ਟੰਬਲਰ ਰਿਜ ਸਕੂਲ ਗੋਲੀਬਾਰੀ ਮਾਮਲੇ ’ਚ ਅਮਰੀਕੀ ਅਧਿਕਾਰੀਆਂ ਵੱਲੋਂ ਹੋਰ ਵੇਰਵੇ ਜਾਰੀ

ਬੀ.ਸੀ. ਦੇ ਟੰਬਲਰ ਰਿਜ ਸੈਕੰਡਰੀ ਸਕੂਲ ਵਿਚ ਹੋਈ ਸਮੂਹਿਕ ਗੋਲੀਬਾਰੀ ਦੇ ਮਾਮਲੇ ਵਿਚ ਅਮਰੀਕੀ ਅਧਿਕਾਰੀਆਂ ਵਲੋਂ ਗ੍ਰਿਫਤਾਰ ਕੀਤੇ ਗਏ ਵਾਸ਼ਿੰਗਟਨ ਸਟੇਟ ਦੇ 30 ਸਾਲਾ ਜੇਮਜ਼ ਕੋਡੀ ਬ੍ਰਾਇੰਟ ਨੂੰ ਲੈ ਕੇ ਹੋਰ ਜਾਣਕਾਰੀ ਸਾਹਮਣੇ ਆਈ ਹੈ। ਅਮਰੀਕੀ ਅਧਿਕਾਰੀ ਮੁਤਾਬਕ, ਬ੍ਰਾਇੰਟ ਹਮਲੇ ਤੋਂ ਪਹਿਲਾਂ ਦੇ ਪਿਛਲੇ ਛੇ ਮਹੀਨਿਆਂ ਤੋਂ 18 ਸਾਲਾ ਸ਼ੂਟਰ ਜੈਸੀ ਵੈਨ ਰੂਟਸਲਾਰ ਨਾਲ ਇੱਕ ਐਪ ਰਾਹੀਂ ਲਗਾਤਾਰ ਸੰਪਰਕ ਵਿਚ ਸੀ।

ਉਹ ਰੂਟਸੇਲਾਰ ਨੂੰ ਨਾ ਸਿਰਫ਼ ਵਾਰਦਾਤ ਨੂੰ ਅੰਜਾਮ ਦੇਣ ਲਈ ਤਕਨੀਕੀ ਸਲਾਹ ਅਤੇ ਪੈਸੇ ਦੇ ਰਿਹਾ ਸੀ ਬਲਕਿ ਇਸ ਖ਼ੂਨੀ ਖੇਡ ਦੀ ਲਾਈਵ ਸਟ੍ਰੀਮਿੰਗ ਕਰਨ ਦੀ ਯੋਜਨਾ ਵੀ ਬਣਾਈ ਸੀ।ਅਧਿਕਾਰੀਆਂ ਮੁਤਾਬਕ, ਵਾਰਦਾਤ ਵਾਲੇ ਦਿਨ 10 ਫਰਵਰੀ ਨੂੰ ਸ਼ੂਟਿੰਗ ਨੂੰ ਲਾਈਵ ਸਟ੍ਰੀਮ ਕਰਨ ਦੀ ਕੋਸ਼ਿਸ਼ ਵੀ ਕੀਤੀ ਗਈ ਪਰ ਇਹ 20 ਸੈਕਿੰਡ ਹੀ ਚੱਲ ਸਕੀ ਸੀ।

ਉਨ੍ਹਾਂ ਮੁਤਾਬਕ ਬ੍ਰਾਇੰਟ ਕਈ ਸਾਲ ਪਹਿਲਾਂ ਰੂਟਸੇਲਾਰ ਨੂੰ ਓਮੇਗਲ ਨਾਮਕ ਔਨਲਾਈਨ ਵੀਡੀਓ ਚੈਟ ਪਲੇਟਫਾਰਮ 'ਤੇ ਮਿਲਿਆ ਸੀ। ਗੌਰਤਲਬ ਹੈ ਕਿ ਅਮਰੀਕੀ ਏਜੰਸੀਆਂ ਨੇ ਬ੍ਰਾਇੰਟ ਨੂੰ ਇਸ ਮਾਮਲੇ ਵਿਚ ਦੂਜੇ ਦੇਸ਼ ਵਿਚ ਕਤਲ ਦੀ ਸਾਜ਼ਿਸ ਰਚਣ ਦੇ ਦੋਸ਼ ਨਾਲ ਚਾਰਜ ਕੀਤਾ ਹੈ, ਜਿਸ ਵਿਚ ਉਸ ਨੂੰ ਉਮਰ ਕੈਦ ਤੱਕ ਦੀ ਸਜ਼ਾ ਹੋ ਸਕਦੀ ਹੈ।