News

ਵੈਨਕੂਵਰ 'ਚ ਵਾਪਰੇ ਕਾਰ ਹਮਲੇ 'ਚ 11 ਲੋਕਾਂ ਨੇ ਜਾਨ ਗਵਾ ਦਿੱਤੀ। ਘਟਨਾ ਤੋਂ ਬਾਅਦ 10 ਲੋਕ ਹਸਪਤਾਲ 'ਚ ਹਨ, ਜਿਸ 'ਚ 22 ਮਹੀਨੇ ਦਾ ਇੱਕ ਬੱਚਾ ਵੀ ਸ਼ਾਮਿਲ ਹੈ, ਜਿਸ ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ। ਮ੍ਰਿਤਕਾਂ 'ਚ ਕਈ ਪੀੜਤਾਂ ਦੀ ਪਛਾਣ ਵੀ ਹੋ ਚੁੱਕੀ ਹੈ ਅਤੇ ਇਨ੍ਹਾਂ ਲਈ ਸਥਾਪਿਤ ਕੀਤੇ ਗਏ ਗੋ-ਫ਼ੰਡ-ਮੀ ਅਕਾਊਂਟਸ 'ਤੇ ਲੋਕ ਡੋਨੇਸ਼ਨਸ ਕਰ ਰਹੇ ਹਨ।

ਬੀ. ਸੀ. ਸਰਕਾਰ ਵੱਡੇ ਪੱਧਰ 'ਤੇ ਲੱਕੜ ਦੇ ਲੋਕਲ ਨਿਰਮਾਣ ਖੇਤਰ ਨੂੰ ਬੂਸਟ ਦੇਣ ਲਈ ਜੰਗਲ ਸੈਕਟਰ ਦੇ ਚਾਰ ਕੈਪੀਟਲ ਪ੍ਰੋਜੈਕਟ ਵਿਚ $11 ਮਿਲੀਅਨ ਤੱਕ ਦਾ ਨਿਵੇਸ਼ ਕਰ ਰਹੀ ਹੈ। ਜੌਬਸ ਅਤੇ ਆਰਥਿਕ ਵਿਕਾਸ ਮੰਤਰੀ ਡਾਇਨਾ ਗਿਬਸਨ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਜੰਗਲਾਤ ਖੇਤਰ ਵਿਚ ਘਰੇਲੂ ਬੀ. ਸੀ. ਕੰਪਨੀਆਂ ਨੂੰ ਮਜ਼ਬੂਤ ​​ਕਰਨ ਲਈ ਸਰਕਾਰੀ ਨਿਵੇਸ਼ ਦੀ ਲੋੜ ਸੀ।

ਵੈਨਕੂਵਰ ਦੀ ਫੁੱਟਬਾਲ ਟੀਮ ਵ੍ਹਾਈਟਕੈਪਸ ਅੱਜ ਸ਼ਾਮ ਫਲੋਰੀਡਾ ਦੇ ਚੇਜ਼ ਸਟੇਡੀਅਮ ਵਿਚ ਇੰਟਰ ਮਿਆਮੀ ਨਾਲ ਭਿੜੇਗੀ। ਇਹ ਦੋਹਾਂ ਟੀਮਾਂ ਵਿਚਕਾਰ ਕੌਨਕਾਕ ਚੈਂਪੀਅਨਜ਼ ਕੱਪ ਸੈਮੀਫਾਈਨਲ ਦਾ ਦੂਜਾ ਮੈਚ ਹੈ, ਇਸ ਤੋਂ ਪਹਿਲਾਂ ਵੀਰਵਾਰ ਨੂੰ ਬੀ.ਸੀ. ਪਲੇਸ ਸਟੇਡੀਅਮ ਵਿਚ ਵੈਨਕੂਵਰ ਵ੍ਹਾਈਟਕੈਪਸ ਨੇ ਇੰਟਰ ਮਿਆਮੀ ਨੂੰ 2-0 ਨਾਲ ਮਾਤ ਦਿੱਤੀ ਸੀ, ਉਸ ਸਮੇਂ ਫੁੱਟਬਾਲ ਦੇ ਦਿੱਗਜ ਖਿਡਾਰੀ ਲਿਓਨੇਲ ਮੇਸੀ ਵੀ ਇੰਟਰ ਮਿਆਮੀ ਵਲੋਂ ਖੇਡੇ ਸਨ।

ਪ੍ਰਿੰਸ ਜਾਰਜ ਪੁਲਿਸ ਨੇ ਇੱਕ ਲੋਕਲ ਰਿਹਾਇਸ਼ 'ਤੇ ਛਾਪੇਮਾਰੀ ਵਿਚ ਡਰੱਗਜ਼, ਹਥਿਆਰ ਬਰਾਮਦ ਕੀਤੇ ਜਾਣ ਦੀ ਜਾਣਕਾਰੀ ਦਿੱਤੀ ਹੈ। ਇਸ ਦੌਰਾਨ ਘਰ ਅੰਦਰੋਂ ਕਈ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ, ਜਿਨ੍ਹਾਂ ਵਿਚੋਂ ਕਈ ਮੁਲਜ਼ਮ ਪਹਿਲਾਂ ਵੀ ਪੁਲਿਸ ਅੜਿੱਕੇ ਚੜ੍ਹ ਚੁੱਕੇ ਸਨ। ਪ੍ਰਿੰਸ ਜਾਰਜ ਆਰਸੀਐਮਪੀ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਇਹ ਕਾਰਵਾਈ 16 ਅਪ੍ਰੈਲ ਨੂੰ ਨਿਕੋਲਸਨ ਸਟ੍ਰੀਟ ਦੇ 300-ਬਲਾਕ ਦੇ ਇੱਕ ਘਰ ਵਿਚ ਕੀਤੀ ਗਈ।

ਕੈਨੇਡੀਅਨ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਾਸ਼ਿੰਗਟਨ ਦਾ ਦੌਰਾ ਕਰਨਗੇ। ਇਸ ਦੀ ਪੁਸ਼ਟੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਕੀਤੀ। ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਕਾਰਨੀ ਅਗਲੇ ਇੱਕ ਹਫ਼ਤੇ ਦੇ ਅੰਦਰ ਵ੍ਹਾਈਟ ਹਾਊਸ ਵਿਚ ਉਨ੍ਹਾਂ ਨਾਲ ਮੁਲਾਕਾਤ ਲਈ ਆ ਰਹੇ ਹਨ। ਦੋਹਾਂ ਪ੍ਰਮੁੱਖ ਲੀਡਰਾਂ ਵਿਚਕਾਰ ਇਹ ਮੁਲਾਕਾਤ ਉਦੋਂ ਹੋਵੇਗੀ ਜਦੋਂ ਟੈਰਿਫ ਨੂੰ ਲੈ ਕੇ ਤਣਾਅ ਬਰਕਰਾਰ ਹੈ। ਹਾਲਾਂਕਿ, ਟਰੰਪ ਨੇ ਕਾਰਨੀ ਦੀ ਸ਼ਲਾਘਾ ਕਰਦੇ ਹੋਏ ਉਨ੍ਹਾਂ ਨੂੰ ਬਹੁਤ ਵਧੀਆ ਇਨਸਾਨ ਕਰਾਰ ਦਿੱਤਾ।

ਵੈਨਕੂਵਰ ਦੇ ਮੇਅਰ ਕੇਨ ਸਿਮ ਨੇ ਫਿਲੀਪੀਨੋ ਫੈਸਟੀਵਲ ਦੇ ਕਾਰ ਹਮਲੇ ਮਾਮਲੇ ਵਿਚ ਪ੍ਰੀਮੀਅਰ ਡੇਵਿਡ ਈਬੀ ਵਲੋਂ ਸੁਤੰਤਰ ਜਾਂਚ ਕਮਿਸ਼ਨ ਲਾਂਚ ਕਰਨ ਦੀ ਦਿੱਤੀ ਗਈ ਚਿਤਾਵਨੀ 'ਤੇ ਅੱਜ ਪ੍ਰਤੀਕਿਰਿਆ ਦਿੰਦੇ ਕਿਹਾ ਕਿ ਸਾਨੂੰ ਵੀ ਓਨੀ ਫਿਕਰ ਹੈ, ਅਸੀਂ ਵੀ ਸਾਰੇ ਇਹ ਪਤਾ ਕਰਨਾ ਚਾਹੁੰਦੇ ਹਾਂ ਕਿ ਇਹ ਘਟਨਾ ਕਿਉਂ ਹੋਈ ਅਤੇ ਅੱਗੇ ਤੋਂ ਅਜਿਹਾ ਨਾ ਹੋਵੇ ਪਰ ਅਸੀਂ ਇਹ ਵੀ ਚਾਹੁੰਦੇ ਹਾਂ ਕਿ ਸੂਬਾ ਸਰਕਾਰ ਬੀ. ਸੀ. ਭਰ ਵਿਚ ਅਸਲ ਮਾਨਸਿਕ ਸਿਹਤ ਸੰਕਟ ਨੂੰ ਵੀ ਸਮਝੇ ਅਤੇ ਇਸ ਨਾਲ ਨਜਿੱਠੇ।

ਕੈਨੇਡੀਅਨ ਅਰਥਵਿਵਸਥਾ ਨੂੰ ਟੈਰਿਫ ਅਨਿਸ਼ਚਿਤਤਾ ਵਿਚਕਾਰ ਉਮੀਦ ਤੋਂ ਵੱਡਾ ਝਟਕਾ ਲੱਗਾ ਹੈ, ਫਰਵਰੀ ਵਿਚ ਇਹ ਗਿਰਾਵਟ ਵਿਚ ਚਲੀ ਗਈ, ਜਦੋਂ ਕਿ ਮਾਰਚ ਦੌਰਾਨ ਇਸ ਵਿਚ ਮਾਮੂਲੀ ਵਾਧੇ ਦਾ ਅਨੁਮਾਨ ਹੈ। ਸਟੈਟਿਸਟਿਕਸ ਕੈਨੇਡਾ ਦੇ ਅੰਕੜਿਆਂ ਅਨੁਸਾਰ, ਫਰਵਰੀ ਵਿਚ ਕੈਨੇਡਾ ਦੀ ਜੀਡੀਪੀ 0.2 ਫੀਸਦੀ ਡਿੱਗੀ ਅਤੇ ਮਾਰਚ ਲਈ ਲਗਾਏ ਗਏ ਅਨੁਮਾਨ ਤੋਂ ਪਤਾ ਲੱਗਦਾ ਹੈ ਕਿ ਅਰਥਵਿਵਸਥਾ ਮਾਮੂਲੀ ਵਾਧਾ ਦਰਜ ਕਰੇਗੀ।

ਕੈਨੇਡਾ ਵਿਚ ਲਿਬਰਲ ਪਾਰਟੀ ਮਾਰਕ ਕਾਰਨੀ ਦੀ ਅਗਵਾਈ ਵਿਚ 169 ਸੀਟਾਂ ਨਾਲ ਘੱਟ ਗਿਣਤੀ ਸਰਕਾਰ ਬਣਾ ਰਹੀ ਹੈ,ਬਹੁਮਤ ਲਈ ਇਹ ਮਹਿਜ ਤਿੰਨ ਸੀਟਾਂ ਪੱਛੜ ਗਈ। ਉਥੇ ਹੀ,ਕੰਜ਼ਰਵੇਟਿਵ 144 ਸੀਟਾਂ ਨਾਲ ਮੁੱਖ ਵਿਰੋਧੀ ਵਿਚ ਬੈਠਣਗੇ। ਬਲਾਕ ਕਿਊਬੈਕਵਾ ਕੋਲ ਇਸ ਵਾਰ 22 ਸੀਟਾਂ ਹਨ ਅਤੇ ਐਨ.ਡੀ.ਪੀ. ਨੇ ਸਿਰਫ 7 ਸੀਟਾਂ ਨਾਲ ਹਾਊਸ ਆਫ ਕਾਮਨਜ਼ ਵਿਚ ਜਗ੍ਹਾ ਬਣਾਈ ਹੈ, ਜੋ ਅਧਿਕਾਰਤ ਪਾਰਟੀ ਦੀ ਸਥਿਤੀ ਲਈ ਚਾਹੀਦੀਆਂ ਘੱਟੋ-ਘੱਟ 12 ਸੀਟਾਂ ਤੋਂ ਪੱਛੜ ਗਈ।

ਕੈਨੇਡੀਅਨ ਜੂਨੀਅਰ ਹਾਕੀ ਟੀਮ ਦੇ ਸਾਬਕਾ ਪੰਜ ਖਿਡਾਰੀਆਂ ਨਾਲ ਸਬੰਧਤ 2018 ਦੇ ਜਿਨਸੀ ਸ਼ੋਸ਼ਣ ਦੇ ਕੇਸ ਦੇ ਟਰਾਇਲ ਦੌਰਾਨ ਅੱਜ ਓਨਟਾਰੀਓ ਕੋਰਟ ਵਿਚ ਖਿਡਾਰੀਆਂ ਦੀ ਗਰੁੱਪ ਚੈਟ ਅਤੇ ਮਾਈਕਲ ਮੈਕਲੋਡ ਵਲੋਂ ਉਸ ਰਾਤ ਲੜਕੀ ਦੀ ਫਿਲਮਾਈਆਂ ਗਈਆਂ ਵੀਡੀਓਜ਼ ਨੂੰ ਦਿਖਾਇਆ ਗਿਆ, ਮੈਕਲੋਡ ਸਮੇਤ ਡਿਲਨ ਡਿਊਬ, ਕੈਲ ਫੁੱਟ, ਐਲੇਕਸ ਫੋਰਮੈਂਟਨ ਅਤੇ ਕਾਰਟਰ ਹਾਰਟ ਇਸ ਕੇਸ ਵਿਚ ਨਾਮਜ਼ਦ ਹਨ।