ਵੀਵਾ ਟੈਕ ਵਿੱਚ ਪੀਐੱਮ ਮੋਦੀ ਦਾ ਸੰਬੋਧਨ, ਕਿਹਾ, ਭਾਰਤ ਓਹੀ ਦਿੰਦਾ ਹੈ, ਜੋ ਇੰਨੋਵੇਟਰ ਅਤੇ ਨਿਵੇਸ਼ਕ ਚਾਹੁੰਦੇ ਹਨ

ਅੱਜ ਬੁੱਧਵਾਰ ਨੂੰ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੇ ਭਾਰਤ ਵੱਲੋਂ ਕੀ ਖੇਤਰਾਂ ਵਿੱਚ ਲਾਗੂ ਕੀਤੇ ਸੁਧਾਰਾਂ 'ਤੇ ਗ਼ੌਰ ਕਰਦਿਆਂ ਆਖਿਆ ਕਿ ਕੋਵਿਡ-19 ਮਹਾਮਾਰੀ ਦੌਰਾਨ ਵੀ ਮੁਲਕ ਕਾਫ਼ੀ 'ਅਨੁਕੂਲ ਅਤੇ ਚੁਸਤ' ਰਿਹਾ।
ਉਨ੍ਹਾਂ ਦੁਨੀਆ ਨੂੰ ਯੋਗਤਾ, ਬਜ਼ਾਰ, ਪੂੰਜੀ, ਵਾਤਾਵਰਣ ਅਤੇ ਖੁੱਲੇ ਸਭਿਆਚਾਰ ਦੇ ਪੰਜ ਥੰਮਾਂ 'ਤੇ ਨਿਵੇਸ਼ ਕਰਨ ਦਾ ਸੱਦਾ ਦਿੱਤਾ।

ਵੀਵਾ ਟੈਕ ਦੇ 5 ਵੇਂ ਐਡੀਸ਼ਨ ਦੌਰਾਨ ਵੀਡੀਓ ਕਾਨਫਰੈਂਸਿੰਗ ਰਾਹੀਂ ਆਪਣੇ ਸੰਬੋਧਨ ਦੌਰਾਨ ਉਨ੍ਹਾਂ ਆਖਿਆ ਕਿ ਭਾਰਤ ਓਹੀ ਦਿੰਦਾ ਹੈ, ਜੋ ਨਵੀਨੀਕਾਰ ਅਤੇ ਨਿਵੇਸ਼ਕ ਚਾਹੁੰਦੇ ਹਨ।

ਉਹਨਾਂ ਆਖਿਆ ਕਿ ਕੋਵਿਡ-19 ਸਾਡੇ ਸਮੇਂ ਦਾ 'ਸਭ ਤੋਂ ਵੱਡਾ ਵਿਘਨ' ਹੈ ਅਤੇ ਹੁਣ ਲੋੜ ਹੈ ਮੁਰੰਮਤ ਅਤੇ ਤਿਆਰੀ ਦੀਆਂ ਦੋ ਨੀਂਹਾਂ 'ਤੇ ਤਵੱਜੋ ਦੇਣ ਦੀ।

ਦੱਸਣ ਯੋਗ ਹੈ ਕਿ ਵੀਵਾ ਟੈਕ ਯੂਰਪ ਦੇ ਸਭ ਤੋਂ ਵੱਡੇ ਡਿਜੀਟਲ ਅਤੇ ਸਟਾਰਟਅਪ ਪ੍ਰੋਗਰਾਮਾਂ ਵਿੱਚੋਂ ਇੱਕ ਹੈ, ਜੋ ਸਾਲ 2016 ਤੋਂ ਹਰ ਸਾਲ ਪੈਰਿਸ ਵਿੱਚ ਹੁੰਦਾ ਆ ਰਿਹਾ ਹੈ।

ਪ੍ਰਧਾਨ ਮੰਤਰੀ ਨੇ ਆਖਿਆ ਕਿ ਤਕਨੀਕ ਅਤੇ ਸਟਾਰਟਅਪ ਦੀ ਦੁਨੀਆ ਵਿੱਚ ਭਾਰਤ ਦੀ ਪੁਲਾਂਘ ਸਭ ਜਾਣਦੇ ਹਨ ਅਤੇ ਬੀਤੇ ਕੁਝ ਸਾਲਾਂ ਦੌਰਾਨ ਕਈ ਮੁਸ਼ਕਲ ਕੰਮ ਭਾਰਤ ਨੇ ਕਰਕੇ ਵਿਖਾਏ ਹਨ।

ਉਹਨਾਂ ਆਖਿਆ,"ਅਸੀਂ ਭਾਰਤ ਵਿੱਚ ਕਈ ਖੇਤਰਾਂ ਵਿੱਚ, ਭਾਵੇਂ ਉਹ ਖਾਣਾਂ ਹੋਣ, ਪੁਲਾੜ, ਬੈਂਕਿੰਗ, ਪਰਮਾਣੂ ਊਰਜਾ ਜਾਂ ਕੋਈ ਹੋਰ ਖੇਤਰ ਹੋਵੇ, ਵੱਡੇ ਸੁਧਾਰ ਲਾਗੂ ਕੀਤੇ ਹਨ। ਇਸ ਤੋਂ ਜ਼ਾਹਰ ਹੈ ਕਿ ਭਾਰਤ ਮਹਾਮਾਰੀ ਵੇਲੇ ਵੀ ਇੱਕ ਮੁਲਕ ਦੇ ਤੌਰ 'ਤੇ ਅਨੁਕੂਲ ਅਤੇ ਫੁਰਤੀਲਾ ਹੈ।"

"ਸਾਡਾ ਮੁਲਕ ਦੁਨੀਆ ਦੇ ਕਈ ਵੱਡੇ ਸਟਾਰਟਅਪ ਈਕੋ-ਸਿਸਟਮ ਦਾ ਘਰ ਹੈ। ਬੀਤੇ ਕੁਝ ਸਾਲਾਂ ਵਿੱਚ ਅਸੀਂ ਕਈ ਔਖੇ ਕੰਮ ਵੀ ਨੇਪਰੇ ਚਾੜ੍ਹੇ ਹਨ। ਮੈਂ ਦੁਨੀਆ ਨੂੰ ਯੋਗਤਾ, ਬਜ਼ਾਰ, ਪੂੰਜੀ, ਵਾਤਾਵਰਣ ਅਤੇ ਖੁੱਲੇ ਸਭਿਆਚਾਰ ਦੇ ਪੰਜ ਥੰਮਾਂ 'ਤੇ ਨਿਵੇਸ਼ ਕਰਨ ਦਾ ਸੱਦਾ ਦਿੰਦਾ ਹਾਂ," ਉਨ੍ਹਾਂ ਅੱਗੇ ਆਖਿਆ|

ਪ੍ਰਧਾਨ ਮੰਤਰੀ ਨੇ ਆਖਿਆ ਕਿ ਬੀਤੇ ਸਾਲ ਦੌਰਾਨ ਦੁਨੀਆ ਨੇ ਕੋਵਿਡ-19 ਕਰਕੇ ਵੱਖੋ-ਵੱਖਰੇ ਖੇਤਰਾਂ ਵਿੱਚ ਮੁਸ਼ਕਲਾਂ ਦਾ ਸਾਹਮਣਾ ਕੀਤਾ ਹੈ।

ਉਨ੍ਹਾਂ ਆਖਿਆ,"ਹਲੇ ਵੀ ਇਹ ਕਾਫ਼ੀ ਹੱਦ ਤੱਕ ਹੈ| ਹਾਲਾਂਕਿ, ਵਿਘਨ ਦਾ ਮਤਲਬ ਨਿਰਾਸ਼ਾ ਨਹੀਂ ਹੈ| ਬਲਕਿ, ਸਾਨੂੰ ਮੁਰੰਮਤ ਅਤੇ ਤਿਆਰੀ ਦੀਆਂ ਦੋ ਨੀਂਹਾਂ 'ਤੇ ਤਵੱਜੋ ਦੇਣੀ ਚਾਹੀਦੀ ਹੈ।"

ਪੀਐੱਮ ਮੋਦੀ ਨੇ ਕਿਹਾ ਕਿ ਜਿੱਥੇ ਰਵਾਇਤੀ ਤਰੀਕੇ ਅਸਫ਼ਲ ਹੋ ਜਾਣ, ਉੱਥੇ ਇੰਨੋਵੇਸ਼ਨ ਮਦਦ ਕਰ ਸਕਦੀ ਹੈ।

"ਮੈਨੂੰ ਲੱਗਦਾ ਹੈ ਕਿ ਜਿੱਥੇ ਰਵਾਇਤੀ ਤਰੀਕੇ ਅਸਫ਼ਲ ਹੋ ਜਾਣ, ਉੱਥੇ ਇੰਨੋਵੇਸ਼ਨ ਮਦਦ ਕਰ ਸਕਦੀ ਹੈ| ਇਹ ਸਾਡੇ ਸਮੇਂ ਦੀ ਸਭ ਤੋਂ ਵੱਡੀ ਮੁਸੀਬਤ, ਗਲੋਬਲ ਮਹਾਮਾਰੀ ਕੋਵਿਡ-19 ਦੌਰਾਨ ਵੇਖਿਆ ਗਿਆ ਹੈ," ਉਨ੍ਹਾਂ ਆਖਿਆ।

"ਕੋਵਿਡ-19 ਨੇ ਸਾਡੇ ਕਈ ਰਵਾਇਤੀ ਤਰੀਕਿਆਂ ਦਾ ਵੀ ਇਮਤਿਹਾਨ ਲਿਆ ਹੈ। ਹਾਲਾਂਕਿ ਇੰਨੋਵੇਸ਼ਨ ਨੇ ਸਾਡਾ ਬਚਾਅ ਕੀਤਾ। ਮਹਾਮਾਰੀ ਤੋਂ ਪਹਿਲਾਂ ਅਤੇ ਮਹਾਮਾਰੀ ਦੌਰਾਨ ਵੀ, ਮੈਂ ਇੰਨੋਵੇਸ਼ਨ ਨੂੰ ਰੈਫਰ ਕਰਦਾ ਹਾਂ,"ਉਹਨਾਂ ਅੱਗੇ ਆਖਿਆ।

ਪ੍ਰਧਾਨ ਮੰਤਰੀ ਨੇ ਆਖਿਆ ਕਿ ਡਿਜੀਟਲ ਤਕਨੀਕ ਨੇ ਲੋਕਾਂ ਨੂੰ ਮਹਾਮਾਰੀ ਦੌਰਾਨ ਇਸ ਨਾਲ ਨਜਿੱਠਣ ਅਤੇ ਆਪਸ ਵਿੱਚ ਜੁੜਨ ਲਈ ਮਦਦ ਕੀਤੀ ਹੈ।

"ਜਦੋਂ ਮੈਂ ਮਹਾਮਾਰੀ ਤੋਂ ਪਹਿਲਾਂ ਇੰਨੋਵੇਸ਼ਨ ਬਾਰੇ ਗੱਲ ਕਰਦਾ ਹਾਂ, ਤਾਂ ਮੈਂ ਪਹਿਲਾਂ ਤੋਂ ਹੀ ਹੋਂਦ ਵਿੱਚ ਆਏ ਵਿਕਾਸ ਦੀ ਗੱਲ ਕਰਦਾ ਹਾਂ, ਜਿਸਨੇ ਮਹਾਮਾਰੀ ਦੌਰਾਨ ਸਾਡੀ ਮਦਦ ਕੀਤੀ। ਡਿਜੀਟਲ ਤਕਨੀਕ ਨੇ ਇਸ ਨਾਲ ਨਜਿੱਠਣ, ਜੋੜਨ, ਅਰਾਮ ਦੇਣ ਅਤੇ ਹੋਂਸਲਾ ਦੇਣ ਵਿੱਚ ਸਾਡੀ ਮਦਦ ਕੀਤੀ ਹੈ। ਡਿਜੀਟਲ ਮੀਡਿਆ ਜ਼ਰੀਏ ਅਸੀਂ ਕੰਮ ਕਰ ਸਕਦੇ ਹਾਂ, ਆਪਣੇ ਪਿਆਰਿਆਂ ਨਾਲ ਗੱਲ ਕਰ ਸਕਦੇ ਹਾਂ ਅਤੇ ਦੂਜਿਆਂ ਦੀ ਮਦਦ ਕਰ ਸਕਦੇ ਹਾਂ,"ਉਹਨਾਂ ਆਖਿਆ।

ਉਨ੍ਹਾਂ ਅੱਗੇ ਆਖਿਆ,"ਦੂਜੀ ਗੱਲ, ਮਹਾਮਾਰੀ ਲਈ ਇਨੋਵੇਸ਼ਨ ਤੋਂ ਜ਼ਾਹਰ ਹੈ ਕਿ ਮਨੁੱਖਤਾ ਦਾ ਮਿਆਰ ਉੱਚਾ ਉੱਠਿਆ ਹੈ ਅਤੇ ਹੋਰ ਵੀ ਪ੍ਰਭਾਵਸ਼ਾਲੀ ਢੰਗ ਨਾਲ ਇਸਦੇ ਖ਼ਿਲਾਫ਼ ਇਸਨੇ ਲੜਾਈ ਲੜੀ ਹੈ।"

ਪ੍ਰਧਾਨ ਮੰਤਰੀ ਨੇ ਆਖਿਆ ਕਿ ਭਾਰਤ ਅਤੇ ਫਰਾਂਸ ਕਈ ਵੱਖੋ-ਵੱਖਰੇ ਮੁੱਦਿਆਂ ਉੱਤੇ ਮਿਲ ਕੇ ਕੰਮ ਕਰ ਰਹੇ ਹਨ ਅਤੇ ਇਨ੍ਹਾਂ ਵਿੱਚੋਂ ਤਕਨੀਕ ਅਤੇ ਡਿਜੀਟਲ, ਸਹਿਯੋਗ ਦੇ ਉੱਭਰਦੇ ਖੇਤਰ ਹਨ।