News

ਬੀ. ਸੀ. ਵਿਚ ਲੋਕਾਂ ਦੇ ਘਰਾਂ ਦੇ ਬਿਜਲੀ ਬਿੱਲ ਵਧਣ ਜਾ ਰਹੇ ਹਨ। ਸੂਬਾ ਸਰਕਾਰ ਨੇ ਬੀ. ਸੀ. ਹਾਈਡਰੋ ਲਈ ਦਰਾਂ ਵਿਚ 3.75 ਫੀਸਦੀ ਵਾਧੇ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ, ਇਹ ਨਵੀਂ ਦਰ 1 ਅਪ੍ਰੈਲ ਤੋਂ ਲਾਗੂ ਹੋਣ ਜਾ ਰਹੀ ਹੈ। ਹਾਲਾਂਕਿ, ਸੂਬਾ ਸਰਕਾਰ ਦਾ ਕਹਿਣਾ ਹੈ ਕਿ ਬੀ. ਸੀ. ਹਾਈਡਰੋ ਲਈ ਅਗਲੇ 2 ਸਾਲਾਂ ਵਾਸਤੇ ਦਰਾਂ ਵਧਾਉਣ ਦੀ ਇੱਕ ਲਿਮਟ ਤੈਅ ਕਰ ਦਿੱਤੀ ਗਈ ਹੈ, ਜੋ 3.75 ਫੀਸਦੀ ਹੋਵੇਗੀ।

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ 'ਤੇ ਵੱਡਾ ਦੋਸ਼ ਲਗਾਇਆ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਕਾਰਨੀ ਨੇ ਇਲੈਕਸ਼ਨ ਟਪਾਉਣ ਲਈ ਖਪਤਕਾਰ ਕਾਰਬਨ ਟੈਕਸ ਨੂੰ ਕੁਝ ਦੇਰ ਲਈ ਲੁਕਾਇਆ ਹੈ ਅਤੇ ਇਸ ਨੂੰ ਖ਼ਤਮ ਕਰਨ ਸਬੰਧੀ ਉਨ੍ਹਾਂ ਵਲੋਂ ਦਸਤਖ਼ਤ ਕੀਤਾ ਗਿਆ ਕਾਰਜਕਾਰੀ ਆਦੇਸ਼ ਫਰਜ਼ੀ ਹੈ। ਪੌਲੀਐਵ ਨੇ ਕਿਹਾ ਕਿ ਇਹ ਅਜੇ ਵੀ ਲਾਗੂ ਹੈ ਅਤੇ ਕਿਤੇ ਵੀ ਖ਼ਤਮ ਨਹੀਂ ਕੀਤਾ ਗਿਆ ਹੈ। ਪੌਲੀਐਵ ਮੁਤਾਬਕ, ਚੋਣਾਂ ਤੋਂ ਬਾਅਦ ਇਸ ਨੂੰ ਵਾਪਸ ਲਾਗੂ ਕੀਤਾ ਜਾ ਸਕਦਾ ਹੈ।

ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਅਤੇ ਆਮ ਆਦਮੀ ਪਾਰਟੀ ਦੇ ਸੁਪਰੀਮੋ ਅਰਵਿੰਦ ਕੇਜਰੀਵਾਲ ਅੱਜ ਲੁਧਿਆਣਾ ਦੇ ਜਵਾਹਰ ਨਗਰ ਵਿਖੇ ਪਹੁੰਚੇ। ਇਥੇ ਉਨ੍ਹਾਂ ਵੱਲੋਂ ਲੁਧਿਆਣਾ ਵੈਸਟ ਹਲਕੇ ਤੋਂ ਜ਼ਿਮਨੀ ਚੋਣ ਲਈ ਐਲਾਨੇ ਗਏ ਉਮੀਦਵਾਰ ਸੰਜੀਵ ਅਰੋੜਾ ਦੇ ਹੱਕ ਵਿਚ ਰੈਲੀ ਕੀਤੀ ਗਈ।

ਐਡਮਿੰਟਨ ਅਤੇ ਫੋਰਟ ਮੈਕਮਰੀ ਦੇ ਐਜੂਕੇਸ਼ਨ ਸਟਾਫ ਵਲੋਂ ਜਾਰੀ ਹੜਤਾਲ ਖਤਮ ਹੋ ਗਈ ਹੈ। 4000 ਤੋਂ ਵੱਧ ਸਟਾਫ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਨੇ ਸ਼ਨੀਵਾਰ ਦੱਸਿਆ ਕਿ 2 ਮਹੀਨਿਆਂ ਦੀ ਮਿਹਨਤ ਦੇ ਬਾਅਦ ਸਟਾਫ ਦੀਆਂ ਮੰਗਾਂ ਸੁਣੀਆਂ ਗਈਆਂ ਹਨ। ਕੈਨੇਡੀਅਨ ਯੂਨੀਅਨ ਆਫ਼ ਪਬਲਿਕ ਇੰਪਲਾਈਜ਼ ਮੁਤਾਬਕ ਇਹ ਡੀਲ ਐਡਮਿੰਟਨ ਪਬਲਿਕ ਸਕੂਲ ਬੋਰਡ, ਫੋਰਟ ਮੈਕਮਰੀ ਦੇ ਪਬਲਿਕ ਅਤੇ ਕੈਥੋਲਿਕ ਸਕੂਲ ਬੋਰਡ ਲਈ ਅਪਲਾਈ ਹੋਵੇਗੀ।

ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਲਡ ਟਰੰਪ ਵਲੋਂ 227 ਸਾਲ ਪੁਰਾਣੇ ਏਲੀਅਨ ਐਨਾਮੀਸ ਐਕਟ ਤਹਿਤ ਦੇਸ਼ ਨਿਕਾਲਾ ਦੇਣ ਦੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਗਈ ਹੈ। ਐਤਵਾਰ ਨੂੰ ਵੈਨਜ਼ੁਏਲਾ ਨਾਲ ਸਬੰਧਤ 261 ਪ੍ਰਵਾਸੀਆਂ ਨੂੰ ਐਲ ਸੈਲਵੇਡੋਰ ਦੀ ਸੁਪਰਮੈਕਸ ਜੇਲ੍ਹ ਭੇਜਿਆ ਗਿਆ ਹੈ। ਅਮਰੀਕਾ ਨੇ ਇਨ੍ਹਾਂ ਨੂੰ ਡਰੱਗਜ਼ ਵੇਚਣ ਵਾਲੀ ਗੈਂਗ ਦੇ ਮੈਂਬਰ ਦੱਸਦੇ ਹੋਏ ਏਲੀਅਨ ਐਨਾਮੀਸ ਐਕਟ ਤਹਿਤ ਕਾਰਵਾਈ ਕੀਤੀ।

ਬੀ. ਸੀ. ਦੀ 35 ਸਾਲਾ ਜੈਸਮੀਨ ਮੂਨੀ- ਅਮਰੀਕਾ ਵਿਚ 11 ਦਿਨ ਹਿਰਾਸਤ ਸੈਂਟਰ ਵਿਚ ਰਹਿਣ ਮਗਰੋਂ ਘਰ ਵਾਪਸ ਆ ਚੁੱਕੀ ਹੈ। ਅਮਰੀਕੀ ਇਮੀਗ੍ਰੇਸ਼ਨ ਅਧਿਕਾਰੀਆਂ ਨੇ ਇਸੇ ਮਹੀਨੇ ਦੇ ਸ਼ੁਰੂ ਵਿਚ ਉਸ ਨੂੰ ਉਸ ਸਮੇਂ ਹਿਰਾਸਤ ਵਿਚ ਲੈ ਲਿਆ ਸੀ ਜਦੋਂ ਉਹ ਆਪਣਾ ਵਰਕ ਵੀਜ਼ਾ ਰਿਨਿਊ ਕਰਵਾਉਣ ਲਈ ਮੈਕਸੀਕੋ ਤੋਂ ਅਮਰੀਕਾ ਦੀ ਸਰਹੱਦ ਪਾਰ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਸੀ।

ਐਡਮਿੰਟਨ ਵਿਚ ਪਿਛਲੇ ਹਫਤੇ ਖਸਰੇ ਦੇ ਦੋ ਮਾਮਲੇ ਸਾਹਮਣੇ ਆਏ, ਜਿਨ੍ਹਾਂ ਬਾਰੇ ਹੁਣ ਪੁਸ਼ਟੀ ਹੋਈ ਹੈ। ਐਲਬਰਟਾ ਹੈਲਥ ਸਰਵਿਸਿਜ਼ ਨੇ ਐਤਵਾਰ ਰਾਤ ਮੀਡੀਆ ਰਿਲੀਜ਼ ਵਿਚ ਇਸ ਦੀ ਜਾਣਕਾਰੀ ਸਾਂਝੀ ਕੀਤੀ। ਔਫੀਸ਼ੀਅਲਜ਼ ਮੁਤਾਬਕ 12 ਮਾਰਚ ਨੂੰ 16703 82 ਸੇਂਟ. ਨੌਰਥ ਵੈਸਟ ਦੇ ਬੇਲੇ ਰਿਵ ਮੈਡੀਸੈਂਟਰਸ ਫੈਮਿਲੀ ਹੈਲਥ ਕੇਅਰ ਕਲੀਨਿਕ ਅਤੇ 14-15 ਮਾਰਚ ਨੂੰ 8440 112 ਸੇਂਟ. ਨੌਰਥ ਵੈਸਟ ਦੇ ਸਟੌਲਰੀ ਚਿਲਡਰਨ ਹਸਪਤਾਲ ਵਿਚ ਇਹ ਲੋਕ ਮੌਜੂਦ ਸਨ।

ਪੰਜਾਬ ਦੇ ਬਹੁ ਕਰੋੜੀ ਨਸ਼ਾ ਤਸਕਰੀ ਮਾਮਲੇ ਵਿਚ ਵਿਸ਼ੇਸ ਜਾਂਚ ਟੀਮ ਵਲੋਂ ਅੱਜ ਪਟਿਆਲਾ ਪੁਲਿਸ ਲਾਈਨ ਵਿਖੇ ਬਿਕਰਮ ਮਜੀਠੀਆ ਤੋਂ ਸੱਤ ਤੋਂ ਅੱਠ ਘੰਟੇ ਪੁੱਛਗਿੱਛ ਕੀਤੀ ਗਈ। ਇਸ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਮਜੀਠੀਆ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੇ ਹੀ ਸੁਪਰੀਮ ਕੋਰਟ ਵਿਚ ਅਰਜ਼ੀ ਦਿੱਤੀ ਸੀ ਕਿ ਸਬੰਧਤ ਧਿਰਾਂ ਨੂੰ ਹਦਾਇਤ ਕੀਤੀ ਜਾਵੇ ਕਿ ਇਸ ਮਾਮਲੇ ਨੂੰ ਉਹ ਛੇਤੀ ਨਿਬੇੜਨ ਜਿਸ ਦੇ ਚੱਲਦਿਆਂ ਹੀ ਅਦਾਲਤ ਨੇ ਅੱਜ ਦਾ ਦਿਨ ਮੁਕੱਰਰ ਕੀਤਾ ਸੀ ਅਤੇ ਅਦਾਲਤ ਦੇ ਕਹਿਣ ’ਤੇ ਹੀ ਉਹ ਅੱਜ ਇਥੇ ਪੇਸ਼ ਹੋਏ।

ਕੈਨੇਡਾ ਵਿਚ ਚੋਣਾਂ ਦਾ ਜਲਦ ਬਿਗਲ ਵੱਜ ਸਕਦਾ ਹੈ। ਮਾਰਕ ਕਾਰਨੀ ਵਲੋਂ ਸੰਸਦ ਦੀ ਕਾਰਵਾਈ 24 ਮਾਰਚ ਨੂੰ ਮੁੜ ਸ਼ੁਰੂ ਹੋਣ ਤੋਂ ਪਹਿਲਾਂ ਚੋਣਾਂ ਦਾ ਸੱਦਾ ਦਿੱਤੇ ਜਾਣ ਦੀ ਉਮੀਦ ਹੈ। ਰਿਪੋਰਟਸ ਮੁਤਾਬਕ, ਕਾਰਨੀ ਵੀਐਂਡ 'ਤੇ ਆਮ ਚੋਣਾਂ ਦੀ ਘੋਸ਼ਣਾ ਕਰ ਸਕਦੇ ਹਨ ਅਤੇ ਇਸ ਤੋਂ ਪਹਿਲਾਂ ਇਸ ਹਫ਼ਤੇ ਪ੍ਰੀਮੀਅਰਾਂ ਦੀ ਇੱਕ ਬੈਠਕ ਬੁਲਾਉਣਗੇ।