News

ਬੀ.ਸੀ. ਐਨ.ਡੀ.ਪੀ. ਦੀ ਸਾਬਕਾ ਮੰਤਰੀ ਤੇ ਸੂਬੇ ਦੀ ਪਹਿਲੀ ਫਰਸਟ ਨੇਸ਼ਨ ਵਿਧਾਇਕ ਮੇਲਾਨੀ ਮਾਰਕ ਨੇ ਬਿੱਲ 15 ਨੂੰ ਲੈ ਕੇ ਪ੍ਰੀਮੀਅਰ ਡੇਵਿਡ ਈਬੀ ਅਤੇ ਉਨ੍ਹਾਂ ਦੇ ਮੰਤਰੀ ਮੰਡਲ ਦੀ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੇ ਵਿਵਾਦਪੂਰਨ ਬਿੱਲ ਪਾਸ ਕਰਕੇ ਫਸਟ ਨੇਸ਼ਨਜ਼, ਸਥਾਨਕ ਸਰਕਾਰਾਂ ਅਤੇ ਵਾਤਾਵਰਣ ਪ੍ਰੇਮੀ ਦੀਆਂ ਚਿੰਤਾਵਾਂ ਨੂੰ ਦਰਕਿਨਾਰ ਕੀਤਾ ਹੈ।

ਰਿਚਮੰਡ ਵਿਚ 6 ਸਾਲ ਪਹਿਲਾਂ 58 ਸਾਲਾ ਸਟੀਫਨ ਚੋਂਗ ਦੀ ਸ਼ੱਕੀ ਹਾਲਤ ਵਿਚ ਹੋਈ ਮੌਤ ਦੇ ਮਾਮਲੇ ਵਿਚ ਕਤਲ ਲਈ ਜ਼ਿੰਮੇਵਾਰ ਵਿਅਕਤੀ ਦੀ ਗ੍ਰਿਫ਼ਤਾਰੀ ਲਈ ਸੂਚਨਾ ਦੇਣ 'ਤੇ $10,000 ਦੇ ਇਨਾਮ ਦੀ ਘੋਸ਼ਣਾ ਕੀਤੀ ਗਈ ਹੈ। ਸੋਸਾਇਟੀ ਆਫ਼ ਨੋਟਰੀਜ਼ ਪਬਲਿਕ ਆਫ ਬੀ.ਸੀ. ਨੇ ਕਿਹਾ ਕਿ ਜੇ ਕਿਸੇ ਕੋਲ ਚੋਂਗ ਦੀ ਹੱਤਿਆ ਲਈ ਜ਼ਿੰਮੇਵਾਰ ਵਿਅਕਤੀ ਬਾਰੇ ਜਾਣਕਾਰੀ ਹੈ ਤਾਂ ਉਸ ਨੂੰ ਏਕੀਕ੍ਰਿਤ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਨੂੰ ਸੂਚਨਾ ਦੇਣ ਦੇ ਬਦਲੇ ਇਨਾਮੀ ਰਾਸ਼ੀ ਦਿੱਤੀ ਜਾਵੇਗੀ।

ਸਟੈਨਲੀ ਕੱਪ ਦੇ ਡਿਫੈਂਡਿੰਗ ਚੈਂਪੀਅਨਸ ਫਲੋਰੀਡਾ ਪੈਂਥਰਸ ਨੇ ਐਨ.ਐਚ.ਐਲ ਦੇ ਈਸਟਰਨ ਕਾਨਫਰੰਸ ਫਾਈਨਲਸ ਵਿੱਚ ਬਾਜ਼ੀ ਮਾਰੀ ਹੈ। ਕੱਲ੍ਹ ਦੇ ਸੀਰੀਜ਼ ਦੇ ਪੰਜਵੇ ਮੁਕਾਬਲੇ ਵਿੱਚ ਪੈਂਥਰਸ ਨੇ ਕੈਰੋਲੀਨਾ ਹਰੀਕੇਨਸ ਨੂੰ 5-3 ਨਾਲ ਮਾਤ ਦੇ ਕੇ ਇਸ ਸੀਰੀਜ਼ ਨੂੰ 4-1 ਦੇ ਫਰਕ ਨਾਲ ਜਿੱਤ ਲਿਆ।

ਐਡਮਿੰਟਨ ਦੇ 15 ਸਾਲਾ ਲੜਕੇ ਨੂੰ ਅੱਤਵਾਦ ਨਾਲ ਜੁੜੇ ਅਪਰਾਧ ਦੇ ਦੋਸ਼ ਵਿਚ ਹਿਰਾਸਤ ਵਿਚ ਲਿਆ ਗਿਆ ਹੈ। ਕੈਨੇਡਾ ਦੀ ਨੈਸ਼ਨਲ ਸਕਿਓਰਟੀ ਪੁਲਿਸ ਵਲੋਂ ਉਸ ਨੂੰ 12 ਮਈ ਨੂੰ ਕਾਬੂ ਕੀਤਾ ਗਿਆ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੂੰ ਡਰ ਸੀ ਕਿ ਨੌਜਵਾਨ COM/764 ਹਿੰਸਕ ਆਨਲਾਈਨ ਨੈੱਟਵਰਕ ਨਾਲ ਸਬੰਧਤ ਅੱਤਵਾਦ ਨਾਲ ਜੁੜੇ ਅਪਰਾਧ ਕਰ ਸਕਦਾ ਹੈ।

ਅਮਰੀਕਾ ਦੇ ਇੱਕ ਫੈਡਰਲ ਜੱਜ ਨੇ ਹਾਰਵਰਡ ਯੂਨੀਵਰਸਿਟੀ 'ਤੇ ਵਿਦੇਸ਼ੀ ਸਟੂਡੈਂਟਸ ਨੂੰ ਦਾਖ਼ਲਾ ਦੇਣ 'ਤੇ ਬੈਨ ਲਗਾਉਣ ਦੀ ਟਰੰਪ ਸਰਕਾਰ ਦੀ ਕਾਰਵਾਈ 'ਤੇ ਇਸ ਮਾਮਲੇ ਵਿਚ ਫੈਸਲਾ ਆਉਣ ਤੱਕ ਰੋਕ ਵਧਾ ਦਿੱਤੀ ਹੈ।ਹਾਰਵਰਡ ਨੇ ਸ਼ੁੱਕਰਵਾਰ ਮੈਸੇਚਿਉਸੇਟਸ ਸਥਿਤ ਫੈਡਰਲ ਅਦਾਲਤ ਵਿਚ ਹੋਮਲੈਂਡ ਸਕਿਓਰਿਟੀ ਡਿਪਾਰਟਮੈਂਟ ਦੇ ਫੈਸਲੇ ਖਿਲਾਫ ਮੁਕੱਦਮਾ ਦਾਇਰ ਕੀਤਾ ਸੀ।

ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਅਮਰੀਕਾ ਦੀ ਇੰਟਰਨੈਸ਼ਨਲ ਟਰੇਡ ਕੋਰਟ ਵਲੋਂ ਰਾਸ਼ਟਰਪਤੀ ਡੋਨਲਡ ਟਰੰਪ ਦੇ ਟੈਰਿਫਸ 'ਤੇ ਰੋਕ ਲਾਉਣ ਦੇ ਕਦਮ ਦਾ ਸਵਾਗਤ ਕੀਤਾ ਹੈ। ਇਸ ਦੇ ਨਾਲ ਹੀ ਪ੍ਰਧਾਨ ਮੰਤਰੀ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਕੈਨੇਡਾ ਆਪਣੇ ਵਪਾਰ ਨੂੰ ਹੋਰ ਬਾਜ਼ਾਰਾਂ ਨਾਲ ਜੋੜਨ 'ਤੇ ਕੰਮ ਕਰਨਾ ਜਾਰੀ ਰੱਖੇਗਾ ਕਿਉਂਕਿ ਟਰੰਪ ਵਲੋਂ ਸਟੀਲ ਐਲੂਮੀਨੀਅਮ ਅਤੇ ਆਟੋਮੋਟਿਵ ਟੈਰਿਫ ਖ਼ਤਮ ਨਹੀਂ ਕੀਤੇ ਗਏ ਹਨ।

ਕੈਨੇਡਾ ਤੋਂ ਅਮਰੀਕਾ ਵਿਚ ਦਾਖਲ ਹੋਣ ਦੀ ਕੋਸ਼ਿਸ਼ ਕਰਦੇ ਸਮੇਂ ਮਾਈਨਸ 38 ਡਿਗਰੀ ਸੈਲਸੀਅਸ ਦੀ ਠੰਡ ਵਿਚ ਜੰਮ ਕੇ ਮਰੇ ਗੁਜਰਾਤ ਨਾਲ ਸਬੰਧਤ ਭਾਰਤੀ ਪਰਿਵਾਰ ਦੀ ਮੌਤ ਵਿਚ ਮਨੁੱਖੀ ਤਸਕਰੀ ਦੇ ਦੂਜੇ ਦੋਸ਼ੀ 50 ਸਾਲਾ ਸਟੀਵ ਸ਼ੈਂਡ ਨੂੰ ਸਾਢੇ ਛੇ ਸਾਲ ਦੀ ਕੈਦ ਹੋਈ ਹੈ।ਅਮਰੀਕਾ ਦੀ ਮਿਨੀਸੋਟਾ ਅਦਾਲਤ ਨੇ ਬੀਤੀ ਸ਼ਾਮ ਹਰਸ਼ਕੁਮਾਰ ਪਟੇਲ ਅਤੇ ਸ਼ੈਂਡ ਖਿਲਾਫ ਸਜ਼ਾ ਦਾ ਐਲਾਨ ਕੀਤਾ।

ਟੇਸਲਾ ਦੇ ਸੀਈਓ ਈਲੋਨ ਮਸਕ ਟਰੰਪ ਸਰਕਾਰ ਤੋਂ ਵੱਖ ਹੋ ਗਏ ਹਨ। ਉਨ੍ਹਾਂ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ 'ਤੇ ਇੱਕ ਪੋਸਟ ਵਿਚ ਇਹ ਜਾਣਕਾਰੀ ਦਿੱਤੀ। ਮਸਕ ਦਾ ਸਰਕਾਰ ਤੋਂ ਬਾਹਰ ਹੋਣਾ ਉਨ੍ਹਾਂ ਵਲੋਂ ਟਰੰਪ ਦੇ ਬਜਟ ਪ੍ਰਤੀ ਨਿਰਾਸ਼ਾ ਜ਼ਾਹਰ ਕਰਨ ਤੋਂ ਬਾਅਦ ਆਇਆ ਹੈ, ਜਿਸ ਵਿਚ ਮਲਟੀ-ਬਿਲੀਅਨ ਡਾਲਰ ਦੀ ਟੈਕਸ ਛੋਟ ਦੇਣ ਅਤੇ ਰੱਖਿਆ ਖਰਚ ਨੂੰ ਵਧਾਉਣ ਦੇ ਪ੍ਰਸਤਾਵ ਸ਼ਾਮਲ ਹਨ। ਟਰੰਪ ਨੇ ਆਪਣੇ ਬਜਟ ਬਿੱਲ ਨੂੰ ਵੱਡਾ ਅਤੇ ਬਿਹਤਰ ਦੱਸਿਆ ਸੀ ਅਤੇ ਮਸਕ ਨੇ ਇਸ ਬਿੱਲ ਦੀ ਆਲੋਚਨਾ ਕੀਤੀ ਸੀ।

ਪੰਜਾਬੀ ਗਾਇਕ ਸ਼ੁਭਦੀਪ ਸਿੰਘ ਸਿੱਧੂ ਉਰਫ਼ ਸਿੱਧੂ ਮੂਸੇਵਾਲਾ ਦੀ ਅੱਜ ਤੀਜੀ ਬਰਸੀ ਸੀ। 29 ਮਈ 2022 ਦੀ ਸ਼ਾਮ ਉਨ੍ਹਾਂ ਦਾ ਮਾਨਸਾ ਦੇ ਪਿੰਡ ਜਵਾਹਰਕੇ ਵਿਚ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਸੂਬਾ ਸਰਕਾਰ ਨੇ ਉਨ੍ਹਾਂ ਦੀ ਸੁਰੱਖਿਆ ਵਿਚ ਇੱਕ ਦਿਨ ਪਹਿਲਾਂ ਹੀ ਕਟੌਤੀ ਕੀਤੀ ਸੀ। ਉਹ 28 ਸਾਲ ਦੇ ਸਨ, ਅੱਜ ਉਨ੍ਹਾਂ ਦੀ ਬਰਸੀ ਮੌਕੇ ਪਰਿਵਾਰ ਵਲੋਂ ਪਿੰਡ ਮੂਸਾ ਵਿਚ ਸ੍ਰੀ ਸਹਿਜ ਪਾਠ ਦੇ ਭੋਗ ਪਾਏ ਗਏ।