16.85C Vancouver 16.85C VancouverJul 17, 2026 2:00 PM - Connect Newsroom - Ramandeep Kaur
ਐਲਬਰਟਾ ਐਨ.ਡੀ.ਪੀ. ਦੇ ਲੀਡਰ ਨਾਹੀਦ ਨੈਨਸ਼ੀ ਨੇ ਐਲਾਨ ਕੀਤਾ ਹੈ ਕਿ ਉਹ ਅਗਲੀ ਪ੍ਰੋਵਿੰਸ਼ੀਅਲ ਚੋਣ ਵਿੱਚ ਐਡਮਿੰਟਨ ਦੀ ਆਪਣੀ ਮੌਜੂਦਾ ਸੀਟ ਤੋਂ ਚੋਣ ਨਹੀਂ ਲੜਨਗੇ, ਬਲਕਿ ਉਸ ਦੀ ਜਗ੍ਹਾ ਕੈਲਗਰੀ ਦੀ ਕਿਸੇ ਸੀਟ ਤੋਂ ਚੋਣ ਮੈਦਾਨ ਵਿੱਚ ਉਤਰਨਗੇ। ਨੈਨਸ਼ੀ ਨੇ ਵੀਰਵਾਰ ਨੂੰ ਸੋਸ਼ਲ ਮੀਡੀਆ 'ਤੇ ਇੱਕ ਪੋਸਟ ਰਾਹੀਂ ਇਸ ਫੈਸਲੇ ਦੀ ਜਾਣਕਾਰੀ ਸਾਂਝੀ ਕੀਤੀ।
ਉਨ੍ਹਾਂ ਕਿਹਾ ਕਿ ਉਹ ਅਗਲੇ ਸਾਲ ਹੋਣ ਵਾਲੀਆਂ ਚੋਣਾਂ ਵਿੱਚ ਉਸ ਸ਼ਹਿਰ ਦੀ ਪ੍ਰਤੀਨਿਧਤਾ ਕਰਨਗੇ ਜਿੱਥੇ ਉਹ ਪਲ ਕੇ ਵੱਡੇ ਹੋਏ ਅਤੇ ਜਿੱਥੇ ਉਨ੍ਹਾਂ ਨੇ 11 ਸਾਲ ਬਤੌਰ ਮੇਅਰ ਸੇਵਾ ਨਿਭਾਈ ਹੈ। ਹਾਲਾਂਕਿ, ਉਨ੍ਹਾਂ ਨੇ ਅਜੇ ਤੱਕ ਇਹ ਸਪੱਸ਼ਟ ਨਹੀਂ ਕੀਤਾ ਕਿ ਉਹ ਕੈਲਗਰੀ ਦੇ ਕਿਹੜੀ ਰਾਈਡਿੰਗ ਤੋਂ ਚੋਣ ਲੜਨਗੇ। ਇਸ ਮਹੀਨੇ ਦੇ ਸ਼ੁਰੂ ਵਿੱਚ, ਐਨ.ਡੀ.ਪੀ. ਦੇ ਚਾਰ ਪੁਰਾਣੇ ਮੈਂਬਰਾਂ ਨੇ 2027 ਵਿੱਚ ਮੁੜ ਚੋਣ ਨਾ ਲੜਨ ਦਾ ਖੁਲਾਸਾ ਕੀਤਾ ਸੀ, ਜਿਨ੍ਹਾਂ ਵਿੱਚ Calgary-Buffalo ਦੇ MLA Joe Ceci ਵੀ ਸ਼ਾਮਲ ਹਨ।
ਨੈਨਸ਼ੀ ਨੇ ਜੂਨ 2025 ਦੀ ਜ਼ਿਮਨੀ ਚੋਣ ਵਿੱਚ ਐਡਮਿੰਟਨ-ਸਟ੍ਰੈਥਕੋਨਾ ਸੀਟ ਤੋਂ ਜਿੱਤ ਹਾਸਲ ਕੀਤੀ ਸੀ, ਜੋ ਕਿ ਪਹਿਲਾਂ ਐਲਬਰਟਾ ਐਨ.ਡੀ.ਪੀ. ਦੀ ਸਾਬਕਾ ਲੀਡਰ ਅਤੇ ਪ੍ਰੀਮੀਅਰ ਰੇਚਲ ਨੋਟਲੀ ਕੋਲ ਸੀ। ਐਲਬਰਟਾ ਵਿੱਚ ਅਗਲੀਆਂ ਆਮ ਪ੍ਰੋਵਿੰਸ਼ੀਅਲ ਚੋਣਾਂ 18 ਅਕਤੂਬਰ, 2027 ਨੂੰ ਹੋਣੀਆਂ ਤੈਅ ਹਨ।
