ਦੱਖਣੀ ਐਲਬਰਟਾ ਦੇ ਤਿੰਨ ਜੂਨੀਅਰ ਹਾਕੀ ਖਿਡਾਰੀਆਂ ਦੀ ਸੜਕ ਹਾਦਸੇ ਵਿੱਚ ਮੌਤ

ਐਲਬਰਟਾ ਦੇ ਸਟੈਵਲੀ ਵਿਚ ਵਾਪਰੇ ਸੜਕ ਹਾਦਸੇ ਵਿਚ ਦੱਖਣੀ ਐਲਬਰਟਾ ਮਸਟੈਂਗਸ ਜੂਨੀਅਰ ਹਾਕੀ ਟੀਮ ਦੇ ਤਿੰਨ ਟੀਨੇਜ਼ਰ ਖਿਡਾਰੀਆਂ ਦੀ ਮੌਤ ਹੋ ਗਈ। ਆਰ.ਸੀ.ਐਮ.ਪੀ. ਅਨੁਸਾਰ ਸੋਮਵਾਰ ਸਵੇਰੇ ਕਰੀਬ 11 ਵਜੇ ਹਾਈਵੇਅ 2 ਅਤੇ 55 ਐਵੇਨਿਊ ਦੇ ਇੰਟਰਸੈਕਸ਼ਨ 'ਤੇ ਬੱਜਰੀ ਨਾਲ ਲੱਦੇ ਹੋਏ ਸੈਮੀ-ਟਰੱਕ ਅਤੇ ਕਾਰ ਵਿਚਕਾਰ ਟੱਕਰ ਹੋਈ।

ਕਾਰ ਵਿੱਚ ਸਵਾਰ ਤਿੰਨੋਂ ਖਿਡਾਰੀਆਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ, ਜਦਕਿ 40 ਸਾਲਾ ਟਰੱਕ ਡਰਾਈਵਰ ਨੂੰ ਹਲਕੀਆਂ ਸੱਟਾਂ ਲੱਗੀਆਂ ।ਉਸ ਸਮੇਂ ਖਿਡਾਰੀ ਪ੍ਰੈਕਟਿਸ ਲਈ ਜਾ ਰਹੇ ਸਨ। ਇਨ੍ਹਾਂ ਵਿੱਚੋਂ ਦੋ 18 ਸਾਲਾ ਖਿਡਾਰੀ ਬੀ.ਸੀ. ਦੇ ਕੈਮਲੂਪਸ ਦੇ ਰਹਿਣ ਵਾਲੇ ਸਨ, ਜਿਨ੍ਹਾਂ ਦੀ ਪਛਾਣ ਜੇਜੇ ਰਾਈਟ ਅਤੇ ਕੈਮਰਨ ਕੈਸਰਸੋ ਵਜੋਂ ਹੋਈ ਹੈ ਅਤੇ ਤੀਜਾ ਅਮਰੀਕਾ ਦੇ ਬਰਮਿੰਘਮ ਦਾ ਰਹਿਣ ਵਾਲਾ 17 ਸਾਲਾ ਕੈਡੇਨ ਫਾਈਨ ਸੀ।

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਅਤੇ ਕੈਨੇਡਾ ਦੇ ਕਈ ਹੋਰ ਆਗੂਆਂ ਨੇ ਇਸ ਘਟਨਾ 'ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ। ਸਥਾਨਕ ਅਰੇਨਾ ਵਿੱਚ ਖਿਡਾਰੀਆਂ ਦੀਆਂ ਜਰਸੀਆਂ ਅਤੇ ਹਾਕੀ ਸਟਿੱਕ ਰੱਖ ਕੇ ਉਨ੍ਹਾਂ ਨੂੰ ਸ਼ਰਧਾਂਜਲੀ ਦਿੱਤੀ ਗਈ। ਦੱਸ ਦੇਈਏ ਕਿ ਸਟੈਵਲੀ ਕੈਲਗਰੀ ਤੋਂ ਕਰੀਬ 85 ਕਿਲੋਮੀਟਰ ਦੂਰ ਹੈ।