ਐਬਟਸਫੋਰਡ 'ਚ ਉਸਾਰੀ ਵਾਲੀ ਥਾਂ ਤੋਂ ਤਿੰਨ ਨਾਬਾਲਗ ਗ੍ਰਿਫ਼ਤਾਰ, ਬੀਬੀ ਗੰਨਾਂ ਅਤੇ ਨਕਲੀ ਕਰੰਸੀ ਬਰਾਮਦ

ਐਬਟਸਫੋਰਡ ਪੁਲਿਸ ਦੇ ਗਸ਼ਤ ਅਧਿਕਾਰੀ ਨੇ ਰਾਤ ਦੇ ਸਮੇਂ ਇੱਕ ਉਸਾਰੀ ਵਾਲੀ ਥਾਂ 'ਤੇ ਅਲਾਰਮ ਵੱਜਣ ਤੋਂ ਬਾਅਦ ਤੁਰੰਤ ਕਾਰਵਾਈ ਕਰਦੇ ਹੋਏ ਉੱਥੇ ਗੈਰ-ਕਾਨੂੰਨੀ ਤਰੀਕੇ ਨਾਲ ਦਾਖਲ ਹੋਏ ਤਿੰਨ ਨਾਬਾਲਗਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਮੁਤਾਬਕ 14 ਅਤੇ 15 ਸਾਲ ਦੀ ਉਮਰ ਦੇ ਇਹ ਨੌਜਵਾਨ ਸਾਈਟ 'ਤੇ ਲੱਗੀ ਇੱਕ ਵੱਡੀ ਕਰੇਨ ਉੱਪਰ ਚੜ੍ਹਨ ਤੋਂ ਬਾਅਦ ਉੱਥੇ ਹੀ ਲੁਕੇ ਹੋਏ ਸਨ।

ਤਲਾਸ਼ੀ ਦੌਰਾਨ ਔਫੀਸਰ ਨੇ ਉਨ੍ਹਾਂ ਦੇ ਕਬਜ਼ੇ ਵਿਚੋਂ ਤਿੰਨ ਬੀਬੀ ਗੰਨ ਅਤੇ 11,000 ਡਾਲਰ ਤੋਂ ਵੱਧ ਦੀ ਨਕਲੀ ਕੈਨੇਡੀਅਨ ਕਰੰਸੀ ਜ਼ਬਤ ਕੀਤੀ। ਪੁਲਿਸ ਨੇ ਚਿਤਾਵਨੀ ਦਿੱਤੀ ਕਿ ਉਸਾਰੀ ਵਾਲੀ ਥਾਂ 'ਤੇ ਕੋਈ ਖੇਡ ਦੇ ਮੈਦਾਨ ਨਹੀਂ ਹਨ ਅਤੇ ਇੱਥੇ ਭਾਰੀ ਮਸ਼ੀਨਰੀ ਜਾਂ ਉਚਾਈ ਕਾਰਨ ਗੰਭੀਰ ਸੱਟ ਲੱਗਣ ਜਾਂ ਜਾਨ ਜਾਣ ਦਾ ਖ਼ਤਰਾ ਰਹਿੰਦਾ ਹੈ ਅਤੇ ਅਜਿਹੀਆਂ ਥਾਵਾਂ 'ਤੇ ਬਿਨਾਂ ਇਜਾਜ਼ਤ ਜਾਣਾ ਅਪਰਾਧਿਕ ਮਾਮਲੇ ਦੇ ਦਾਇਰੇ ਵਿਚ ਆਉਂਦਾ ਹੈ।

ਪ੍ਰਸ਼ਾਸਨ ਨੇ ਮਾਪਿਆਂ ਨੂੰ ਆਪਣੇ ਬੱਚਿਆਂ ਨੂੰ ਅਜਿਹੀ ਘੁਸਪੈਠ ਦੇ ਖ਼ਤਰਿਆਂ, ਜਨਤਕ ਥਾਵਾਂ 'ਤੇ ਨਕਲੀ ਹਥਿਆਰ ਰੱਖਣ ਅਤੇ ਨਕਲੀ ਕਰੰਸੀ ਦੀ ਵਰਤੋਂ ਦੇ ਗੰਭੀਰ ਕਾਨੂੰਨੀ ਨਤੀਜਿਆਂ ਬਾਰੇ ਜਾਗਰੂਕ ਕਰਨ ਦੀ ਅਪੀਲ ਕੀਤੀ ਹੈ।