News

ਪੰਜਾਬ ਵਿਚ ਕੋਰੋਨਾ ਸੰਕਰਮਣ ਦੇ ਮਾਮਲਿਆਂ ਵਿਚ ਬੀਤੇ ਇੱਕ ਹਫ਼ਤੇ ਵਿਚ ਤੇਜ਼ੀ ਆਈ ਹੈ। ਸੂਬੇ ਵਿਚ ਸਭ ਤੋਂ ਵੱਧ ਮਾਮਲੇ ਲੁਧਿਆਣਾ ਵਿਚ ਹਨ, ਜਿਥੇ 23 ਮਾਮਲੇ ਆ ਚੁੱਕੇ ਹਨ। ਲੁਧਿਆਣਾ ਵਿਚ ਇਹ ਵਾਧਾ ਅਜਿਹੇ ਸਮੇਂ ਹੋਇਆ ਹੈ ਜਦੋਂ ਜ਼ਿਮਨੀ ਚੋਣ ਦੇ ਚੱਲਦੇ ਰਾਜਨੀਤਕ ਸਰਗਰਮੀਆਂ ਵਧੀਆਂ ਹਨ। ਉਥੇ ਹੀ, ਜਲੰਧਰ ਵਿਚ 6, ਮੋਹਾਲੀ ਵਿਚ ਚਾਰ ਅਤੇ ਫਿਰੋਜ਼ਪੁਰ ਵਿਚ ਦੋ ਮਾਮਲੇ ਸਾਹਮਣੇ ਆਏ ਹਨ।

ਕੈਨੇਡਾ ਦੇ ਵਾਤਾਵਰਣ ਤੇ ਜਲਵਾਯੂ ਪਰਿਵਰਤਨ ਡਿਪਾਰਟਮੈਂਟ ਦਾ ਕਹਿਣਾ ਹੈ ਕਿ ਜ਼ਿਆਦਾਤਰ ਸੂਬਿਆਂ ਵਿਚ ਬਾਰਸ਼ ਦੇ ਪੱਧਰ ਦੀ ਅਨਿਸ਼ਚਿਤਤਾ ਵਿਚਕਾਰ ਇਸ ਵਾਰ ਕੈਨੇਡਾ ਵਿਚ ਆਮ ਨਾਲੋਂ ਵੱਧ ਗਰਮੀ ਪੈਣ ਦੀ ਸੰਭਾਵਨਾ ਹੈ। ਮੌਸਮ ਵਿਗਿਆਨੀ ਜੈਨੀਫਰ ਸਮਿਥ ਦਾ ਕਹਿਣਾ ਹੈ ਕਿ ਐਟਲਾਂਟਿਕ ਕੈਨੇਡਾ, ਕਿਊਬੈਕ, ਓਨਟਾਰੀਓ ਅਤੇ ਉੱਤਰੀ ਮੈਨੀਟੋਬਾ ਵਿਚ ਖਾਸ ਤੌਰ 'ਤੇ ਵਧੇਰੇ ਗਰਮੀ ਪੈਣ ਦੀ ਸੰਭਾਵਨਾ ਹੈ।

ਓਨਟਾਰੀਓ ਦੀ ਪੀਲ ਪੁਲਿਸ ਨੇ ਅੱਜ ਤੱਕ ਦੀ ਕੋਕੀਨ ਦੀ ਸਭ ਤੋਂ ਵੱਡੀ ਖੇਪ ਜ਼ਬਤੀ ਕੀਤੀ ਹੈ, ਜਿਸ ਵਿਚ ਨੌ ਸ਼ੱਕੀ ਚਾਰਜ ਕੀਤੇ ਗਏ ਹਨ। ਇਨ੍ਹਾਂ ਵਿਚ ਜ਼ਿਆਦਾਤਰ ਪੰਜਾਬੀ ਹਨ। ਪੀਲ ਪੁਲਿਸ ਨੇ ਪ੍ਰੋਜੈਕਟ ਪੈਲੀਕਨ ਤਹਿਤ ਨਸ਼ੇ ਦੀ ਤਸਕਰੀ ਕਰਨ ਵਾਲੇ ਇੱਕ ਸੰਗਠਿਤ ਅਪਰਾਧਿਕ ਨੈੱਟਵਰਕ ਦਾ ਪਰਦਾਫਾਸ਼ ਕਰਦੇ ਲਗਭਗ 500 ਕਿਲੋਗ੍ਰਾਮ ਕੋਕੀਨ ਜ਼ਬਤ ਕੀਤੀ, ਜਿਸ ਦੀ ਕੀਮਤ $50 ਮਿਲੀਅਨ ਦੱਸੀ ਜਾਂਦੀ ਹੈ।

ਬੀਸੀ ਵਿਚ ਗਰਮ ਮੌਸਮ ਜਾਰੀ ਰਹਿਣ ਵਿਚਕਾਰ 12 ਹੋਰ ਤਾਪਮਾਨ ਰਿਕਾਰਡ ਟੁੱਟੇ ਹਨ। ਸੋਮਵਾਰ ਲਗਾਤਾਰ ਅਜਿਹਾ ਤੀਜਾ ਦਿਨ ਵੀ ਰਿਹਾ ਜਦੋਂ ਕੈਨੇਡਾ ਦਾ ਸਭ ਤੋਂ ਗਰਮ ਸਥਾਨ ਬੀ.ਸੀ. ਸੀ। ਬੀਤੇ ਕੱਲ ਦੁਪਹਿਰ ਓਸੋਯੂਸ ਵਿਚ ਪਾਰਾ 36.7 ਡਿਗਰੀ ਸੈਲਸੀਅਸ 'ਤੇ ਪਹੁੰਚ ਗਿਆ, ਜੋ ਕਿ ਨਵਾਂ ਇੱਕ ਦਿਨਾਂ ਰਿਕਾਰਡ ਹੈ।

ਈਰਾਨ ਨੇ 2018 ਦੇ ਹਮਲੇ ਤੋਂ ਬਾਅਦ ਗ੍ਰਿਫਤਾਰ ਕੀਤੇ ਗਏ ਇਸਲਾਮਿਕ ਸਟੇਟ ਸਮੂਹ ਦੇ 9 ਅੱਤਵਾਦੀਆਂ ਨੂੰ ਇਕੱਠੇ ਫਾਂਸੀ ਦੇ ਦਿੱਤੀ ਹੈ। ਈਰਾਨੀ ਨਿਆਂਪਾਲਿਕਾ ਦੀ ਨਿਊਜ਼ ਏਜੰਸੀ ਮਿਜ਼ਾਨ ਨੇ ਮੰਗਲਵਾਰ ਨੂੰ ਫਾਂਸੀ ਦੀ ਘੋਸ਼ਣਾ ਕੀਤੀ।

ਇਜ਼ਰਾਈਲ ਨੇ ਮੰਗਲਵਾਰ ਨੂੰ ਯਮਨ ਦੇ ਬਾਗੀਆਂ ਦੇ ਕਬਜ਼ੇ ਵਾਲੇ ਬੰਦਰਗਾਹ ਸ਼ਹਿਰ ਹੋਦੇਈਦਾ 'ਚ ਡੌਕਾਂ 'ਤੇ ਹਮਲਾ ਕੀਤਾ। ਹੂਤੀ ਬਾਗ਼ੀਆਂ ਨੇ ਆਪਣੇ ਅਲ-ਮਸੀਰਾਹ ਸੈਟੇਲਾਈਟ ਨਿਊਜ਼ ਚੈਨਲ ਰਾਹੀਂ ਹਮਲੇ ਦੀ ਜਾਣਕਾਰੀ ਦਿੱਤੀ। ਉਨ੍ਹਾਂ ਕਿਹਾ ਕਿ ਹਮਲਾ ਡੌਕਾਂ ਨੂੰ ਨਿਸ਼ਾਨਾ ਬਣਾ ਕੇ ਕੀਤਾ ਗਿਆ ਸੀ।

ਪ੍ਰੀਮੀਅਰ ਡੇਵਿਡ ਈਬੀ ਦਾ ਕਹਿਣਾ ਹੈ ਕਿ ਐਲਬਰਟਾ ਤੋਂ ਬੀ. ਸੀ. ਦੇ ਉੱਤਰੀ ਤੱਟ ਲਈ ਤੇਲ ਪਾਈਪਲਾਈਨ ਵਿਚ ਉਹ ਰੁਕਾਵਟ ਨਹੀਂ ਹਨ ਸਗੋਂ ਇਸ ਪਾਈਪਲਾਈਨ ਦਾ ਨਾ ਕੋਈ ਸਮਰਥਕ ਹੈ ਅਤੇ ਨਾ ਹੀ ਇਸ ਲਈ ਕੋਈ ਫੰਡਿੰਗ ਹੈ।

ਕੈਨੇਡਾ, ਬ੍ਰਿਟੇਨ ਵਲੋਂ ਇਜ਼ਰਾਇਲ ਦੇ ਦੋ ਸੱਜੇ ਪੱਖੀ ਮਿਨਿਸਟਰਸ 'ਤੇ ਉਨ੍ਹਾਂ ਦੀਆਂ ਗਾਜ਼ਾ ਵਿਰੁੱਧ ਟਿੱਪਣੀਆਂ ਲਈ ਸਖ਼ਤ ਪਾਬੰਦੀਆਂ ਲਗਾਈਆਂ ਜਾ ਰਹੀਆਂ ਹਨ। ਇਨ੍ਹਾਂ ਮਿਨਿਸਟਰਸ ਵਿਚ ਇਜ਼ਰਾਇਲ ਦੇ ਰਾਸ਼ਟਰੀ ਸੁਰੱਖਿਆ ਮੰਤਰੀ ਇਟਾਮਾਰ ਬੇਨ-ਗਵੀਰ ਅਤੇ ਵਿੱਤ ਮੰਤਰੀ ਬੇਜ਼ਲੇਲ ਸਮੋਟ੍ਰਿਚ ਸ਼ਾਮਲ ਹਨ। ਕੈਨੇਡਾ ਇਨ੍ਹਾਂ 'ਤੇ ਯਾਤਰਾ ਪਾਬੰਦੀ ਲਗਾ ਰਿਹਾ ਹੈ, ਨਾਲ ਹੀ ਉਨ੍ਹਾਂ ਦੇ ਕੈਨੇਡਾ ਵਿਚ ਕਿਸੇ ਵੀ ਤਰ੍ਹਾਂ ਦੀਆਂ ਸੰਪਤੀਆਂ ਨੂੰ ਜ਼ਬਤ ਕਰੇਗਾ।

ਕੈਨੇਡਾ ਵਿਚ ਉੱਤਰ-ਪੱਛਮੀ ਓਨਟਾਰੀਓ ਤੋਂ ਬ੍ਰਿਟਿਸ਼ ਕੋਲੰਬੀਆ ਤੱਕ ਜੰਗਲਾਂ ਵਿਚ ਲੱਗੀ ਅੱਗ ਨੂੰ ਕਾਬੂ ਕਰਨ ਵਿਚ ਮਦਦ ਲਈ ਆਸਟ੍ਰੇਲੀਆ ਦੇ ਨਿਊ ਸਾਊਥ ਵੇਲਜ਼ ਰੂਰਲ ਫਾਇਰ ਸਰਵਿਸ ਨੇ 96 ਫਾਇਰ ਫਾਈਟਰ ਅਤੇ ਮਾਹਰਾਂ ਦੀ ਇੱਕ ਟੀਮ ਪੰਜ ਹਫ਼ਤੇ ਲਈ ਕੈਨੇਡਾ ਭੇਜੀ ਹੈ। ਕੈਨੇਡੀਅਨ ਇੰਟਰਏਜੰਸੀ ਫੋਰੈਸਟ ਫਾਇਰ ਸੈਂਟਰ ਵਲੋਂ ਇਸ ਦੀ ਬੇਨਤੀ ਕੀਤੀ ਗਈ ਸੀ।