ਬੀ.ਸੀ. ਦੀ ਫੋਰੈਸਟ ਐਡਵਾਇਜ਼ਰੀ ਕੌਂਸਲ ਨੇ ਨਵੀਂ ਵੈੱਬਸਾਈਟ ਦੀ ਲਾਂਚਿੰਗ ਤੇ ਐਂਗੇਜਮੈਂਟ ਪ੍ਰੀਕਿਰਿਆ ਦੀ ਦਿੱਤੀ ਜਾਣਕਾਰੀ

ਬੀ. ਸੀ. ਦੀ ਫੋਰੈਸਟ ਐਡਵਾਇਜ਼ਰੀ ਕੌਂਸਲ ਨੇ ਇੱਕ ਨਵੀਂ ਵੈੱਬਸਾਈਟ ਲਾਂਚ ਕੀਤੀ ਹੈ, ਜਿੱਥੇ ਬ੍ਰਿਟਿਸ਼ ਕੋਲੰਬੀਆ ਦੇ ਲੋਕ ਕੌਂਸਲ ਦੇ ਕੰਮ ਬਾਰੇ ਜਾਣ ਸਕਦੇ ਹਨ ਅਤੇ ਜੰਗਲਾਤ ਦੇ ਭਵਿੱਖ ਬਾਰੇ ਆਪਣੇ ਸੁਝਾਅ ਸਾਂਝੇ ਕਰ ਸਕਦੇ ਹਨ।

ਸੂਬੇ ਦੀ ਜੰਗਲਾਤ ਮਿਨਿਸਟਰੀ ਨੇ ਮਈ ਵਿਚ ਇਸ ਐਡਵਾਇਜ਼ਰੀ ਕੌਂਸਲ ਦਾ ਗਠਨ ਕੀਤਾ ਸੀ, ਇਹ ਸੁਤੰਤਰ ਜੰਗਲਾਤ ਮਾਹਿਰ ਦਾ ਇੱਕ ਗਰੁੱਪ ਹੈ ਜਿਸ ਨੂੰ ਜੰਗਲਾਤ ਸਿਸਟਮ ਨੂੰ ਮਜਬੂਤ ਕਰਨ ਸਬੰਧੀ ਸਿਫ਼ਾਰਸ਼ਾਂ ਦੇਣ ਦਾ ਕੰਮ ਸੌਂਪਿਆ ਗਿਆ ਹੈ। ਇਹ ਕੌਂਸਲ ਜੰਗਲਾਤ ਸੈਕਟਰ ਨੂੰ ਪੇਸ਼ ਆਉਣ ਵਾਲੀਆਂ ਚੁਣੌਤੀਆਂ ਦੇ ਹੱਲ ਨੂੰ ਕਰਨ ਵਿਚ ਮਦਦ ਕਰੇਗੀ ਅਤੇ ਨਵੇਂ ਜੰਗਲਾਤ ਮਾਡਲ ਵਿਚ ਭੂਮਿਕਾ ਨਿਭਾਏਗੀ।

ਇਸ ਦੇ ਸਹਿ-ਚੇਅਰਪਰਸਨ ਸ਼ੈਨਨ ਜੈਨਜ਼ੇਨ ਨੇ ਕਿਹਾ ਕਿ ਅਸੀਂ ਬੀ. ਸੀ. ਦੇ ਜੰਗਲਾਤ ਦੀ ਬਦਲਦੀਆਂ ਸਥਿਤੀਆਂ ਅਤੇ ਉਸ ਨੀਂਹ ਦੀ ਬਰੀਕੀ ਨਾਲ ਜਾਂਚ ਕਰ ਰਹੇ ਹਾਂ ਜਿਸ 'ਤੇ ਸਾਡਾ ਜੰਗਲਾਤ ਸੈਕਟਰ ਟਿਕਿਆ ਹੋਇਆ ਹੈ, ਇਸ ਵਿਚ ਮੌਜੂਦਾ ਸਿਸਟਮ ਅਤੇ ਢਾਂਚੇ ਦਾ ਰਿਵਿਊ ਕਰਨਾ ਸ਼ਾਮਲ ਹੈ। ਇਹ ਕੌਂਸਲ ਫਾਲ ਵਿਚ ਅੰਤਰਿਮ ਰਿਪੋਰਟ ਅਤੇ ਸਾਲ ਦੇ ਅਖੀਰ ਵਿਚ ਅੰਤਿਮ ਰਿਪੋਰਟ ਸਿਫਾਰਸ਼ਾਂ ਨਾਲ ਸੌਂਪੇਗੀ।