News

ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਬਰੁੱਕਫੀਲਡ ਕੰਪਨੀ ਦੇ ਟੈਕਸ ਹੇਵਨ ਨਾਲ ਸਬੰਧਾਂ ਨੂੰ ਲੈ ਕੇ ਮਾਰਕ ਕਾਰਨੀ 'ਤੇ ਨਿਸ਼ਾਨਾ ਸਾਧਿਆ ਹੈ। ਜਗਮੀਤ ਸਿੰਘ ਨੇ ਕਿਹਾ ਕਿ ਮੈਨੂੰ ਚਿੰਤਾ ਹੈ ਕਿ ਕਾਰਨੀ ਆਫਸ਼ੋਰ ਟੈਕਸ ਹੇਵਨਜ਼ 'ਤੇ ਕਾਰਵਾਈ ਨਹੀਂ ਕਰਨਗੇ ਕਿਉਂਕਿ ਜਿਸ ਬਰੁੱਕਫੀਲਡ ਕੰਪਨੀ ਦੇ ਉਹ ਮੁਖੀ ਸਨ, ਉਸ ਦੀਆਂ ਆਪਣੀਆਂ ਏਂਟਟੀਜ਼ ਟੈਕਸ ਹੇਵਨਜ਼ ਕੇਮੈਨ ਆਈਲੈਂਡਜ਼ ਵਿਚ ਰਜਸਿਟਰਡ ਹਨ। ਜਗਮੀਤ ਸਿੰਘ ਨੇ ਕਿਹਾ ਕਿ ਬੇਸ਼ੱਕ ਇਹ ਲੀਗਲ ਹੈ ਪਰ ਇਹ ਕੈਨੇਡੀਅਨ ਨਿਵੇਸ਼ ਨਾਲ ਧੋਖਾ ਹੈ।

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਜਨਰਲ ਮੋਟਰਜ਼ ਕੈਨੇਡਾ ਦੇ ਓਨਟਾਰੀਓ ਅਸੈਂਬਲੀ ਪਲਾਂਟ ਵਿਚ ਵਰਕਰਜ਼ ਦੀ ਛਾਂਟੀ ਨੂੰ ਲੈ ਕੇ ਦੁਖ਼ ਪ੍ਰਗਟਾਉਂਦੇ ਹੋਏ ਰਾਸ਼ਟਰਪਤੀ ਡੋਨਲਡ ਟਰੰਪ 'ਤੇ ਹਮਲਾ ਬੋਲਿਆ ਹੈ। ਪੌਲੀਐਵ ਨੇ ਕਿਹਾ ਕਿ ਟਰੰਪ ਅਮਰੀਕਾ ਦੇ ਸਭ ਤੋਂ ਕਰੀਬੀ ਮਿੱਤਰ ਨੂੰ ਧੋਖਾ ਦੇ ਰਹੇ ਹਨ ਅਤੇ ਸਾਡੀ ਅਰਥਵਿਵਸਥਾ 'ਤੇ ਹਮਲਾ ਕਰ ਰਹੇ ਹਨ।

ਪੰਜਾਬ ਸਰਕਾਰ ਨੇ ਅੱਜ ਮੈਡੀਕਲ ਕਾਲਜ ਦੇ ਪ੍ਰੋਫੈਸਰ ਦੀ ਰਿਟਾਇਰਮੈਂਟ ਉਮਰ 62 ਸਾਲ ਤੋਂ ਵਧਾ ਕੇ 65 ਸਾਲ ਕਰ ਦਿੱਤੀ। ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਪ੍ਰਧਾਨਗੀ ਹੇਠ ਹੋਈ ਮੀਟਿੰਗ ਵਿਚ ਲਏ ਗਏ ਇਸ ਫੈਸਲੇ ਦਾ ਕਰੀਬ 48 ਪ੍ਰੋਫੈਸਰਾਂ ਨੂੰ ਫਾਇਦਾ ਹੋਵੇਗਾ, ਜੋ ਆਉਦੇ ਦਿਨਾਂ ਵਿਚ ਰਿਟਾਇਰ ਹੋਣ ਵਾਲੇ ਸਨ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦਾ ਕਹਿਣਾ ਹੈ ਕਿ ਟੈਰਿਫ ਕਾਰਨ ਗਲੋਬਲ ਆਰਥਿਕ ਮੰਦੀ ਦਾ ਅਸਰ ਕੈਨੇਡਾ 'ਤੇ ਪੈਣਾ ਸ਼ੁਰੂ ਹੋ ਗਿਆ ਹੈ। ਉਨ੍ਹਾਂ ਅੱਜ ਔਟਵਾ ਵਿਚ ਕੈਨੇਡਾ-ਅਮਰੀਕਾ ਸਬੰਧਾਂ ਬਾਰੇ ਆਪਣੀ ਕੈਬਨਿਟ ਕਮੇਟੀ ਨਾਲ ਬੈਠਕ ਮਗਰੋਂ ਇਹ ਟਿੱਪਣੀ ਕੀਤੀ।

ਜੈਸਪਰ ਨੈਸ਼ਨਲ ਪਾਰਕ ਦੇ ਕੋਲੰਬੀਆ ਆਈਸਫੀਲਡ ਵਿਚ 5 ਸਾਲ ਪਹਿਲਾਂ ਵਾਪਰੇ ਜਾਨਲੇਵਾ ਬੱਸ ਹਾਦਸੇ ਦੀ ਜਾਂਚ ਜੂਨ ਮਹੀਨੇ ਹੋਵੇਗੀ। ਜੁਲਾਈ, 2020 ਨੂੰ ਵਾਪਰੇ ਇਸ ਹਾਦਸੇ ਦੌਰਾਨ 3 ਲੋਕਾਂ ਦੀ ਮੌਤ ਹੋ ਗਈ ਸੀ ਅਤੇ 14 ਨੂੰ ਗੰਭੀਰ ਸੱਟਾਂ ਲ਼ੱਗੀਆਂ ਸਨ। ਜਾਣਕਾਰੀ ਮੁਤਾਬਕ ਇਸ ਟੂਰ ਬੱਸ ਨੇ ਕੰਟਰੋਲ ਗੁਆ ਲਿਆ ਸੀ,ਜਿਸ ਕਾਰਨ ਇਹ ਪਲਟ ਗਈ ਸੀ।

ਐਲਬਰਟਾ ਸਰਕਾਰ ਘਰੇਲੂ ਅਤੇ ਵਪਾਰਕ ਹੀਟਿੰਗ ਬਾਲਣ ਦੇ ਰੂਪ ਵਿਚ ਹਾਈਡ੍ਰੋਜਨ ਨੂੰ ਹਰੀ ਝੰਡੀ ਦੇਣ ਦਾ ਵਿਚਾਰ ਕਰ ਰਹੀ ਹੈ ਕਿਉਂਕਿ ਗੈਸ ਨਿਕਾਸੀ ਵਿਚ ਕਟੌਤੀ ਆਵੇਗੀ। ਜੇਕਰ ਇਹ ਬਿੱਲ ਪਾਸ ਹੋ ਜਾਂਦਾ ਹੈ ਤਾਂ ਯੂਟੀਲਿਟੀ ਮੰਤਰੀ ਨੇਥਨ ਨਿਊਡੋਰਫ ਵਲੋਂ ਉਪਯੋਗੀ ਕੰਪਨੀਆਂ ਨੂੰ ਹਾਈਡ੍ਰੋਜਨ ਨੂੰ ਕੁਦਰਤੀ ਗੈਸ ਦੀ ਸਪਲਾਈ ਵਿਚ ਮਿਲਾਉਣ ਦੀ ਇਜਾਜ਼ਤ ਮਿਲੇਗੀ।

ਪੰਜਾਬ ਦੇ ਖਡੂਰ ਸਾਹਿਬ ਹਲਕੇ ਦੇ ਪਿੰਡ ਕੰਗ ਵਿਖੇ ਬੀਤੇ ਦਿਨੀਂ ਇੱਕ ਗੁਰਸਿੱਖ ਮਹਿਲਾ ਗੁਰਪੀਤ ਕੌਰ ਦਾ ਅਣਪਛਾਤਿਆਂ ਵਲੋਂ ਕਤਲ ਕਰ ਦਿੱਤਾ ਗਿਆ, ਇਸ ਵਾਰਦਾਤ ਦਾ ਪਤਾ ਆਂਢ-ਗੁਆਂਢ ਨੂੰ ਉਸ ਸਮੇਂ ਲੱਗਾ ਜਦੋਂ ਮ੍ਰਿਤਕਾ ਦਾ ਬੇਟਾ ਸਕੂਲ ਤੋਂ ਘਰ ਪਹੁੰਚਿਆ।

ਸੰਯੁਕਤ ਰਾਸ਼ਟਰ ਦੀ ਟਰੇਡ ਏਜੰਸੀ ਨੇ ਚਿਤਾਵਨੀ ਦਿੱਤੀ ਹੈ ਕਿ ਰਾਸ਼ਟਰਪਤੀ ਟਰੰਪ ਦੇ ਟੈਰਿਫ ਨਾਲ ਪੈਦਾ ਹੋਈ ਆਰਥਿਕ ਅਸਥਿਰਤਾ ਦਾ ਵਿਕਾਸਸ਼ੀਲ ਦੇਸ਼ਾਂ 'ਤੇ ਵਿਨਾਸ਼ਕਾਰੀ ਅਸਰ ਪੈ ਸਕਦਾ ਹੈ। ਏਜੰਸੀ ਨੇ ਕਿਹਾ ਕਿ ਦੁਨੀਆ ਭਰ ਦਾ ਸਮੁੱਚਾ ਵਪਾਰ 3 ਤੋਂ 7 ਫੀਸਦੀ ਡਿੱਗ ਸਕਦਾ ਹੈ ਅਤੇ ਗਲੋਬਲ ਜੀ. ਡੀ. ਪੀ. 0.7 ਫੀਸਦੀ ਦੀ ਗਿਰਾਵਟ ਦਾ ਸਾਹਮਣਾ ਕਰ ਸਕਦੀ ਹੈ।

ਪੰਜਾਬ ਵਿਚ ਕਿਸਾਨਾਂ ਵਲੋਂ ਟੋਲ ਪਲਾਜ਼ਿਆਂ ਨੂੰ ਵਾਰ-ਵਾਰ ਬੰਦ ਕਰਨ ਨਾਲ ਹੋਏ ਨੁਕਸਾਨ ਦੀ ਭਰਪਾਈ ਕੇਂਦਰ ਵਲੋਂ ਸੂਬਾ ਸਰਕਾਰ ਤੋਂ ਕੀਤੇ ਜਾਣ ਦੀ ਤਿਆਰੀ ਹੈ। ਰਿਪੋਰਟਸ ਮੁਤਾਬਕ, ਕੇਂਦਰੀ ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰਾਲਾ ਨੇ ਇਸ ਮੁੱਦੇ 'ਤੇ ਪੰਜਾਬ ਦੇ ਮੁੱਖ ਸਕੱਤਰ ਏ. ਪੀ. ਸਿਨਹਾ ਨੂੰ ਪੱਤਰ ਲਿਖਿਆ ਹੈ, ਜਿਸ ਵਿਚ ਦੱਸਿਆ ਗਿਆ ਹੈ ਕਿ ਅਕਤੂਬਰ 2020 ਤੋਂ ਨਵੰਬਰ 2024 ਵਿਚਕਾਰ ਕੇਂਦਰ ਸਰਕਾਰ ਨੂੰ ਕਰੀਬ 1,638 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ।