15.38C Vancouver 15.38C VancouverJul 1, 2021 11:19 PM -
ਬੀਤੇ ਕੁਝ ਦਿਨਾਂ 'ਚ ਰਿਕਾਰਡਤੋੜ ਤਾਪਮਾਨ ਕਾਰਨ ਸੁਰਖੀਆਂ 'ਚ ਰਹਿਣ ਵਾਲਾ ਬੀ.ਸੀ. ਦਾ ਪਿੰਡ ਲਿਟਨ, ਅੱਜ ਫਿਰ ਖਬਰਾਂ ਦੀਆਂ ਸੁਰਖੀਆਂ 'ਚ ਹੈ।
ਇਸ ਪਿੰਡ ਤਕ ਪਹੁੰਚੀ ਵਾਈਲਡਫਾਇਰ ਨੇ ਕਰੀਬ 90% ਇਲਾਕੇ ਨੂੰ ਨਸ਼ਟ ਕਰ ਦਿੱਤਾ ਹੈ।
ਇਸ ਇਲਾਕੇ ਤਕ ਸਟ੍ਰਕਚਰਲ ਨੁਕਸਾਨ ਦੇ ਬਚਾਅ ਲਈ ਸੂਬੇ ਵੱਲੋਂ ਮਦਦ ਭੇਜੀ ਗਈ ਸੀ ਪਰ ਸੂਬੇ ਦੇ ਸੌਲੀਸਿਟਰ ਜਨਰਲ ਅਤੇ ਪਬਲਿਕ ਸੇਫਟੀ ਮੰਤਰੀ ਮਾਈਕ ਫਾਰਨਵਰਥ ਨੇ ਕਿਹਾ ਕਿ ਦੁੱਖ ਨਾਲ ਸੂਚਿਤ ਕੀਤਾ ਜਾ ਰਿਹਾ ਹੈ ਕਿ ਇਸ ਟਾਊਨ ਦੇ ਬਹੁਤੇ ਘਰ, ਕਈ ਸਟ੍ਰਕਚਰ, ਅਤੇ ਐਂਬੂਲੈਂਸ ਸਟੇਸ਼ਨ ਅਤੇ ਆਰ.ਸੀ.ਐਮ.ਪੀ. ਡਿਟੈਚਮੈਂਟ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ ਅਤੇ ਇਹ ਨਸ਼ਟ ਹੋ ਗਏ ਹਨ।
ਉਨ੍ਹਾਂ ਕਿਹਾ ਕਿ ਪਿੰਡ ਦੇ ਸਾਰੇ ਲੋਕ ਘਰਾਂ ਨੂੰ ਛੱਡ ਕੇ ਜਾਨ ਬਚਾ ਕੇ ਨਿਕਲੇ ਹਨ ਪਰ ਉਨ੍ਹਾਂ ਨੂੰ ਸੂਚਿਤ ਕੀਤਾ ਗਿਆ ਹੈ ਕਿ ਕਿਸੇ ਵੀ ਮਦਦ ਦੀ ਲੋੜ ਹੈ ਤਾਂ ਸੰਪਰਕ ਕੀਤਾ ਜਾਵੇ ਤਾਂ ਜੋ ਪੁਖਤਾ ਕੀਤਾ ਜਾ ਸਕੇ ਕਿ ਉਹ ਸੁਰੱਖਿਅਤ ਹਨ।
ਇਸ ਇਲਾਕੇ 'ਚ ਕਰੀਬ 250 ਲੋਕ ਰਹਿੰਦੇ ਸਨ।
ਲੋਕ ਘਰ ਅਤੇ ਪ੍ਰਾਪਰਟੀਆਂ ਛੱਡ ਕੇ ਜੋ ਹੋ ਸਕਿਆ ਜਰੂਰੀ ਸਾਮਾਨ ਇਕੱਠਾ ਕਰ ਕੇ ਟਾਊਨ ਤੋਂ ਨਿਕਲ ਗਏ।
ਕਿਸੇ ਦੇ ਜਖਮੀ ਹੋਣ ਦੀ ਕੋਈ ਜਾਣਕਾਰੀ ਨਹੀਂ ਦਿੱਤੀ ਗਈ ਹੈ।
