News

ਨਨਾਇਮੋ ਆਰ.ਸੀ.ਐਮ.ਪੀ.ਨੇ ਇਕ 62 ਸਾਲਾ ਵਿਅਕਤੀ 'ਤੇ ਹੋਏ ਹਮਲੇ ਮਗਰੋਂ ਜਨਤਾ ਤੋਂ ਮਦਦ ਦੀ ਅਪੀਲ ਕੀਤੀ ਹੈ। ਪੀੜਤ ਨੂੰ ਸੋਮਵਾਰ ਪਹਿਲੀ ਦਸੰਬਰ, 2025 ਨੂੰ ਰਾਤ 9 ਵਜੇ ਤੋਂ ਮਗਰੋਂ ਸ਼ੈਫਰਡ ਐਵੇਨਿਊ ਅਤੇ ਜਾਰਜੀਆ ਐਵੇਨਿਊ ਦੇ ਵਿਚਾਲੇ ਪੰਜਵੀਂ ਸਟ੍ਰੀਟ ਦੇ ਸਾਊਥ 'ਚ ਸਥਿਤ ਇਕ ਗਲ਼ੀ 'ਚ ਬੇਹੋਸ਼ ਪਾਇਆ ਗਿਆ।

ਕੈਨੇਡਾ ਦੇ ਐਟਲਾਂਟਿਕ ਸੂਬਿਆਂ ਵਿਚ ਬਰਫੀਲੇ ਮੌਸਮ ਨੇ ਜਨਜੀਵਨ ਨੂੰ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕੀਤਾ ਹੈ। ਇਸ ਸੀਜ਼ਨ ਦੀ ਪਹਿਲੀ ਮਹੱਤਵਪੂਰਨ ਬਰਫ਼ਬਾਰੀ ਕਾਰਨ ਪ੍ਰਿੰਸ ਐਡਵਰਡ ਆਈਲੈਂਡ ਭਰ ਵਿਚ ਸਾਰੇ ਸਰਕਾਰੀ ਸਕੂਲ ਬੁੱਧਵਾਰ ਨੂੰ ਬੰਦ ਰੱਖੇ ਗਏ। ਇਸੇ ਤਰ੍ਹਾਂ ਨੋਵਾ ਸਕੋਸ਼ੀਆ ਦੇ ਕਈ ਹਿੱਸਿਆਂ ਵਿਚ ਮੀਂਹ ਅਤੇ ਬਰਫ਼ੀਲੇ ਤੂਫ਼ਾਨ ਨੇ ਦਸਤਕ ਦਿੱਤੀ ਹੈ,ਇੱਥੇ ਵੀ ਕੁਝ ਸਕੂਲ ਬੰਦ ਕਰ ਦਿੱਤੇ ਗਏ ਸਨ ਅਤੇ ਹਜ਼ਾਰਾਂ ਘਰਾਂ ਦੀ ਬਿਜਲੀ ਗੁੱਲ ਰਹੀ।

ਕੈਨੇਡਾ ਸਰਕਾਰ ਨੇ ਯੂਕਰੇਨ ਲਈ ਅਮਰੀਕਾ ਤੋਂ $200-ਮਿਲੀਅਨ ਦੇ ਨਵੇਂ ਹਥਿਆਰਾਂ ਦੀ ਖਰੀਦ ਨੂੰ ਮਨਜ਼ੂਰੀ ਦਿੱਤੀ ਹੈ। ਇਹ ਫੰਡਿੰਗ ਇੱਕ ਨਵੇਂ ਵਿਧੀ ਰਾਹੀਂ ਕੀਤੀ ਜਾ ਰਹੀ ਹੈ,ਜਿਸ ਨੂੰ ਰਾਸ਼ਟਰਪਤੀ ਡੌਨਲਡ ਟਰੰਪ ਅਤੇ ਨੈਟੋ ਵਲੋਂ ਸ਼ੁਰੂ ਕੀਤਾ ਗਿਆ ਸੀ। ਇਸ ਕਦਮ ਦਾ ਉਦੇਸ਼ ਵਾਸ਼ਿੰਗਟਨ ਵਲੋਂ ਯੂਕਰੇਨ ਨੂੰ ਸਿੱਧੇ ਯੋਗਦਾਨ ਘਟਾਉਣ ਦੇ ਸੰਕੇਤਾਂ ਤੋਂ ਬਾਅਦ ਸਹਾਇਤਾ ਪ੍ਰਵਾਹ ਨੂੰ ਬਣਾਈ ਰੱਖਣਾ ਹੈ।

ਵੈਨਕੂਵਰ ਆਈਲੈਂਡ 'ਤੇ ਸਥਿਤ ਇਕ ਪਲਪ ਮਿੱਲ 'ਚੋਂ ਕਰੀਬ 350 ਵਰਕਰਸ ਦੀ ਛਾਂਟੀ ਕੀਤੀ ਜਾਵੇਗੀ। ਕੰਪਨੀ ਨੇ ਮੰਗਲਵਾਰ ਐਲਾਨ ਕੀਤਾ ਕਿ ਉਹ ਆਪਣੀ ਸਹੂਲਤ ਸਥਾਈ ਤੌਰ 'ਤੇ ਬੰਦ ਕਰ ਰਹੀ ਹੈ। ਡੋਮਟਾਰ ਕੰਪਨੀ ਦਾ ਕਹਿਣਾ ਹੈ ਕਿ ਲਗਾਤਾਰ ਮਾੜੇ ਬਾਜ਼ਾਰੀ ਹਾਲਾਤਾਂ ਕਾਰਨ ਉਸ ਨੇ ਬੀਸੀ ਦੇ ਕਰੋਫਟਨ'ਚ ਸਥਿਤ ਮਿੱਲ ਨੂੰ ਬੰਦ ਕਰਨ ਦਾ ਔਖਾ ਫੈਸਲਾ ਲਿਆ।

ਸਰੀ ਮੈਮੋਰੀਅਲ ਹਸਪਤਾਲ ਦੇ ਨਿਊਨੇਟਲ ਇੰਟੈਂਸਿਵ ਕੇਅਰ ਯੂਨਿਟ ਵਿਚ ਬੀਤੇ ਦਿਨ ਹੋਈ ਘਟਨਾ ਨੂੰ ਸਿਹਤ ਮੰਤਰੀ ਜੋਸੀ ਓਸਬੋਰਨ ਨੇ ਬੇਹੱਦ ਚਿੰਤਾਜਨਕ ਕਰਾਰ ਦਿੱਤਾ ਹੈ। ਮੰਤਰੀ ਓਸਬੋਰਨ ਨੇ ਵਿਧਾਨ ਸਭਾ ਨੂੰ ਭਰੋਸਾ ਦਿਵਾਇਆ ਕਿ ਇਸ ਘਟਨਾ ਦੇ ਮੱਦੇਨਜ਼ਰ ਫਰੇਜ਼ਰ ਹੈਲਥ ਨੇ ਹਸਪਤਾਲ ਦੇ ਸੁਰੱਖਿਆ ਪ੍ਰੋਟੋਕੋਲ ਨੂੰ ਅੱਪਡੇਟ ਅਤੇ ਸਖ਼ਤ ਕਰ ਦਿੱਤਾ ਹੈ।