ਇਟਲੀ ਵਿਚ ਹੋਣ ਵਾਲੀ ਜੀ 7 ਨੇਤਾਵਾਂ ਦੀ ਬੈਠਕ ਵਿਚ ਸ਼ਾਮਲ ਹੋਣਗੇ ਜਸਟਿਨ ਟਰੂਡੋ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਗਲੇ ਮਹੀਨੇ ਇਟਲੀ ਵਿਚ ਹੋਣ ਵਾਲੀ ਜੀ 7 ਨੇਤਾਵਾਂ ਦੀ ਬੈਠਕ ਵਿਚ ਸ਼ਾਮਲ ਹੋਣ ਲਈ ਜਾ ਰਹੇ ਹਨ, ਜਿਸ ਤੋਂ ਬਾਅਦ ਉਹ ਸਵਿਜ਼ਰਲੈਂਡ ਵਿਚ ਯੂਕਰੇਨ ਸ਼ਾਂਤੀ ਸੰਮੇਲਨ ਵੀ ਵਿਚ ਹੋਣਗੇ। ਪ੍ਰਧਾਨ ਮੰਤਰੀ ਦਫ਼ਤਰ ਨੇ ਅੱਜ ਇੱਕ ਨਿਊਜ਼ ਰਿਲੀਜ਼ ਵਿਚ ਕਿਹਾ ਕਿ ਜੀ-7 ਸੰਮੇਲਨ ਵਿਚ ਟਰੂਡੋ ਲੋਕਤੰਤਰ ਦੇ ਮਹੱਤਵ, ਨਿਰਪੱਖ ਆਰਥਿਕ ਵਿਕਾਸ ਨੂੰ ਉਤਸ਼ਾਹ ਕਰਨ ਅਤੇ ਵਿਦੇਸ਼ੀ ਦਖ਼ਲ ਦਾ ਮੁਕਾਬਲਾ ਕਰਨ ਵਰਗੇ ਮੁੱਦੇ ਉਠਾਉਣਗੇ।

ਟਰੂਡੋ ਦੇ ਦਫਤਰ ਦਾ ਕਹਿਣਾ ਹੈ ਕਿ ਉਹ ਜੀ 7 ਦੇ ਹੋਰ ਨੇਤਾਵਾਂ ਨਾਲ ਦੋ-ਪੱਖੀ ਬੈਠਕਾਂ ਵੀ ਕਰਨਗੇ ਅਤੇ ਇਸ ਦੌਰਾਨ ਉਨ੍ਹਾਂ ਵਲੋਂ ਇਜ਼ਰਾਈਲ-ਹਮਾਸ ਅਤੇ ਰੂਸ-ਯੂਕਰੇਨ ਯੁੱਧ ’ਤੇ ਚਰਚਾ ਕੀਤੀ ਜਾਵੇਗੀ। ਉੱਥੇ ਹੀ, ਸਵਿਜ਼ਰਲੈਂਡ ਸੰਮੇਲਨ ਵਿਚ ਟਰੂਡੋ ਵਲੋਂ ਯੂਕਰੇਨ ਲਈ ਕੈਨੇਡਾ ਵਲੋਂ ਦਿੱਤੀ ਜਾ ਰਹੀ ਸਹਾਇਤਾ ਬਾਰੇ ਗੱਲਬਾਤ ਕੀਤੀ ਜਾਵੇਗੀ ਅਤੇ ਇਸ ਤੋਂ ਇਲਾਵਾ ਜੰਗੀ ਕੈਦੀਆਂ, ਰੂਸ ਵਲੋਂ ਗੈਰ-ਕਾਨੂੰਨੀ ਤੌਰ ਤਰੀਕੇ ਨਾਲ ਨਜ਼ਰਬੰਦ ਕੀਤੇ ਗਏ ਆਮ ਲੋਕਾਂ ਅਤੇ ਯੂਕਰੇਨੀ ਖ਼ੇਤਰ ਤੋਂ ਗੈਰ-ਕਾਨੂੰਨੀ ਤੌਰ ’ਤੇ ਡਿਪੋਰਟ ਕੀਤੇ ਗਏ ਬੱਚਿਆਂ ਦੀ ਵਾਪਸੀ ਲਈ ਜ਼ੋਰ ਦੇਣ ਦੀ ਉਮੀਦ ਹੈ।

ਸਵਿਜ਼ਰਲੈਂਡ ਸਰਕਾਰ ਦਾ ਕਹਿਣਾ ਹੈ ਕਿ 70 ਦੇਸ਼ਾਂ ਨੇ ਪੁਸ਼ਟੀ ਕੀਤੀ ਹੈ ਕਿ ਉਹ ਸੰਮੇਲਨ ਵਿਚ ਹਿੱਸਾ ਲੈਣਗੇ, ਜੋ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਡੀਮੀਰ ਜ਼ੇਲੇਨਸਕੀ ਦੀ ਬੇਨਤੀ ’ਤੇ ਆਯੋਜਿਤ ਕੀਤਾ ਜਾ ਰਿਹਾ ਹੈ। ਟਰੂਡੋ 13 ਜੂਨ ਤੋਂ ਇਟਲੀ ਵਿਚ ਹੋਣਗੇ ਅਤੇ ਇਸ ਤੋਂ ਬਾਅਦ 15 ਤੇ 16 ਜੂਨ ਨੂੰ ਉਹ ਸਵਿਜ਼ਰਲੈਂਡ ਦੀ ਯਾਤਰਾ ’ਤੇ ਰਹਿਣਗੇ।