News

Today was the third death anniversary of Punjabi singer Shubhdeep Singh Sidhu alias Sidhu Moosewala. He was shot dead in Jawaharke village of Mansa on the evening of May 29, 2022.

ਐਲਬਰਟਾ ਸਰਕਾਰ ਵਲੋਂ ਟਰਾਂਸਜੈਂਡਰ ਯੂਥ ਦੇ ਮੈਡੀਕਲ ਇਲਾਜ ਨੂੰ ਰੋਕਣ ਵਾਲੇ ਫੈਸਲੇ ਦੇ ਵਿਰੋਧ ਵਿਚ ਕੈਨੇਡੀਅਨ ਡੌਕਟਰਜ਼ ਦੇ ਗਰੁੱਪ ਨੇ ਚੁਣੌਤੀ ਦਿੱਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਆਜ਼ਾਦੀ ਦੇ ਹੱਕ ਦੀ ਉਲੰਘਣਾ ਹੈ। ਕੈਨੇਡੀਅਨ ਮੈਡੀਕਲ ਐਸੋਸੀਏਸ਼ਨ ਦਾ ਕਹਿਣਾ ਹੈ ਕਿ ਅਦਾਲਤੀ ਚੁਣੌਤੀ ਦਾ ਉਦੇਸ਼ ਮਰੀਜ਼ਾਂ ਅਤੇ ਡਾਕਟਰਾਂ ਵਿਚਕਾਰ ਸਬੰਧਾਂ ਦੀ ਰੱਖਿਆ ਕਰਨਾ ਹੈ, ਕਿਉਂਕਿ ਇਲਾਜ ਦਾ ਫੈਸਲਾ ਉਨ੍ਹਾਂ ਦਾ ਹੀ ਹੁੰਦਾ ਹੈ। ਸੂਬੇ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਇਹ ਬਿੱਲ ਪਾਸ ਕੀਤਾ ਸੀ, ਜਿਸ ਕਾਰਨ ਟਰਾਂਸਜੈਂਡਰ ਕਮਿਊਨਿਟੀ ਵਿਰੋਧ ਕਰ ਰਹੀ ਹੈ।

ਅਮਰੀਕਾ ਦੀ ਇੰਟਰਨੈਸ਼ਨਲ ਟਰੇਡ ਕੋਰਟ ਨੇ ਟਰੰਪ ਵਲੋਂ ਕੈਨੇਡਾ ਅਤੇ ਬਾਕੀ ਦੁਨੀਆ 'ਤੇ ਲਗਾਏ ਗਏ ਭਾਰੀ ਟੈਰਿਫ ਨੂੰ ਰੋਕ ਦਿੱਤਾ ਹੈ। ਕੋਰਟ ਨੇ ਬੁੱਧਵਾਰ ਸ਼ਾਮ ਫੈਸਲਾ ਸੁਣਾਉਂਦੇ ਹੋਏ ਕਿਹਾ ਕਿ ਰਾਸ਼ਟਰਪਤੀ ਟਰੰਪ ਨੇ ਐਮਰਜੈਂਸੀ-ਪਾਵਰ ਲਾਅ ਦੇ ਦਾਇਰੇ ਤੋਂ ਬਾਹਰ ਜਾ ਕੇ ਆਪਣੇ ਅਧਿਕਾਰਾਂ ਦੀ ਉਲੰਘਣਾ ਕੀਤੀ ਹੈ। ਤਿੰਨ ਜੱਜਾਂ ਦੇ ਪੈਨਲ ਨੇ ਕਿਹਾ ਕਿ ਅਮਰੀਕਾ ਦਾ ਸੰਵਿਧਾਨ ਸੰਸਦ ਨੂੰ ਦੂਜੇ ਦੇਸ਼ਾਂ ਨਾਲ ਸਿਰਫ ਵਪਾਰ ਨੂੰ ਰੈਗੂਲੇਟ ਕਰਨ ਦਾ ਵਿਸ਼ੇਸ਼ ਅਧਿਕਾਰ ਦਿੰਦਾ ਹੈ,ਇਸ ਦਾ ਮਤਲਬ ਇਹ ਨਹੀਂ ਕਿ ਰਾਸ਼ਟਰਪਤੀ ਅਰਥਵਿਵਸਥਾ ਦਾ ਹਵਾਲਾ ਦੇ ਕੇ ਆਪਣੀਆਂ ਐਮਰਜੈਂਸੀ-ਪਾਵਰ ਨਾਲ ਕੁਝ ਵੀ ਕਰਨ।

ਵੈਨਕੂਵਰ ਦੇ ਹਾਰਸਸ਼ੂ ਬੇ ਵਿਚ ਬੀਤੇ ਦਿਨ ਟਰਾਂਜ਼ਿਟ ਬੱਸ ਨਾਲ ਟਕਰਾਉਣ ਕਾਰਨ 4 ਸਾਲਾ ਬੱਚੇ ਦੀ ਮੌਤ ਹੋ ਗਈ। ਇਹ ਹਾਦਸਾ ਦੁਪਹਿਰ ਕਰੀਬ 3.30 ਵਜੇ ਹਾਰਸਸ਼ੂ ਬੇ ਫੈਰੀ ਟਰਮੀਨਲ ਕੋਲ ਵਾਪਰਿਆ। ਪੁਲਿਸ ਮੁਤਾਬਕ ਬੱਚਾ ਆਪਣੀ ਮਾਂ ਅਤੇ ਇਕ ਹੋਰ ਔਰਤ ਨਾਲ ਪੈਦਲ ਜਾ ਰਿਹਾ ਸੀ। ਬੱਸ ਨਾਲ ਟਕਰਾਉਣ ਮਗਰੋਂ ਬੱਚੇ ਨੇ ਉੱਥੇ ਹੀ ਦਮ ਤੋੜ ਦਿੱਤਾ ਅਤੇ ਦੋਵੇਂ ਔਰਤਾਂ ਜ਼ਖਮੀ ਹੋ ਗਈਆਂ। ਬੱਚੇ ਦੀ ਮਾਂ ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ ਅਤੇ ਲਾਇਨਜ਼ਗੇਟ ਹਸਪਤਾਲ ਵਿਚ ਇਲਾਜ ਚੱਲ ਰਿਹਾ ਹੈ। ਵੈਸਟ ਵੈਨਕੂਵਰ ਪੁਲਿਸ ਅਤੇ ਏਕੀਕ੍ਰਿਤ ਟੱਕਰ ਵਿਸ਼ਲੇਸ਼ਣ ਵਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।

ਮੈਨੀਟੋਬਾ,ਸਸਕੈਚਵਨ ਅਤੇ ਐਲਬਰਟਾ ਵਿਚ ਜੰਗਲਾਂ ਦੀ ਅੱਗ ਕਾਰਨ ਹਜ਼ਾਰਾਂ ਲੋਕਾਂ ਨੂੰ ਘਰ ਛੱਡਣ ਲਈ ਮਜਬੂਰ ਹੋਣਾ ਪੈ ਰਿਹਾ ਹੈ। ਮੈਨੀਟੋਬਾ ਸਰਕਾਰ ਨੇ ਪੂਰੇ ਸੂਬੇ ਵਿਚ ਐਮਰਜੈਂਸੀ ਦੀ ਸਥਿਤੀ ਦਾ ਐਲਾਨ ਕੀਤਾ ਹੈ ਕਿਉਂਕਿ ਜੰਗਲ ਦੀ ਅੱਗ ਨਾਲ ਸੂਬੇ ਭਰ ਦੇ ਕਈ ਇਲਾਕਿਆਂ ਵਿਚ ਖਤਰਾ ਬਣਿਆ ਹੋਇਆ ਹੈ।

ਸਾਲ 2025 ਦੀਆਂ ਵੈਨਕੂਵਰ ਬੈਂਡਿਟਸ ਦੀਆਂ ਕੁਝ ਗੇਮਸ ਦੀ ਕਮੈਂਟਰੀ ਪੰਜਾਬੀ ਵਿੱਚ ਕੀਤੀ ਜਾਵੇਗੀ। ਅਜਿਹਾ ਵੈਨਕੂਵਰ ਬੈਂਡਿਟਸ ਅਤੇ ਕਨੈਕਟ ਐਫ.ਐਮ. ਦੀ ਪਾਰਟਨਰਸ਼ਿਪ ਤਹਿਤ ਕੀਤਾ ਜਾ ਰਿਹਾ ਹੈ।

ਕੈਨੇਡੀਅਨ ਸੰਸਦ ਦੇ ਰੈਗੂਲਰ ਸੈਸ਼ਨ ਦੌਰਾਨ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਅੱਜ ਆਪਣੇ ਪਹਿਲੇ ਪ੍ਰਸ਼ਨ ਕਾਲ ਦਾ ਸਾਹਮਣਾ ਕੀਤਾ। ਕੰਜ਼ਰਵੇਟਿਵ ਪਾਰਟੀ ਦੇ ਹਾਊਸ ਲੀਡਰ ਐਂਡਰਿਊ ਸ਼ੀਅਰ ਨੇ ਪੀ. ਐੱਮ. 'ਤੇ ਗੁੱਪਚੁੱਪ ਤਰੀਕੇ ਨਾਲ ਅਮਰੀਕਾ ਖਿਲਾਫ ਟੈਰਿਫਸ ਨੂੰ ਜ਼ੀਰੋ ਕੀਤੇ ਜਾਣ ਦਾ ਇਲਜ਼ਾਮ ਲਗਾਇਆ।

ਬੀਸੀ ਦੇ ਜ਼ਿਆਦਾਤਰ ਹਿੱਸਿਆਂ ਵਿਚ ਵਾਤਾਵਰਣ ਕੈਨੇਡਾ ਨੇ ਦਿਨ ਭਰ ਗਰਮ ਮੌਸਮ ਰਹਿਣ ਦੀ ਚਿਤਾਵਨੀ ਦਿੱਤੀ ਹੈ। ਏਜੰਸੀ ਦੇ ਮੌਸਮ ਵਿਗਿਆਨੀ ਬੌਬੀ ਸੇਖੋਂ ਮੁਤਾਬਕ, ਤਾਪਮਾਨ ਆਮ ਨਾਲੋਂ 5 ਤੋਂ 12 ਡਿਗਰੀ ਵੱਧ ਹੋ ਸਕਦਾ ਹੈ। ਅੰਦਰਲੇ ਹਿੱਸਿਆਂ ਵਿੱਚ ਤਾਪਮਾਨ 30 ਡਿਗਰੀ ਦੇ ਆਸ ਪਾਸ ਤੱਕ ਪਹੁੰਚ ਸਕਦਾ ਹੈ, ਜਦੋਂ ਕਿ ਪਾਣੀ ਦੇ ਕਰੀਬ ਵਾਲੇ ਖੇਤਰਾਂ ਵਿਚ ਇਹ 20 ਡਿਗਰੀ ਦੇ ਕਰੀਬ ਰਹਿਣ ਦੀ ਸੰਭਾਵਨਾ ਹੈ।

ਬੀ.ਸੀ. ਵਾਈਲਡਫਾਇਰ ਸਰਵਿਸ ਨੇ ਤੱਟਵਰਤੀ ਖੇਤਰ ਵਿਚ ਅਮਰੀਕੀ ਸਰਹੱਦ ਤੋਂ ਲੈ ਕੇ ਟਵੀਡਸਮੂਇਰ ਦੱਖਣੀ ਸੂਬਾਈ ਪਾਰਕ ਤੱਕ ਖੁੱਲ੍ਹੇ ਵਿਚ ਅੱਗ ਲਗਾਉਣ 'ਤੇ ਪਾਬੰਦੀਆਂ ਦਾ ਐਲਾਨ ਕੀਤਾ ਹੈ। ਕੈਟਾਗਰੀ 2 ਅਤੇ ਕੈਟਾਗਰੀ 3 ਦੇ ਖੁੱਲ੍ਹੇ ਵਿੱਚ ਅੱਗ 'ਤੇ ਇਹ ਪਾਬੰਦੀ ਸ਼ੁੱਕਰਵਾਰ ਦੁਪਹਿਰ ਤੋਂ ਲਾਗੂ ਹੋਵੇਗੀ, ਜੋ 31 ਅਕਤੂਬਰ ਤੱਕ ਜਾਂ ਇਸ ਨੂੰ ਰੱਦ ਕੀਤੇ ਜਾਣ ਤੱਕ ਲਾਗੂ ਰਹੇਗੀ।