News

ਕੈਨੇਡਾ ਵਿਚ ਫੈਡਰਲ ਚੋਣਾਂ ਲਈ ਕੰਪੇਨ ਸ਼ੁਰੂ ਹੋ ਚੁੱਕੀ ਹੈ। ਪ੍ਰਧਾਨ ਮੰਤਰੀ ਦੀ ਦੌੜ ਵਿਚ ਲਿਬਰਲ ਵਲੋਂ ਮਾਰਕ ਕਾਰਨੀ, ਕੰਜ਼ਰਵੇਟਿਵ ਵਲੋਂ ਪੀਅਰ ਪੌਲੀਐਵ ਅਤੇ ਐੱਨ. ਡੀ. ਪੀ. ਵਲੋਂ ਜਗਮੀਤ ਸਿੰਘ ਮੈਦਾਨ ਵਿਚ ਹਨ। ਇਹ ਚੋਣਾਂ ਨਿਰਧਾਰਤ ਮਿਆਦ ਤੋਂ 6 ਮਹੀਨੇ ਪਹਿਲਾਂ ਹੋ ਰਹੀਆਂ ਹਨ। ਕਾਰਨੀ ਵਲੋਂ ਬੀਤੇ ਕੱਲ੍ਹ ਗਵਰਨਰ ਜਨਰਲ ਮੈਰੀ ਸਾਈਮਨ ਨਾਲ ਮੁਲਾਕਾਤ ਕਰਕੇ ਸੰਸਦ ਭੰਗ ਕੀਤੀ ਗਈ ਅਤੇ 28 ਅਪ੍ਰੈਲ ਨੂੰ ਚੋਣਾਂ ਕਰਵਉਣ ਦੀ ਘੋਸ਼ਣਾ ਕੀਤੀ ਗਈ ਹੈ। ਐਂਡਵਾਂਸ ਵੋਟਿੰਗ ਈਸਟਰ ਵੀਕਐਂਡ 'ਤੇ ਸ਼ੁਰੂ ਹੋ ਸਕਦੀ ਹੈ। ਉੱਥੇ ਹੀ, ਪਹਿਲੀ ਵਾਰ ਚੋਣ ਲੜ ਰਹੇ ਮਾਰਕ ਕਾਰਨੀ ਔਟਵਾ ਦੀ ਨਪੀਅਨ ਰੀਡਿੰਗ ਤੋਂ ਮੈਦਾਨ ਵਿਚ ਉਤਰੇ ਹਨ, ਜੋ ਕਿ ਪੌਲੀਐਵ ਦੀ ਰਾਈਡਿੰਗ ਕਾਰਲਟਨ ਦੇ ਗੁਆਂਢ ਵਿਚ ਹੈ।

ਵੈਨਕੂਵਰ ਦੇ ਕਿਟਸੀਲਾਨੋ ਵਿਚ ਟੇਸਲਾ ਡੀਲਰਸ਼ਿਪ ਨੂੰ ਦੇਰ ਰਾਤ ਸਪਰੇਅ-ਪੇਂਟ ਨਾਲ ਟਾਰਗੇਟ ਕੀਤੇ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਹ 2025 ਦੀ ਸ਼ੁਰੂਆਤ ਤੋਂ ਹੁਣ ਤੱਕ ਦੀ 8ਵੀਂ ਘਟਨਾ ਹੈ। ਪੁਲਿਸ ਨੇ ਕਿਹਾ ਕਿ ਉਨ੍ਹਾਂ ਨੂੰ ਦੇਰ ਰਾਤ 1.30 ਵਜੇ ਦੇ ਕਰੀਬ ਬੁਰਾਰਡ ਸਟ੍ਰੀਟ ਨੇੜੇ ਵੈਸਟ 4th ਐਵੇਨਿਊ 'ਤੇ ਟੇਸਲਾ ਡੀਲਰਸ਼ਿਪ ਨੂੰ ਨਿਸ਼ਾਨਾ ਬਣਾਏ ਜਾਣ ਦੀ ਸੂਚਨਾ ਮਿਲੀ, ਸ਼ੱਕੀ ਵਲੋਂ ਡੀਲਰਸ਼ਿਪ ਦੀ ਸਾਹਮਣੇ ਵਾਲੀ ਖਿੜਕੀ 'ਤੇ ਬਹੁਤ ਹੀ ਅਪਮਾਨਜਨਕ ਸ਼ਬਦ ਸਪਰੇਅ-ਪੇਂਟ ਨਾਲ ਲਿਖੇ ਗਏ ਸਨ।

ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਦੇ ਲੀਡਰ ਪੀਅਰ ਪੌਲੀਐਵ ਨੇ ਕੰਜ਼ਰਵੇਟਿਵ ਸਰਕਾਰ ਬਣਨ 'ਤੇ ਇਮੀਗ੍ਰੇਸ਼ਨ ਪਾਲਿਸੀ ਵਿਚ ਵੱਡੇ ਬਦਲਾਅ ਦਾ ਸੰਕੇਤ ਦਿੱਤਾ ਹੈ। ਪੌਲੀਐਵ ਨੇ ਕਿਹਾ ਕਿ ਉਹ ਅਜਿਹੀ ਪਾਲਿਸੀ ਲਾਗੂ ਕਰਨਗੇ, ਜਿਸ ਤਹਿਤ ਕੈਨੇਡਾ ਓਨੇ ਹੀ ਲੋਕਾਂ ਨੂੰ ਸੱਦਾ ਦੇਵੇਗਾ ਜਿੰਨਿਆਂ ਦੀ ਲੋੜ ਹੈ ਅਤੇ ਜਿੰਨਿਆਂ ਨੂੰ ਇੱਥੇ ਰੱਖਿਆ ਜਾ ਸਕਦਾ ਹੈ।

ਪੰਜਾਬ ਸਰਕਾਰ ਵਲੋਂ ਕਿਸਾਨਾਂ ਨਾਲ ਗੱਲਬਾਤ ਲਈ ਸ਼ੁੱਕਰਵਾਰ ਨੂੰ ਸੱਦੀ ਗਈ ਬੈਠਕ ਵਿਚ ਕਿਸਾਨ ਲੀਡਰ ਸ਼ਾਮਲ ਨਹੀਂ ਹੋਏ। ਸੂਬਾ ਸਰਕਾਰ ਨਾਲ ਮੀਟਿੰਗ ਤੋਂ ਪਹਿਲਾਂ ਸੰਯੁਕਤ ਕਿਸਾਨ ਮੋਰਚੇ ਦੀ ਹੋਈ ਮੀਟਿੰਗ ਵਿਚ ਸਾਰੀਆਂ ਧਿਰਾਂ ਵਲੋਂ ਸਰਬਸੰਮਤੀ ਨਾਲ ਸਰਕਾਰ ਨਾਲ ਮੀਟਿੰਗ ਵਿਚ ਨਾ ਜਾਣ ਫੈਸਲਾ ਲਿਆ ਗਿਆ।

ਕਿਸਾਨ ਅੰਦੋਲਨ ਕਾਰਨ 13 ਮਹੀਨਿਆਂ ਤੋਂ ਬੰਦ ਪੰਜਾਬ-ਹਰਿਆਣਾ ਦਾ ਖਨੌਰੀ ਬਾਰਡਰ ਵੀ ਸ਼ੁੱਕਰਵਾਰ ਤੋਂ ਖੁੱਲ੍ਹ ਗਿਆ ਹੈ, ਜਿਸ ਨਾਲ ਇੱਥੋਂ ਦਿੱਲੀ-ਪਟਿਆਲਾ ਹਾਈਵੇ 'ਤੇ ਆਵਾਜਾਈ ਸ਼ੁਰੂ ਹੋਈ ਗਈ ਹੈ। ਹਰਿਆਣਾ ਪੁਲਿਸ ਨੇ ਇੱਥੋਂ ਸੀਮਿੰਟ ਦੇ ਬੈਰੀਕੇਡ ਹਟਾ ਦਿੱਤੇ ਹਨ।

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਕੈਨੇਡੀਅਨਾਂ ਨੂੰ ਇੱਕ ਹੋਰ ਵੱਡੀ ਰਾਹਤ ਦਿੰਦੇ ਹੋਏ ਪੂੰਜੀ ਲਾਭ ਟੈਕਸ ਵਿਚ ਪ੍ਰਸਾਤਿਵ ਵਾਧੇ ਨੂੰ ਰੱਦ ਕਰ ਦਿੱਤਾ ਹੈ। ਇਸ ਦੇ ਨਾਲ ਹੀ ਛੋਟੇ ਕਾਰੋਬਾਰ ਦੇ ਸ਼ੇਅਰ, ਖੇਤੀ ਅਤੇ ਮੱਛੀ ਫੜਨ ਵਾਲੀ ਜਾਇਦਾਦ ਦੀ ਵਿਕਰੀ 'ਤੇ ਲਾਈਫਟਾਈਮ ਕੈਪੀਟਲ ਗੇਨ ਵਿਚ ਛੋਟ ਨੂੰ $1 ਮਿਲੀਅਨ ਤੋਂ ਵਧਾ ਕੇ $1.25 ਮਿਲੀਅਨ ਕਰਨ ਦੇ ਪ੍ਰਸਤਾਵ ਨੂੰ ਬਰਕਰਾਰ ਰੱਖਣ ਦਾ ਫੈਸਲਾ ਕੀਤਾ ਹੈ, ਜਿਸ ਲਈ ਬਿੱਲ ਚੋਣਾਂ ਬਾਅਦ ਪੇਸ਼ ਕੀਤਾ ਜਾਵੇਗਾ।

ਕੈਲਗਰੀ ਵਿਚ ਇਸ ਹਫਤੇ ਦੋ ਟੇਸਲਾ ਵਾਹਨਾਂ ਨੂੰ ਜਾਣ-ਬੁੱਝ ਕੇ ਅੱਗ ਦੇ ਹਵਾਲੇ ਕੀਤਾ ਗਿਆ, ਜਿਸ ਦੀ ਪੁਲਿਸ ਵਲੋਂ ਜਾਂਚ ਕੀਤੀ ਜਾ ਰਹੀ ਹੈ। ਪੁਲਿਸ ਮੁਤਾਬਕ ਪਹਿਲੀ ਵਾਰਦਾਤ 12 ਐਵੇਨਿਊ ਸਾਊਥ ਈਸਟ ਅਤੇ ਮੈਕਲੋਡ ਟ੍ਰੇਲ ਸਾਊਥ ਈਸਟ ਦੇ ਟੇਸਲਾ ਚਾਰਜਿੰਗ ਸਟੇਸ਼ਨ ਵਿਚ ਮੰਗਲਵਾਰ ਰਾਤ ਕਰੀਬ 11 ਵਜੇ ਵਾਪਰੀ। ਇਕ ਔਰਤ ਨੇ ਆਪਣੀ ਗੱਡੀ ਰਾਤ ਕਰੀਬ 9.30 ਵਜੇ ਇੱਥੇ ਪਾਰਕ ਕੀਤੀ ਸੀ ਅਤੇ ਉਸ ਨੂੰ ਜਾਣਕਾਰੀ ਮਿਲੀ ਕਿ ਉਸ ਦੀ ਗੱਡੀ ਚਾਰਜ ਨਹੀਂ ਹੋ ਰਹੀ। ਜਦ ਉਹ ਗੱਡੀ ਚੈੱਕ ਕਰਨ ਗਈ ਤਾਂ ਇਹ ਅੱਗ ਦੀਆਂ ਲਪਟਾਂ ਵਿਚ ਘਿਰੀ ਹੋਈ ਸੀ।

ਦਿੱਲੀ ਦੇ ਸਾਬਕਾ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੂੰ ਆਮ ਆਦਮੀ ਪਾਰਟੀ ਨੇ ਪਾਰਟੀ ਦੇ ਪੰਜਾਬ ਮਾਮਲਿਆਂ ਦਾ ਇੰਚਾਰਜ ਨਿਯੁਕਤ ਕਰ ਦਿੱਤਾ ਹੈ। ਪਾਰਟੀ ਦੇ ਕੌਮੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਦੀ ਰਿਹਾਇਸ਼ ’ਤੇ ਸੰਸਦੀ ਮਾਮਲਿਆਂ ਬਾਰੇ ਕਮੇਟੀ ਦੀ ਬੈਠਕ ਦੌਰਾਨ ਇਹ ਫੈਸਲਾ ਲਿਆ ਗਿਆ।

ਕੈਨੇਡਾ ਦੀ ਅਮਰੀਕਾ ਅਤੇ ਚੀਨ ਨਾਲ ਟੈਰਿਫ ਵਾਰ ਅਤੇ ਦੇਸ਼ ਅੰਦਰ ਵਪਾਰ ਨੂੰ ਸੌਖਾਲਾ ਬਣਾਉਣ ਦੇ ਮੁੱਦੇ 'ਤੇ ਚਰਚਾ ਲਈ ਅੱਜ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਲੋਂ ਅੱਜ ਕੈਨੇਡਾ ਭਰ ਦੇ ਪ੍ਰੀਮੀਅਰਾਂ ਨਾਲ ਬੈਠਕ ਕੀਤੀ ਜਾ ਰਹੀ ਹੈ। ਕਾਰਨੀ ਵਲੋਂ ਐਤਵਾਰ ਨੂੰ ਫੈਡਰਲ ਚੋਣਾਂ ਦੀ ਘੋਸ਼ਣਾ ਕਰਨ ਦੀਆਂ ਸੰਭਾਵਨਾਂ ਤੋਂ ਪਹਿਲਾਂ ਹੋ ਰਹੀ ਇਸ ਬੈਠਕ ਵਿਚ 13 ਸੂਬਿਆਂ ਦੀ ਵੱਖ-ਵੱਖ ਅਰਥ ਵਿਵਸਥਾ ਨੂੰ ਸਿੰਗਲ ਕੈਨੇਡੀਅਨ ਅਰਥਵਿਵਸਥਾ ਬਣਾਉਣ 'ਤੇ ਫੋਕਸ ਹੋਵੇਗਾ, ਜਿਸ ਦਾ ਮਤਲਬ ਇੱਕ-ਸੂਬੇ ਤੋਂ ਦੂਜੇ ਸੂਬੇ ਵਿਚ ਵਪਾਰ ਕਰਨ ਵਿਚ ਆਉਣ ਵਾਲੀਆਂ ਪ੍ਰਮੁੱਖ ਰੁਕਾਵਟਾਂ ਨੂੰ ਦੂਰ ਕਰਨਾ ਹੈ।