9.77C Vancouver 9.77C VancouverMay 12, 2020 5:39 PM -
ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਮੰਗਲਵਾਰ ਨੂੰ ਇਹ ਐਲਾਨ ਕੀਤਾ ਕਿ ਕਰੋਨਾਵਾਇਰਸ ਦੇ ਸਬੰਧ ਵਿੱਚ ਸਹਿਯੋਗ ਪ੍ਰਦਾਨ ਕਰਨ ਲਈ ਸਰਕਾਰ $260 ਬਿਲੀਅਨ ਦਾ ਰਾਹਤ ਪੈਕੇਜ ਉਪਲੱਬਧ ਕਰਵਾਉਣ ਜਾ ਰਹੀ ਹੈ ਤਾਂ ਕਿ ਦੇਸ਼ ਨੂੰ ਸਵੈ-ਨਿਰਭਰ ਬਣਾਇਆ ਜਾ ਸਕੇ।
ਇਹ ਐਲਾਨ ਮੋਦੀ ਨੇ ਟੈਲੀਵਿਜ਼ਨ 'ਤੇ ਪ੍ਰਸਾਰਤ ਕੀਤੇ ਜਾ ਰਹੇ ਆਪਣੇ ਭਾਸ਼ਣ ਦੌਰਾਨ ਕੀਤਾ ਅਤੇ ਕਿਹਾ ਕਿ ਇਸ ਪੈਕੇਜ ਦਾ ਮੁੱਖ ਮਕਸਦ ਦੇਸ਼ ਨੂੰ ਅੰਤਰਰਾਸ਼ਟਰੀ ਪੱਧਰ 'ਤੇ ਬਰਾਬਰਤਾ ਦਾ ਦਰਜਾ ਦੇਣ ਵਿੱਚ ਮਦਦ ਕਰਨਾ ਹੈ।
ਭਾਰਤ ਵਿੱਚ ਪਿਛਲੇ ਛੇ ਹਫਤਿਆਂ ਤੋਂ ਲੌਕਡਾਊਨ ਚੱਲ ਰਿਹਾ ਹੈ ਜਿਸ ਕਾਰਣ ਪਹਿਲਾਂ ਤੋਂ ਹੀ ਕਮਜ਼ੋਰ ਆਰਥਿਕਤਾ ਉੱਤੇ ਡੂੰਘਾ ਪ੍ਰਭਾਵ ਪਿਆ ਹੈ।
25 ਮਾਰਚ ਨੂੰ ਸ਼ੁਰੂ ਹੋਏ ਇਸ ਲੌਕਡਾਊਨ ਸਦਕਾ ਵੱਡੀ ਗਿਣਤੀ ਵਿੱਚ ਮਜ਼ਦੂਰਾਂ ਨੂੰ ਸ਼ਹਿਰਾਂ ਨੂੰ ਛੱਡ ਕੇ ਆਪਣੇ ਜੱਦੀ ਘਰਾਂ ਵੱਲ ਨੂੰ ਰੁਖ਼ ਕਰਨਾ ਪਿਆ ਹੈ।
ਅਰਥਸ਼ਾਸਤਰੀਆਂ ਮੁਤਾਬਕ ਇਸ ਹਫਤੇ ਬੇਰੁਜ਼ਗਾਰੀ ਦੀ ਦਰ 24.7 ਫੀਸਦੀ ਪਹੁੰਚ ਗਈ ਹੈ।
ਪਿਛਲੇ ਹਫਤੇ ਉਤਪਾਦਨ ਅਤੇ ਸੈੱਲਫ਼ ਇੰਪਲਾਇਮੈਂਟ ਉੱਤੇ ਲੱਗੀਆਂ ਪਾਬੰਦੀਆਂ ਨੂੰ ਥੋੜ੍ਹੀ ਢਿੱਲ ਦਿੱਤੀ ਗਈ ਸੀ।
ਜਿੱਥੇ ਸਮਾਜਿਕ ਦੂਰੀ ਨਾਲ ਸੰਬੰਧਤ ਨਿਰਦੇਸ਼ ਹਾਲੇ ਵੀ ਲਾਗੂ ਹਨ ਉੱਥੇ ਹੀ ਮੰਗਲਵਾਰ ਤੋਂ ਨਵੀਂ ਦਿੱਲੀ ਅਤੇ ਮੁੰਬਈ ਵਿੱਚ ਯਾਤਰੀ ਰੇਲ ਸੇਵਾ ਆਮ ਵਾਂਗ ਸ਼ੁਰੂ ਕਰਨ ਦੀ ਮਨਜ਼ੂਰੀ ਦੇ ਦਿੱਤੀ ਗਈ ਹੈ।
ਮੋਦੀ ਮੁਤਾਬਕ ਲੌਕਡਾਊਨ ਦਾ ਮੌਜੂਦਾ ਪੜਾਅ 18 ਮਈ ਨੂੰ ਖਤਮ ਹੋਵੇਗਾ ਜਿਸ ਤੋਂ ਬਾਅਦ ਨਵੇਂ ਪੜਾਅ ਦੀ ਸ਼ੁਰੂਆਤ ਕੀਤੀ ਜਾਵੇਗੀ।
ਮੋਦੀ ਨੇ ਕਿਹਾ ਕਿ, "ਕਰੋਨਾਵਾਇਰਸ ਲੰਬੇ ਸਮੇਂ ਤੱਕ ਆਪਣੀ ਜ਼ਿੰਦਗੀ ਦਾ ਹਿੱਸਾ ਰਹੇਗਾ ਪਰ ਆਪਣੀ ਰੋਜ਼ਮਰਾ ਜ਼ਿੰਦਗੀ ਇਸ ਦੇ ਆਲੇ ਦੁਆਲੇ ਨਹੀਂ ਘੁੰਮ ਸਕਦੀ।"
ਉਨ੍ਹਾਂ ਇੱਕ ਵਾਰ ਫਿਰ ਵਾਅਦਾ ਕੀਤਾ ਕਿ ਇਹ ਸਦੀ ਭਾਰਤ ਦੀ ਹੈ ਅਤੇ ਦੇਸ਼ ਲਗਾਤਾਰ ਕਰੋਨਾਵਾਇਰਸ ਨਾਲ ਨਜਿੱਠਣ ਲਈ ਪਰਸਨਲ ਪ੍ਰੋਟੈਕਟਿਵ ਇਕਵਿਪਮੈਂਟ, ਵੈਂਟੀਲੇਟਰ ਅਤੇ ਬਾਕੀ ਸਪਲਾਈਆਂ ਤਿਆਰ ਕਰ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ, "ਇਸ ਸੰਕਟ ਨੇ ਭਾਰਤ ਨੂੰ ਸਵੈ ਨਿਰਭਰ ਹੋਣ ਦੀ ਅਹਿਮੀਅਤ ਨਾਲ ਵਾਕਫ਼ ਕਰਾਇਆ ਹੈ।"
