News

ਕੈਨੇਡਾ ਨੂੰ ਟਰੰਪ ਦੀ ਟੈਰਿਫ ਵਾਰ ਨਾਲ ਵੱਡਾ ਘਾਟਾ ਹੋ ਸਕਦਾ ਹੈ। ਅਰਥ ਸ਼ਾਸਤਰੀ ਦਾ ਕਹਿਣਾ ਹੈ ਕਿ ਚੋਣਾਂ ਵਿਚ ਜੋ ਵਾਅਦੇ ਹੋ ਰਹੇ ਹਨ ਉਹ ਵਿਸ਼ਾ ਅਲੱਗ ਹੈ ਪਰ ਕੈਨੇਡਾ ਨੂੰ ਟੈਰਿਫ ਵਾਰ ਕਾਰਨ ਨਵੇਂ ਖ਼ਰਚਿਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਬੈਂਕ ਆਫ ਨੋਵਾ ਸਕੋਸ਼ੀਆ ਦੀ ਉਪ ਪ੍ਰਧਾਨ ਅਤੇ ਅਰਥ ਸ਼ਾਸਤਰੀ ਰਿਬੇਕਾਹ ਯੰਗ ਮੁਤਾਬਕ, ਜੇ ਕੈਨੇਡਾ ਨੂੰ ਗੰਭੀਰ ਆਰਥਿਕ ਝਟਕਿਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ ਤਾਂ ਦੇਸ਼ ਦੀ ਅਗਵਾਈ ਚਾਹੇ ਕੋਈ ਵੀ ਕਰ ਰਿਹਾ ਹੋਵੇ ਉਸ ਨੂੰ ਰਾਹਤ ਪੈਕੇਜ ਜਾਰੀ ਕਰਨੇ ਪੈਣਗੇ ਅਤੇ ਇਹ ਸਥਿਤੀ 2008 ਦੇ ਵਿੱਤੀ ਸੰਕਟ ਅਤੇ 2020 ਦੇ ਕੋਵਿਡ ਸੰਕਟ ਵਰਗੀ ਹੋ ਸਕਦੀ ਹੈ।

ਫਲੋਰੀਡਾ ਸਟੇਟ ਯੂਨੀਵਰਸਿਟੀ ਵਿਖੇ ਵੀਰਵਾਰ ਨੂੰ ਹੋਈ ਗੋਲੀਬਾਰੀ ਦੌਰਾਨ, 20 ਸਾਲਾ ਵਿਦਿਆਰਥੀ ਫੀਨਿਕਸ ਆਈਕਨਰ ਨੇ ਯੂਨੀਵਰਸਿਟੀ ਦੇ ਸਟੂਡੈਂਟ ਯੂਨੀਅਨ ਦੇ ਬਾਹਰ ਗੋਲੀਆਂ ਚਲਾਈਆਂ, ਜਿਸ ਵਿੱਚ ਦੋ ਨਾ ਲੋਕਾਂ ਦੀ ਮੌਤ ਹੋ ਗਈ ਜੋ ਕਿ ਵਿੱਦਿਆਰਥੀ ਨਹੀਂ ਸੀ ਅਤੇ ਘੱਟੋ-ਘੱਟ ਛੇ ਹੋਰ ਜਖਮੀ ਹੋ ਗਏ। ਇਹ ਹਾਦਸਾ ਦੁਪਹਿਰ ਸਮੇਂ ਹੋਇਆ, ਜਿਸ ਕਾਰਨ ਕੈਂਪਸ 'ਚ ਦਹਿਸ਼ਤ ਫੈਲ ਗਈ। ਕਈ ਵਿਦਿਆਰਥੀ ਅਤੇ ਮਾਪੇ ਆਪਣੀ ਜਾਨ ਬਚਾਉਣ ਲਈ ਬੌਲਿੰਗ ਐਲੀ ਅਤੇ ਲਿਫਟ ਵਿੱਚ ਛੁਪ ਗਏ।

ਪ੍ਰੀਮੀਅਰ ਡੇਵਿਡ ਈਬੀ ਨੇ ਕੈਨੇਡਾ ਵਿਚ ਹੋਰ ਸੂਬਿਆਂ ਨਾਲ ਮੁਫ਼ਤ ਵਪਾਰ ਨੂੰ ਜਲਦ ਲਾਗੂ ਕਰਨ ਦੀ ਗੱਲ ਆਖੀ ਹੈ। ਉਨ੍ਹਾਂ ਕਿਹਾ ਕਿ ਵਿਧਾਨ ਸਭਾ ਵਿਚ ਇਸ ਸਬੰਧੀ ਕਾਨੂੰਨ ਪਹਿਲਾਂ ਹੀ ਪੇਸ਼ ਕੀਤਾ ਜਾ ਚੁੱਕਾ ਹੈ ਅਤੇ ਅਸੀਂ ਇਸ ਨੂੰ ਤੁਰੰਤ ਲਾਗੂ ਕਰਨ ਲਈ ਤਿਆਰ ਹਾਂ।ਉਨ੍ਹਾਂ ਕਿਹਾ ਕਿ ਦੂਜੇ ਸੂਬਿਆਂ ਨੂੰ ਬੀ. ਸੀ. ਨੂੰ ਮਾਨਤਾ ਦੇਣ ਦੀ ਵੀ ਜ਼ਰੂਰਤ ਨਹੀਂ ਹੋਵੇਗੀ।

ਬੀ. ਸੀ. ਦੇ ਡਰਾਈਵਰਾਂ ਨੂੰ ਜਲਦ ਹੀ ਪੂਰੇ ਲਾਇਸੈਂਸ ਲਈ ਕਲਾਸ 5 ਰੋਡ ਟੈਸਟ ਨਹੀਂ ਦੇਣਾ ਪਵੇਗਾ। ਸੂਬਾ ਸਰਕਾਰ ਨੇ ਨਿਯਮਾਂ ਵਿਚ ਤਬਦੀਲੀ ਲਈ ਵਿਧਾਨ ਸਭਾ ਵਿਚ ਬਿੱਲ ਪੇਸ਼ ਕੀਤਾ ਹੈ, ਪਬਲਿਕ ਸੇਫਟੀ ਮਿਨਿਸਟਰ ਗੈਰੀ ਬੇਗ ਨੇ ਇਸ ਦੇ ਜਲਦ ਪਾਸ ਹੋਣ ਦੀ ਉਮੀਦ ਜਤਾਈ ਹੈ। ਪ੍ਰਸਤਾਵਿਤ ਨਿਯਮਾਂ ਮੁਤਾਬਕ, ਆਟੋਮੈਟਿਕ ਹੀ ਪੂਰਾ ਲਾਇਸੈਂਸ ਪ੍ਰਾਪਤ ਕਰਨ ਤੋਂ ਪਹਿਲਾਂ ਨਵੇਂ ਡਰਾਈਵਰਾਂ ਨੂੰ ਕਲਾਸ 5 ਰੋਡ ਟੈਸਟ ਦੀ ਬਜਾਏ 12 ਮਹੀਨੇ ਦੀ ਇੱਕ ਸੇਟਜ ਨੂੰ ਪੂਰਾ ਕਰਨਾ ਹੋਵੇਗਾ, ਜਿਸ ਦੌਰਾਨ ਉਨ੍ਹਾਂ ਨੂੰ ਸੁਰੱਖਿਅਤ ਡਰਾਈਵਿੰਗ ਦਾ ਰਿਕਾਰਡ ਬਣਾਏ ਰੱਖਣਾ ਹੋਵੇਗਾ।

ਕੈਨੇਡਾ ਵਿਚ ਗੈਰ-ਕਾਨੂੰਨੀ ਤਰੀਕੇ ਨਾਲ ਅਮਰੀਕਾ ਤੋਂ ਦਾਖ਼ਲ ਹੋਏ ਤਿੰਨ ਲੋਕਾਂ ਨੂੰ ਆਰਸੀਐਮਪੀ ਵਲੋਂ ਗ੍ਰਿਫਤਾਰ ਕੀਤਾ ਗਿਆ ਹੈ। ਆਰਸੀਐਮਪੀ ਦਾ ਕਹਿਣਾ ਹੈ ਕਿ ਇਹ ਲੋਕ ਕਿਊਬੈਕ ਦੇ ਮੋਂਟੇਰੇਗੀ ਖੇਤਰ ਵਿਚ ਬੁੱਧਵਾਰ ਦੇਰ ਰਾਤ ਫੜ੍ਹੇ ਗਏ ਅਤੇ ਦੋ ਬੱਚਿਆਂ ਸਮੇਤ ਤਿੰਨ ਹੋਰਾਂ ਦੀ ਤਲਾਸ਼ ਜਾਰੀ ਹੈ।

ਵੈਨਕੂਵਰ ਇੰਟਰਨੈਸ਼ਨਲ ਏਅਰਪੋਰਟ 'ਤੇ ਪਿਛਲੇ ਤਿੰਨ ਦਿਨਾਂ ਤੋਂ ਆਉਣ-ਜਾਣ ਵਾਲੀਆਂ ਫਲਾਈਟਸ ਵਿਚ ਚੱਲ ਰਹੀ ਦੇਰੀ ਸਮਾਪਤ ਹੋ ਗਈ ਹੈ। ਵੀਰਵਾਰ ਨੂੰ ਏਅਰਪੋਰਟ ਨੇ ਸਧਾਰਨ ਕਾਰਵਾਈ ਬਹਾਲ ਹੋਣ ਦੀ ਪੁਸ਼ਟੀ ਕੀਤੀ ਹੈ।

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਨਫ਼ਰਤ ਅਪਰਾਧ ਵਿਚ ਸ਼ਾਮਲ ਵਿਦੇਸ਼ੀ ਨਾਗਰਿਕਾਂ ਨੂੰ ਡਿਪੋਰਟ ਕੀਤੇ ਜਾਣ ਦੀ ਗੱਲ ਆਖੀ ਹੈ। ਉਨ੍ਹਾਂ ਕਿਹਾ ਕਿ ਕੰਜ਼ਰਵੇਟਿਵ ਸਰਕਾਰ ਬਣਨ 'ਤੇ ਉਹ ਸਖ਼ਤ ਕਾਨੂੰਨ ਲਿਆਉਣਗੇ। ਪੌਲੀਐਵ ਨੇ ਕਿਹਾ ਕਿ ਵਿਦੇਸ਼ੀ ਨਾਗਰਿਕ ਦਾ ਕੈਨੇਡਾ ਵਿਚ ਸਵਾਗਤ ਹੈ ਪਰ ਉਨ੍ਹਾਂ ਨੂੰ ਵਿਦੇਸ਼ੀ ਟਕਰਾਵਾਂ ਨੂੰ ਸਾਡੀਆਂ ਸੜਕਾਂ 'ਤੇ ਨਹੀਂ ਲਿਆਉਣਾ ਚਾਹੀਦਾ।

ਕੈਨੇਡਾ ਵਿਚ ਵੱਡੀ ਮਾਤਰਾ ਵਿਚ ਕੋਕੀਨ ਸਮੱਗਲਿੰਗ ਹੋਣ ਦੀ ਕੋਸ਼ਿਸ਼ ਦਾ ਪਰਦਾਫਾਸ਼ ਹੋਇਆ ਹੈ। ਅਮਰੀਕਾ ਦੀ ਕਸਟਮ ਅਤੇ ਬਾਰਡਰ ਪ੍ਰੋਟੈਕਸ਼ਨ ਏਜੰਸੀ ਦੇ ਅਧਿਕਾਰੀਆਂ ਨੇ ਅੰਬੈਸਡਰ ਬ੍ਰਿਜ ਕੋਲ 154 ਕਿਲੋਗ੍ਰਾਮ ਕੋਕੀਨ ਫੜੀ ਹੈ, ਜੋ ਕੈਨੇਡਾ ਵਿਚ ਦਾਖ਼ਲ ਹੋਣ ਵਾਲੀ ਸੀ। ਅਮਰੀਕੀ ਬਾਰਡਰ ਅਫਸਰ ਨੇ ਕਿਹਾ ਕਿ ਉਨ੍ਹਾਂ ਕੈਨੇਡਾ ਜਾਣ ਵਾਲੇ ਇੱਕ ਵਪਾਰਕ ਟਰੱਕ-ਟ੍ਰੇਲਰ ਦੀ ਤਲਾਸ਼ੀ ਦੌਰਾਨ ਦੋ ਡਫਲ ਬੈਗ ਅਤੇ 4 ਚੱਲਦੇ ਬਕਸੇ ਵਿਚ ਲੁਕਾਈ ਗਈ ਕੋਕੀਨ ਜ਼ਬਤ ਕੀਤੀ।

ਪੰਜਾਬ ਦੇ ਸਾਬਕਾ ਕੈਬਨਿਟ ਮੰਤਰੀ ਅਤੇ ਭਾਜਪਾ ਆਗੂ ਮਨੋਰੰਜਨ ਕਾਲੀਆ ਦੇ ਘਰ ‘ਤੇ ਹੋਏ ਗ੍ਰੇਨੇਡ ਹਮਲੇ ਦੀ ਜਾਂਚ ਹੁਣ ਐੱਨ.ਆਈ.ਏ. ਵਲੋਂ ਕੀਤੀ ਜਾ ਰਹੀ ਹੈ। ਇਸ ਤੋਂ ਪਹਿਲਾਂ ਪੰਜਾਬ ਪੁਲਿਸ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਸੀ।