News

ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅੱਜ ਐਲਬਰਟਾ ਵਿਚ ਜੀ7 ਬੈਠਕ ਦੀ ਸਾਈਡਲਾਈਨ'ਤੇ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਅਤੇ ਭਾਰਤੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਮੁਲਾਕਾਤ ਕਰਨਗੇ। ਕਨਾਨਸਕੀਜ਼ ਵਿਚ ਜੀ-7 ਬੈਠਕ ਦਾ ਅੱਜ ਦੂਜਾ ਅਤੇ ਅੰਤਿਮ ਦਿਨ ਹੈ, ਜੋ ਰਾਸ਼ਟਰਪਤੀ ਡੋਨਲਡ ਟਰੰਪ ਦੀ ਮੌਜੂਦਗੀ ਦੇ ਬਿਨਾਂ ਸੰਪੰਨ ਹੋਵੇਗੀ।

ਐਲਬਰਟਾ ਦੀ ਹੈਲਥ-ਕੇਅਰ ਯੂਨੀਅਨ ਨੇ ਸੂਬਾ ਸਰਕਾਰ ਨੂੰ ਕੋਰੋਨਾ ਵਾਇਰਸ ਤੋਂ ਬਚਾਅ ਲਈ ਟੀਕੇ ਮੁਫਤ ਕਰਨ ਦੀ ਮੰਗ ਕੀਤੀ ਹੈ। ਸੂਬੇ ਦੇ ਕਰੀਬ 30,000 ਹੈਲਥ-ਕੇਅਰ ਵਰਕਰ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਨੇ ਕਿਹਾ ਕਿ ਫਰੰਟ ਲਾਈਨ ਵਰਕਰਾਂ ਸਣੇ ਟੀਕਾ ਲਗਵਾਉਣ ਦੇ ਇਛੁੱਕ ਕਿਸੇ ਵੀ ਐਲਬਰਟਨ ਲਈ ਇਹ ਮੁਫਤ ਹੋਣਾ ਚਾਹੀਦਾ ਹੈ।

ਸਕਵਾਮਿਸ਼ ਦੇ ਉੱਤਰੀ ਹਿੱਸੇ ਵਿਚ ਜੰਗਲ ਵਿਚ ਲੱਗੀ ਅੱਗ ਨੂੰ ਸੋਮਵਾਰ ਤੱਕ ਸੀਮਤ ਦਾਇਰੇ ਵਿਚ ਕਰਨ 'ਤੇ ਸਫਲਤਾ ਹਾਸਲ ਕਰ ਲਈ ਗਈ ਹੈ।ਬੀ.ਸੀ. ਵਾਈਲਡਫਾਇਰ ਸਰਵਿਸ ਦੇ ਸੂਚਨਾ ਅਧਿਕਾਰੀ ਸਾਰਾਹ ਬਡ ਦਾ ਕਹਿਣਾ ਹੈ ਕਿ ਜ਼ਮੀਨੀ ਅਮਲਾ ਹੁਣ ਡ੍ਰਾਈਡਨ ਕ੍ਰੀਕ ਜੰਗਲ ਦੀ ਅੱਗ ਨੂੰ ਪੂਰੀ ਤਰ੍ਹਾਂ ਕਾਬੂ ਵਿਚ ਲਿਆਉਣ ਲਈ ਕੰਮ ਕਰ ਰਿਹਾ ਹੈ।

ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਦੇ ਲੀਡਰ ਪੀਅਰ ਪੌਲੀਐਵ ਦੀ ਪ੍ਰਧਾਨਗੀ ਨੂੰ ਚੁਣੌਤੀ ਮਿਲਣ ਜਾ ਰਹੀ ਹੈ। ਜਨਵਰੀ ਵਿਚ ਕੰਜ਼ਰਵੇਟਿਵ ਪਾਰਟੀ ਮੈਂਬਰ ਵੋਟ ਜ਼ਰੀਏ ਇਹ ਤੈਅ ਕਰਨ ਜਾ ਰਹੇ ਹਨ ਕਿ ਉਨ੍ਹਾਂ ਨੂੰ ਪਾਰਟੀ ਦੇ ਪ੍ਰਧਾਨ ਰਹਿਣਾ ਚਾਹੀਦਾ ਹੈ ਜਾਂ ਨਹੀਂ। ਰਿਪੋਰਟਸ ਮੁਤਾਬਕ, ਪਾਰਟੀ ਦੇ ਨੈਸ਼ਨਲ ਕੌਂਸਲ ਨੇ ਸ਼ਨੀਵਾਰ ਨੂੰ ਇੱਕ ਮੀਟਿੰਗ ਦੌਰਾਨ ਲੀਡਰਸ਼ਿਪ ਸਮੀਖਿਆ ਲਈ ਵੋਟ ਕਰਵਾਉਣ ਦਾ ਫੈਸਲਾ ਕੀਤਾ, ਇਸ ਦਾ ਆਯੋਜਨ ਕੈਲਗਰੀ ਵਿਚ ਹੋਵੇਗਾ।

ਮੈਟਰੋ ਵੈਨਕੂਵਰ ਦੀ ਇੱਕ ਝੀਲ ਵਿਚ ਆਪਣੀ ਮੰਗੇਤਰ ਨਾਲ ਸਵੀਮਿੰਗ ਦੌਰਾਨ ਐਤਵਾਰ ਨੂੰ ਲਾਪਤਾ ਹੋਏ 29 ਸਾਲਾ ਨੌਜਵਾਨ ਦੀ ਪੁਲਿਸ ਨੇ ਮੌਤ ਹੋਣ ਦਾ ਖ਼ਦਸ਼ਾ ਜਤਾਇਆ ਹੈ, ਉਹ ਬਰਨਬੀ ਦਾ ਰਹਿਣ ਵਾਲਾ ਸੀ। ਫਰਸਟ ਰਿਸਪੋਂਡਰ ਨੂੰ ਸ਼ਾਮ ਕਰੀਬ 6.30 ਵਜੇ ਸਾਈਪ੍ਰਸ ਪ੍ਰੋਵਿੰਸ਼ੀਅਲ ਪਾਰਕ ਨੇੜੇ ਕੈਬਿਨ ਝੀਲ ਵਿਚ ਨੌਜਵਾਨ ਦੇ ਡੁੱਬਣ ਦੀ ਰਿਪੋਰਟ ਮਿਲੀ ਸੀ।