਟਿਕ ਸਬੰਧ 1944 ਤੋਂ ਚੱਲੇ ਆ ਰਹੇ ਹਨ।