21.72C Vancouver 21.72C VancouverOct 11, 2022 6:19 PM - THE CANADIAN PRESS
ਡੈਨੀਅਲ ਸਮਿਥ ਐਲਬਰਟਾ ਦੀ ਨਵੀਂ ਪ੍ਰੀਮੀਅਰ ਬਣ ਗਏ ਹਨ। ਸਮਿਥ ਨੂੰ ਲੈਫਟੀਨੈਂਟ ਗਵਰਨਰ ਸਲਮਾ ਲਖਾਨੀ ਵੱਲੋਂ ਐਡਮਿੰਟਨ ਦੇ ਸਰਕਾਰੀ ਹਾਊਸ ਵਿਚ ਇੱਕ ਸਮਾਗਮ ਦੌਰਾਨ ਅਹੁਦੇ ਦੀ ਸਹੁੰ ਚੁਕਾਈ ਗਈ।
ਸਮਿਥ ਇੰਟਰ-ਮਿਨਿਸਟਰੀਅਲ ਅਫੇਅਰਜ਼ ਮੰਤਰੀ ਵਜੋਂ ਵੀ ਕੰਮ ਕਰਨਗੇ ਅਤੇ 21 ਅਕਤੂਬਰ ਨੂੰ ਉਨ੍ਹਾਂ ਵੱਲੋਂ ਨਵੇਂ ਮੰਤਰੀ ਮੰਡਲ ਦਾ ਐਲਾਨ ਕੀਤਾ ਜਾਵੇਗਾ।
ਪ੍ਰੀਮੀਅਰ ਦੇ ਤੌਰ 'ਤੇ ਆਪਣੇ ਪਹਿਲੀ ਬਿਆਨ ਵਿਚ ਯੂਨਾਈਟਿਡ ਕੰਜ਼ਰਵੇਟਿਵ ਪਾਰਟੀ ਦੀ ਲੀਡਰ ਨੇ ਫ੍ਰੀਡਮ, ਫੈਮਿਲੀ, ਫੇਥ, ਕਮਿਊਨਿਟੀ ਅਤੇ ਫ੍ਰੀ ਐਂਟਰਪ੍ਰਾਈਜ਼ ਦੀ ਕੋਰ ਵੈਲਿਊਜ਼ 'ਤੇ ਸ਼ਾਸਨ ਕਰਨ ਦਾ ਵਾਅਦਾ ਕੀਤਾ। ਸਮਿਥ ਨੇ ਫੈਡਰਲ ਕਾਰਬਨ ਟੈਕਸ ਨੂੰ ਚੁਣੌਤੀ ਦੇਣ ਅਤੇ ਸਾਵੇਰਨਿਟੀ ਐਕਟ ਲਿਆਉਣ ਦਾ ਵੀ ਵਾਅਦਾ ਕੀਤਾ, ਜਿਸ ਤਹਿਤ ਸੂਬੇ ਦੇ ਹਿੱਤਾਂ ਖਿਲਾਫ਼ ਹੋਣ ਵਾਲੇ ਫੈਡਰਲ ਕਾਨੂੰਨਾਂ ਨੂੰ ਰੱਦ ਕੀਤਾ ਜਾ ਸਕੇਗਾ।
51 ਸਾਲਾ ਸਾਬਾਕਾ ਵਾਈਲਡਰੋਜ਼ ਪਾਰਟੀ ਲੀਡਰ ਅਤੇ ਪੱਤਰਕਾਰ ਰਹੀ ਸਮਿਥ ਮੌਜੂਦਾ ਸਮੇਂ ਵਿਧਾਨ ਸਭਾ ਮੈਂਬਰ ਨਹੀਂ ਹਨ ਪਰ ਵੀਕੈਂਡ 'ਤੇ ਉਨ੍ਹਾਂ ਨੇ ਬਰੂਕਸ-ਮੈਡੀਸਨ ਹਾਟ ਤੋਂ ਚੋਣ ਲੜਨ ਦਾ ਐਲਾਨ ਕੀਤਾ ਹੈ।
