News

ਕਿਊਬੈਕ ਸਰਕਾਰ ਨੇ ਭਾਰੀ ਵਾਹਨਾਂ ਨਾਲ ਹੋਣ ਵਾਲੇ ਹਾਦਸਿਆਂ ਨੂੰ ਰੋਕਣ ਲਈ ਓਨਟਾਰੀਓ ਦੇ ਘੱਟ ਤਜਰਬੇਕਾਰ ਟਰੱਕ ਡਰਾਈਵਰਾਂ ਲਈ ਨਵੇਂ ਨਿਯਮਾਂ ਦਾ ਐਲਾਨ ਕੀਤਾ ਹੈ। ਵੀਰਵਾਰ ਨੂੰ ਕੀਤੇ ਗਏ ਇਸ ਐਲਾਨ ਅਨੁਸਾਰ, ਓਨਟਾਰੀਓ ਦੇ ਉਹ ਟਰੱਕ ਡਰਾਈਵਰ ਜਿਨ੍ਹਾਂ ਕੋਲ ਕਲਾਸ 1 ਡਰਾਈਵਿੰਗ ਲਾਇਸੰਸ ਦਾ ਦੋ ਸਾਲ ਤੋਂ ਘੱਟ ਦਾ ਤਜਰਬਾ ਹੈ ਅਤੇ ਉਹ ਕਿਊਬੈਕ ਵਿਚ ਕੰਮ ਕਰਨ ਲਈ ਆਪਣਾ ਲਾਇਸੰਸ ਬਦਲਵਾਉਣਾ ਚਾਹੁੰਦੇ ਹਨ, ਉਨ੍ਹਾਂ ਨੂੰ ਹੁਣ ਪ੍ਰੈਕਟੀਕਲ ਪ੍ਰੀਖਿਆ ਪਾਸ ਕਰਨੀ ਹੋਵੇਗੀ। ਜੇਕਰ ਕੋਈ ਡਰਾਈਵਰ ਇਸ ਟੈਸਟ ਵਿਚ ਦੋ ਵਾਰ ਫੇਲ੍ਹ ਹੋ ਜਾਂਦਾ ਹੈ ਤਾਂ ਉਸ ਲਈ ਟ੍ਰੇਨਿੰਗ ਲੈਣਾ ਲਾਜ਼ਮੀ ਹੋਵੇਗਾ।

ਬੀ.ਸੀ.ਦੇ ਫਰੇਜ਼ਰ ਕੈਨਿਯਨ ਇਲਾਕੇ ਵਿਚ ਬੇਕਾਬੂ ਹੋਈਆਂ ਦੋ ਜੰਗਲੀ ਅੱਗਾਂ ਕਾਰਨ ਕਈ structures ਤਬਾਹ ਹੋਣ ਦੀ ਪੁਸ਼ਟੀ ਕੀਤੀ ਗਈ ਹੈ। ਹਾਲਾਂਕਿ, ਫਰੇਜ਼ਰ ਵੈਲੀ ਰੀਜਨਲ ਡਿਸਟ੍ਰਿਕਟ ਦਾ ਕਹਿਣਾ ਹੈ ਕਿ ਬੋਸਟਨ ਬਾਰ ਦੇ ਨਜ਼ਦੀਕ ਬਲ ਰਹੀਆਂ ਅੱਗਾਂ ਕਾਰਨ ਜ਼ਮੀਨੀ ਹਾਲਾਤ ਫਿਲਹਾਲ ਇੰਨੇ ਖ਼ਤਰਨਾਕ ਹਨ ਕਿ ਨੁਕਸਾਨ ਦਾ ਸਹੀ ਅਨੁਮਾਨ ਨਹੀਂ ਲਗਾਇਆ ਜਾ ਸਕਦਾ।

ਸਰੀ ਵਿਚ ਬੁੱਧਵਾਰ ਰਾਤ ਨੂੰ ਪੁਲਿਸ ਅਤੇ ਇੱਕ ਚਾਕੂਧਾਰੀ ਵਿਅਕਤੀ ਵਿਚਕਾਰ ਹੋਈ ਝੜਪ ਦੌਰਾਨ ਗੋਲੀ ਚੱਲਣ ਦੀ ਘਟਨਾ ਸਾਹਮਣੇ ਆਈ ਹੈ। ਇਹ ਘਟਨਾ ਰਾਤ ਲਗਭਗ 8 ਵਜੇ ਨੌਰਥ ਸਰੀ ਦੇ ਬੋਲੀਵਰ ਇਲਾਕੇ ਵਿਚ 148 ਸਟ੍ਰੀਟ ਅਤੇ Ellendale Drive ਨੇੜੇ ਵਾਪਰੀ, ਜਿਥੇ ਸਰੀ ਆਰਸੀਐਮਪੀ ਪ੍ਰੋਵਿੰਸ਼ੀਅਲ ਆਪਰੇਸ਼ਨਲ ਸਪੋਰਟ ਯੂਨਿਟ ਦੇ ਇੱਕ ਅਧਿਕਾਰੀ ਵੱਲੋਂ ਕਥਿਤ ਤੌਰ 'ਤੇ ਚਾਕੂ ਲੈ ਕੇ ਘੁੰਮ ਰਹੇ ਇੱਕ ਵਿਅਕਤੀ 'ਤੇ ਗੋਲੀ ਚਲਾਈ ਗਈ।

ਵੈਨਕੂਵਰ ਪੁਲਿਸ ਨੇ ਇੱਕ ਬਜ਼ੁਰਗ ਮਹਿਲਾ ਨਾਲ ਹੋਈ ਡਿਸਟ੍ਰੈਕਸ਼ਨ ਚੋਰੀ ਦੀ ਘਟਨਾ ਦੇ ਸਬੰਧ ਵਿਚ ਜਾਂਚ ਲਈ ਇੱਕ ਗ੍ਰੇਅ ਰੰਗ ਦੀ ਟੇਸਲਾ ਕਾਰ ਦੀ ਫੁਟੇਜ ਜਾਰੀ ਕੀਤੀ ਹੈ।ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ 23 ਜੂਨ ਨੂੰ ਹੋਈ ਇਸ ਟਾਰਗੇਟਡ ਘਟਨਾ ਦੀ ਟੇਸਲਾ ਨੇ ਵੀਡੀਓ ਰਿਕਾਰਡ ਕੀਤੀ ਹੋ ਸਕਦੀ ਹੈ।

ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਪੀਅਰ ਪੌਲੀਐਵ ਨੇ ਲਾਰੈਂਸ ਬਿਸ਼ਨੋਈ ਗੈਂਗ ਨੂੰ ਲੈ ਕੇ ਦੇਸ਼ ਦੇ ਇਮੀਗ੍ਰੇਸ਼ਨ ਅਤੇ ਅਪਰਾਧ ਕਾਨੂੰਨ ਨੂੰ ਕਮਜ਼ੋਰ ਦੱਸਦਿਆਂ ਲਿਬਰਲ ਸਰਕਾਰ 'ਤੇ ਤਿੱਖਾ ਨਿਸ਼ਾਨਾ ਸਾਧਿਆ ਹੈ। ਉਨ੍ਹਾਂ ਦੋਸ਼ ਲਗਾਇਆ ਹੈ ਕਿ ਇਨ੍ਹਾਂ ਨੀਤੀਆਂ ਕਾਰਨ ਹੀ ਅੱਜ ਦੇਸ਼ ਵਿਚ ਗੈਂਗਸਟਰ ਨੈੱਟਵਰਕ ਵਧਿਆ ਹੈ।