News

ਕੈਨੇਡਾ ਦੀ ਫੈਡਰਲ ਰਾਜਨੀਤੀ ਵਿਚ ਫਲੌਰ ਕਰਾਰਸਿੰਗ ਯਾਨੀ ਦਲ-ਬਦਲੂ ਦੀਆਂ ਚਰਚਾਵਾਂ ਨੇ ਜ਼ੋਰ ਫੜ ਲਿਆ ਹੈ। ਫੈਡਰਲ ਐਨਰਜੀ ਮਿਨਿਸਟਰ ਟਿਮ ਹੋਡਗਸਨ ਨੇ ਇਹ ਕਹਿ ਕੇ ਸਿਆਸੀ ਹਲਚਲ ਪੈਦਾ ਕਰ ਦਿੱਤੀ ਹੈ ਕਿ ਲਿਬਰਲ ਸਰਕਾਰ ਵਿਚ ਸ਼ਾਮਲ ਹੋਣ ਲਈ ਵਿਰੋਧੀ ਪਾਰਟੀਆਂ ਦੇ ਹੋਰ ਐਮ.ਪੀ. ਸੰਪਰਕ ਕਰ ਰਹੇ ਹਨ।

ਬੀ. ਸੀ. ਵਿਚ ਇਨਵਾਇਰਮੈਂਟ ਕੈਨੇਡਾ ਵਲੋਂ ਕਈ ਜਗ੍ਹਾ ਬਾਰਿਸ਼ ਦੀ ਚਿਤਾਵਨੀ ਦਿੱਤੀ ਗਈ ਹੈ, ਜਿਸ ਵਿਚ ਮੈਟਰੋ ਵੈਨਕੂਵਰ, ਫਰੇਜ਼ਰ ਵੈਲੀ ,ਹੋਵੇ ਸਾਊਂਡ ਅਤੇ ਕੋਸਟ ਇਲਾਕੇ ਸ਼ਾਮਲ ਹਨ। ਮੌਸਮ ਏਜੰਸੀ ਮੁਤਾਬਕ, ਕੁਝ ਉੱਚੇ ਇਲਾਕਿਆਂ ਵਿਚ 80 ਮਿਲੀ ਲੀਟਰ ਤੱਕ ਬਾਰਸ਼ ਹੋਣ ਦੀ ਉਮੀਦ ਹੈ।

ਕੈਨੇਡਾ ਵਿਚ ਫਲੂ ਨਾਲ ਸਬੰਧਤ ਮਾਮਲੇ ਵੱਧ ਰਹੇ ਹਨ। ਪਬਲਿਕ ਹੈਲਥ ਮੁਤਾਬਕ, ਔਟਵਾ ਅਤੇ ਈਸਟਰਨ ਓਨਟਾਰੀਓ ਵਿਚ ਇਨਫਲੂਐਨਜ਼ਾ ਨਾਲ ਸਬੰਧਤ ਪੇਚੀਦਗੀਆਂ ਕਾਰਨ ਪਿਛਲੇ ਦੋ ਹਫ਼ਤਿਆਂ ਵਿਚ ਤਿੰਨ ਬੱਚਿਆਂ ਦੀ ਮੌਤ ਹੋ ਗਈ ਹੈ। ਔਟਵਾ ਅਤੇ ਈਸਟਰਨ ਓਨਟਾਰੀਓ ਹੈਲਥ ਯੂਨਿਟ ਦੇ ਮੈਡੀਕਲ ਔਫੀਸਰ ਮੁਤਾਬਕ, ਮ੍ਰਿਤਕ ਬੱਚਿਆਂ ਦੀ ਉਮਰ ਪੰਜ ਤੋਂ ਨੌਂ ਸਾਲ ਵਿਚਕਾਰ ਸੀ।

ਸਰੀ ਵਿਚ ਐਤਵਾਰ ਇੱਕ ਔਰਤ ਦੀ ਪੁਲਿਸ ਗੱਡੀ ਨਾਲ ਟਕਰਾਉਣ ਕਾਰਨ ਮੌਤ ਹੋ ਗਈ। ਇਹ ਘਟਨਾ 152 ਸਟ੍ਰੀਟ ਅਤੇ 64 ਐਵੇਨਿਊ ਦੇ ਚੌਰਾਹੇ 'ਤੇ ਰਾਤ 7.20 ਵਜੇ ਦੇ ਕਰੀਬ ਵਾਪਰੀ। ਪੁਲਿਸ ਅਨੁਸਾਰ, ਜ਼ਖਮੀ ਔਰਤ ਨੂੰ ਬਚਾਉਣ ਦੀਆਂ ਕੋਸ਼ਿਸ਼ਾਂ ਦੇ ਬਾਵਜੂਦ ਉਸ ਨੇ ਘਟਨਾ ਸਥਾਨ 'ਤੇ ਦਮ ਤੋੜ ਦਿੱਤਾ। ਸੂਬੇ ਦੇ ਪੁਲਿਸ ਵਾਚਡੌਗ, ਇੰਡੀਪੈਂਡੈਂਟ ਇਨਵੈਸਟੀਗੇਸ਼ਨਜ਼ ਆਫਿਸ ਆਫ ਬੀ.ਸੀ. ਵਲੋਂ ਮਾਮਲੇ ਦੀ ਜਾਂਚ ਸੰਭਾਲੀ ਗਈ ਹੈ।

ਪੰਜਾਬ 'ਚ ਪਿਛਲੇ ਦਿਨੀਂ ਅੰਮ੍ਰਿਤਸਰ ਦੇ ਕਈ ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲਣ ਤੋਂ ਬਾਅਦ ਹੁਣ ਜਲੰਧਰ ਦੇ ਲਗਭਗ 11 ਸਕੂਲਾਂ ਨੂੰ ਸੋਮਵਾਰ ਸਵੇਰੇ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲੀ ਹੈ। ਇਹ ਧਮਕੀ ਈਮੇਲ ਰਾਹੀਂ ਭੇਜੀ ਗਈ। ਇਸ ਧਮਕੀ ਤੋਂ ਬਾਅਦ ਸਕੂਲਾਂ ਦੇ ਸਟਾਫ਼ ਅਤੇ ਬੱਚਿਆਂ ਦੇ ਮਾਪਿਆਂ ਵਿੱਚ ਡਰ ਦਾ ਮਾਹੌਲ ਪੈਦਾ ਹੋ ਗਿਆ।