ਸਰੀ ਵਿਚ ਵਾਪਰੀਆਂ ਸ਼ੂਟਿੰਗ ਦੀਆਂ ਦੋ ਵੱਖ-ਵੱਖ ਘਟਨਾਵਾਂ 'ਤੇ ਸੂਬਾ ਸਰਕਾਰ ਨੇ ਕੀਤੀ ਨਿਖੇਧੀ

ਬੀ. ਸੀ. ਕੰਜ਼ਰਵੇਟਿਵ ਪਾਰਟੀ ਨੇ ਸਰੀ ਵਿਚ ਵਾਪਰੀਆਂ ਸ਼ੂਟਿੰਗ ਦੀਆਂ ਦੋ ਵੱਖ-ਵੱਖ ਘਟਨਾਵਾਂ 'ਤੇ ਸੂਬਾ ਸਰਕਾਰ ਨੇ ਸਖ਼ਤ ਨਿਖੇਧੀ ਕੀਤੀ ਹੈ। ਹਰਮਨ ਭੰਗੂ ਨੇ ਸੂਬੇ ਦੀ ਕਾਨੂੰਨ ਵਿਵਸਥਾ 'ਤੇ ਸਵਾਲ ਚੁੱਕਦਿਆਂ ਕਿਹਾ ਕਿ ਐਨ.ਡੀ.ਪੀ. ਦੇ ਸਾਸ਼ਨ ਵਿਚ ਪਰਿਵਾਰਕ ਇਲਾਕਿਆਂ ਵਿਚ ਸ਼ੂਟਿੰਗ, ਗੈਂਗ ਹਿੰਸਾ ਅਤੇ ਕਤਲ ਦੇ ਦ੍ਰਿਸ਼ ਹੁਣ ਆਮ ਹੁੰਦੇ ਜਾ ਰਹੇ ਹਨ।

ਭੰਗੂ ਨੇ ਕਿਹਾ ਕਿ ਲੋਕ ਹੁਣ ਸਿਆਸਤਦਾਨਾਂ ਦੇ ਵਾਰ-ਵਾਰ ਇੱਕੋ-ਜਿਹੇ ਬਿਆਨ ਸੁਣ ਕੇ ਅੱਕ ਚੁੱਕੇ ਹਨ ਅਤੇ ਇਸ ਗੁੰਡਾਗਰਦੀ ਤੇ ਹਿੰਸਾ ਦਾ ਖ਼ਾਤਮਾ ਹੋਣਾ ਚਾਹੀਦਾ ਹੈ। ਉਥੇ ਹੀ, ਸਰੀ-ਕਲੋਵਰਡੇਲ ਤੋਂ ਵਿਧਾਇਕ ਏਲੇਨੋਰ ਸਟਰਕੋ ਨੇ ਵੀ ਸੱਤਾਧਾਰੀ ਐਨ.ਡੀ.ਪੀ. 'ਤੇ ਨਿਸ਼ਾਨਾ ਸਾਧਦਿਆਂ ਕਿਹਾ ਕਿ ਜਿਸ ਤਰ੍ਹਾਂ ਸਰੀ ਵਿਚ ਗਨ-ਕ੍ਰਾਈਮ ਲਗਾਤਾਰ ਜਾਰੀ ਹੈ, ਉਸ ਤੋਂ ਇਹ ਬਿਲਕੁਲ ਸਾਫ਼ ਹੋ ਚੁੱਕਾ ਹੈ ਕਿ ਸਰਕਾਰ ਨੂੰ ਸਰੀ ਪੁਲਿਸ ਸਰਵਿਸ ਦੀ ਗੈਂਗ ਵਿਰੋਧੀ ਟੀਮ ਨੂੰ ਤੁਰੰਤ ਪ੍ਰਭਾਵ ਨਾਲ ਬਹਾਲ ਕਰਨਾ ਚਾਹੀਦਾ ਹੈ।

ਗੌਰਤਲਬ ਹੈ ਕਿ 133B ਸਟ੍ਰੀਟ ਦੇ 7000 ਬਲਾਕ ਦੀ ਅੰਡਰਗ੍ਰਾਊਂਡ ਪਾਰਕਿੰਗ ਵਿਚ ਬੀਤੀ ਰਾਤ 10 ਵਜੇ ਦੋ ਲੋਕਾਂ ਦਾ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ, ਉਥੇ ਹੀ, ਇਸ ਤੋਂ ਪਹਿਲਾਂ ਸਵੇਰ 4 ਵਜੇ 152 ਸਟ੍ਰੀਟ ਦੇ 7100 ਬਲਾਕ ਵਿਚ ਇੱਕ ਗੈਸ ਸਟੇਸ਼ਨ ਦੇ ਬਾਹਰ ਗੋਲੀਆਂ ਚਲਾਈਆਂ ਗਈਆਂ, ਜਿਸ ਵਿਚ ਦੋ ਲੋਕ ਜ਼ਖਮੀ ਹੋਏ ਹਨ।